இதுவரை இல்லாத வகையில் கோவில் கதவுகள் பூட்டப்பட்டன; பக்தர்கள் வேதனை

மதுரை,ஏப்.27- தேரோட்டத்தின் போது இதுவரை இல்லாத வகையில் மீனாட்சி அம்மன் கோவிலின் வாயில் கதவுகள் அனைத்தும் அடைக்கப்பட்டன. இதனால் கோவிலுக்கு வந்த பக்தர்கள் பெரும் வேதனை அடைந்தனர்.

மீனாட்சி அம்மன் கோவில்

மதுரை மீனாட்சி அம்மன் கோவிலில் தினமும் அதிகாலையில் நடை திறந்து பகல் 12.30 மணியளவில் மூடப்பட்டு, மீண்டும் மாலை 4 மணிக்கு திறக்கப்பட்டு, அர்த்தஜாம பூஜைக்குப்பின் இரவு நடை சாத்தப்படும். இது தவிர கிரகண காலங்களிலும், அம்மனும், சுவாமியும் வீதி உலா, தெப்ப உற்சவத்திற்காக வெளியே செல்லும் போது நடை சாத்தப்படுவது வழக்கம்.

நடைசாத்தப்பட்டாலும், காலை கோவில் திறக்கப்பட்டது முதல் இரவு வரை கோவிலின் 5 பிரதான நுழைவாயில் கதவுகளும் திறந்தே இருக்கும். கோவிலுக்கு வரும் பக்தர்கள் அந்த சமயத்தில் ஆடிவீதிகள், அம்மன்சன்னதி, சுவாமி சன்னதி செல்லும் வழிகளில் உள்ள கடை பகுதிகள், ஆயிரங்கால் மண்டபம் போன்ற இடங்களில் அமர்ந்திருப்பார்கள். நடை திறந்தபின் அவர்கள் சுவாமி தரிசனம் செய்துவிட்டு செல்வார்கள். வெளிïர், வெளிமாநிலங்களில் இருந்து வருபவர்கள், சுற்றுலா பயணிகளுக்கு இது பயனுள்ளதாக அமையும்.

வாயில்கள் பூட்டப்பட்டன

ஆனால் சமீபகாலமாக பாதுகாப்பு கருதி போலீசாரின் கெடுபிடி சற்று அதிகரித்து வருகிறது. திடீர் திடீரென்று தடுப்புகள் அமைப்பது, கதவுகளை பூட்டுவது, மீண்டும் திறப்பது என பல்வேறு நடவடிக்கைகள் எடுக்கப்படுகின்றன. அதேபோன்று நேற்று முன்தினம் திருக்கல்யாணம் முடிந்தபின் அம்மன் சன்னதி வழியாக பக்தர்கள் சென்று திருக்கல்யாண மண்டபத்தில் சுவாமியை தரிசனம் செய்து விட்டு கிழக்கு கோபுர வாசல் வழியாக திரும்ப வேண்டும் என்று வலியுறுத்தப்பட்டது. மற்ற வாயில்கள் வழியாக அனுமதிக்கவில்லை.

அதற்கு மேல் ஒரு படி மேலாக நேற்று போலீசாரின் நடவடிக்கை இருந்தது. தேரோட்டத்திற்காக மீனாட்சி அம்மனும், சுந்தரேசுவர பெருமானும் கோவிலில் இருந்து அதிகாலையில் புறப்பட்டு விட்டனர். அதன்பின் கோவிலின் பிரதான 5 கோபுர வாசல்களும் இழுத்து மூடப்பட்டன. அங்கு போலீசார் நிறுத்தப்பட்டு யாரையும் உள்ளே அனுமதிக்கவில்லை. எனவே கோவிலுக்கு வந்த ஆயிரக்கணக்கான பக்தர்கள் உள்ளே செல்ல முடியாமல் பெரும் மனவேதனையுடன் திரும்பி சென்றார்கள்.

இதுவரை தேரோட்டத்தின்போது இதுபோல் கோவில் கதவுகள் மூடப்பட்டதில்லை. இதுபோன்ற போலீசாரின் திடீர் நடவடிக்கைகள் பெரும் வருத்தத்தை அளிக்கிறது என்றும் கோவில் நிர்வாகமும் இதை எப்படி ஏற்றுக் கொள்கிறது என்பது தெரியவில்லை என்றும் பக்தர் ஒருவர் கூறினார்.