அடுத்தடுத்து விபத்துகள் போலீஸ்காரர் உள்பட 2 பேர் பலி

திருமங்கலம் அருகே நான்கு வழிச்சாலையில் அடுத்தடுத்து விபத்துகள் போலீஸ்காரர் உள்பட 2 பேர் பலி


திருமங்கலம், ஏப்.27- திருமங்கலம் அருகே நான்குவழிச்சாலையில் அடுத்தடுத்து நடந்த விபத்துக்களில் போலீஸ்காரர் உள்பட 2 பேர் பலியாகினர்.

நான்கு வழிச்சாலை

திருமங்கலம் பகுதியில் உள்ள நான்குவழிச்சாலை வழியாக தென்மாவட்டங்களுக்கு வாகனங்கள் சென்று வருகின்றன. பெரிய அளவில் வளைவுகள் இல்லாத நிலையிலும் இப்பகுதியில் அடிக்கடி விபத்துகள், உயிரிழப்புகள் ஏற்பட்டு வருகின்றன.

நேற்று முன்தினம் நடந்த விபத்தில் 2 பேர் உயிரிழந்தனர். நேற்று நடந்த 2 விபத்துக்களில் 2 பேர் உயிரிழந்தனர். இவ்வாறு கடந்த 2 நாட்களில் நடைபெற்ற விபத்துக்களில் 4 பேர் பலியாகி உள்ளனர். இந்த விபத்துக்கள் அனைத்துமே எதிரெதிரே வந்த வாகனங்கள் மோதி நடந்தவை அல்ல. ஒரே வழியில் செல்லும் வாகனங்கள் மோதிக்கொண்டது, அல்லது வாகனங்கள் நிலைதடுமாறி விபத்துக்குள்ளானதால் ஏற்பட்ட உயிரிழப்புகள் தான்.

அதிகாலை விபத்து

கேரள மாநிலம் திருவனந்தபுரத்தில் இருந்து ரசாயன பவுடர்களை ஏற்றி கொண்டு ஒரு லாரி கொல்கத்தா நோக்கி சென்றது. நேற்று அதிகாலை திருமங்கலம் 4 வழிச்சாலையில் வந்து கொண்டு இருந்தது. அதே சமயம், தென்காசியில் இருந்து காய்கறிகளை ஏற்றி கொண்டு ஒரு லாரி ஊட்டி நோக்கி சென்று கொண்டிருந்தது.

உடல் நசுங்கி பலி

இந்த லாரி திருமங்கலம் அருகே உள்ள ஆலம்பட்டி பிரிவு என்ற இடத்தில் வந்த போது முன்னால் சென்று கொண்டு இருந்த ரசாயன பவுடரை ஏற்றிய லாரியை போட்டி போட்டு கொண்டு முந்த முயன்றது. அதில் திடீரென்று நிலை தடுமாறிய லாரி முன்னாள் சென்ற லாரி மீது மோதியது. அதில் காய்கறி ஏற்றி வந்த லாரியின் முன்பகுதி முற்றிலும் சேதமடைந்தது. லாரியை ஓட்டி வந்த டிரைவர் சக்திவேல் (வயது22) என்பவர் கண்ணில் படுகாயம் ஏற்பட்டது. அவருடன் பயணம் செய்த அவரது தந்தை ஆறுமுகம் (வயது48) சம்பவ இடத்திலேயே உடல் நசுங்கி பலியானார்.

போலீஸ் விசாரணை

இது குறித்து தகவல் கிடைத்தவுடன் திருமங்கலம் போலீசாரும், தீயணைப்பு படையினரும் விரைந்து வந்தனர். அவர்கள் மீட்பு பணியில் ஈடுப்பட்டனர். படுகாயமடைந்த சக்திவேலை திருமங்கலம் அரசு ஆஸ்பத்திரிக்கு அனுப்பி வைத்தனர். விபத்து குறித்து போலீசார் விசாரணை நடத்தி வருகின்றனர்.

போலீஸ்காரர் பலி

நேற்று அதிகாலை இந்த விபத்து நடந்த நிலையில் நேற்று 11 மணியளவில் மற்றொரு விபத்து நடந்தது.

நெல்லை பாளையங்கோட்டை டவுன் போலீஸ் நிலையத்தில் பணியாற்றியவர் முத்துகுமார்(42). இவர் தனது மனைவி கோமதி(38), குழந்தைகள் முத்துலட்சுமி(14), அனுசூயா(12) ஆகியோருடன் ஒரு காரில் கோயம்புத்தூர் நோக்கி சென்றார்.

கள்ளிக்குடி நான்குவழிச்சாலையில் ஒரு தனியார் கல்லூரி அருகே வந்த போது கார் கட்டுப்பாட்டை இழந்தது. நான்குவழிச்சாலையில் தடுப்பில் மோதி நிலைதடுமாறி ரோட்டில் கவிழ்ந்தது.

இதில் தலையில் பலத்த காயம் அடைந்த முத்துக்குமார் சம்பவ இடத்திலேயே பலியானார். படுகாயம் அடைந்த கோமதி, முத்துலட்சுமி ஆகியோர் மதுரையில் உள்ள ஒரு தனியார் ஆஸ்பத்திரியில் சேர்க்கப்பட்டுள்ளார். அனுசுயா லேசான காயத்துடன் தப்பினார்.

சம்பவம் நடந்த இடத்தின் அருகில் நெடுஞ்சாலை ரோந்துப்பிரிவு இன்ஸ்பெக்டர் ராஜேந்திரன் நின்று கொண்டிருந்தார். அவர் உடனடியாக நடவடிக்கை எடுத்து காயம் அடைந்தவர்கள் ஆஸ்பத்திரிக்கு அழைத்து செல்ல ஏற்பாடு செய்தார். உடனடியாக சாலையில் போக்குவரத்தும் சீரமைக்கப்பட்டது. இந்த விபத்து குறித்து கள்ளிக்குடி போலீசார் விசாரித்து வருகின்றனர்.