கள்ளழகர் திருவிழாவையொட்டி இன்றும், நாளையும் போக்குவரத்து மாற்றம்

மதுரை, ஏப்.27- கள்ளழகர் எதிர்சேவை மற்றும் வைகை ஆற்றில் இறங்கும் நிகழ்ச்சியையொட்டி இன்றும் நாளையும் போக்குவரத்தில் மாற்றம் செய்யப்பட்டுள்ளது.

போக்குவரத்து மாற்றம்

சித்திரை திருவிழாவையொட்டி அழகர் கோவிலில் இருந்து கள்ளழகர் நேற்று மதுரை புறப்பட்டார். இன்று எதிர்சேவையும், நாளை கள்ளழகர் வைகை ஆற்றில் இறங்கும் நிகழ்ச்சியும் நடைபெறுகிறது. இதையொட்டி பொதுமக்கள் மற்றும் பக்தர்களின் வசதிக்காக இன்றும், நாளையும் போலீஸ் கமிஷனர் பாலசுப்பிரமணியன் உத்தரவின்பேரில் போக்குவரத்தில் மாற்றம் செய்யப்பட்டுள்ளது.

அதன்படி கள்ளழகர் அவுட் போஸ்ட் அம்பலகாரர் மண்டபத்தில் எழுந்தரும்போது, அழகர்கோவில் ரோட்டில் தமுக்கம் சந்திப்பில் இருந்து பெரியார் சிலை வரை இரு வழிகளிலும் வாகனங்கள் அனுமதி இல்லை. புது நத்தம் ரோடு, அழகர்கோவில் ரோடு, மேலூர் ரோட்டில் இருந்து கீழ வாசல், சிம்மக்கல் மார்க்கமாக செல்ல வேண்டிய டவுன் பஸ்கள், கனரக வாகனங்கள், ரேஸ்கோர்ஸ் ரோடு, நத்தம்ரோடு சந்திப்பு, பாண்டிய ஓட்டல் சந்திப்பு, ரேஸ் கோர்ஸ் ரோடு, மாவட்ட கோர்ட்டு, கே.கே.நகர் ஆர்ச், கே.கே.நகர் ரோடு, ஆவின் சந்திப்பு, அரவிந்த் ஆஸ்பத்திரி சந்திப்பு, குருவிக்காரன் சாலை பாலம், காமராஜர் ரோடு, முனிச்சாலை சந்திப்பு வழியாக செல்லவேண்டும்.

ஒரு வழிபாதை

பி.டி.ராஜன் ரோட்டில் இருந்து தமுக்கம் வரும் அனைத்து வாகனங்களும் லேடி டோக் கல்லூரி ரோடு, அஜமல்கான் ரோடு சந்திப்பில் தடுக்கப்பட்டு, வானொலி நிலைய ரோடு, ஜெயராஜ் கல்யாண மகால், ஈவ்ஸ் ஈரா, ஐ.ஓ.சி. ரவுண்டனா, ரேஸ்கோர்ஸ்ரோடு, கோர்ட்டு, கே.கே.நகர் ரோடு, ஆவின் , அவிந்த் ஆஸ்பத்திரி சந்திப்பு, குருவிக்காரன் பாலம் வழியாக செல்லவேண்டும்.

புது நத்தம், அழகர்கோவில் ரோட்டுக்கு செல்லவேண்டிய டவுன் பஸ்கள் மற்றும் கனரக வாகனங்கள் தேவர் சிலை, தமுக்கம், கோகலே ரோடு, ஐ.ஓ.சி. ரவுண்டானா, புது நத்தம் ரோடு, பாரதி உலா தெரு ரோடு, தாமரைத் தொட்டி சந்திப்பு வழியாக செல்லவேண்டும்.

மேலூர் ரோட்டிற்கு செல்லவேண்டிய பஸ்கள் மற்றும் கனரக வாகனங்கள் தேவர் சிலை, பனகல் ரோடு, அண்ணா பஸ் நிலையம், ஆவின் சந்திப்பு, கே.கே.நகர் ரோடு, கே.கே.நகர் ஆர்ச் வழியாக செல்லவேண்டும். ஊர்க்காவல் படை அலுவலக சந்திப்பில் இருந்து ஐ.ஓ.சி. ரவுண்டானா வரை கோகலே ரோடு ஒரு வழிப்பாதையாக செயல்படும்.

நாளை

நாளை (28-ந்தேதி) அதிகாலை 4 மணியளவில் இருந்து கள்ளழகர் ராமராயர் மண்டபத்திற்கு செல்லும் வரை ஏவி.மேம்பாலம் மற்றும் யானைக்கல் புதுப்பாலம் வழியாக எந்த வாகனமும் செல்ல அனுமதி கிடையாது. மேலும் பக்தர்களின் வசதிக்காக சிம்மக்கல் ரவுண்டானா, கீழவாசல் சந்திப்பு ஆகிய இடங்களில் தற்காலிக பஸ் நிலையம் ஏற்பாடு செய்யப்பட்டுள்ளது.

மேலும் கள்ளழகர் வைகையில் இறங்கும் நிகழ்ச்சியை காண்பதற்காக புது நத்தம் ரோடு, அழகர் கோவில் ரோடு மற்றும் அண்ணாநகர், கே.கே.நகர் பகுதிகளில் இருந்து வரும் முக்கிய பிரமுகர்கள், நகர காவல் துறையால் வழங்கப்பட்ட பச்சை நிற கார் அனுமதி அட்டை வைத்திருப்பவர்கள் பெரியார் சிலை, ஆவின் சந்திப்பு, அண்ணா பஸ் நிலையம், பனகல் சாலை வழியாக ஏ.வி. மேம்பாலத்துக்கு செல்ல அனுமதிக்கப்படும்.

முக்கிய பிரமுகர்கள்

வைகை ஆற்றின் தென்பகுதியில் இருந்து வரும் முக்கிய பிரமுகர்கள்(பச்சை நிற கார் அனுமதி அட்டை வைத்திருப்பவர்கள்) கீழவாசல், கீழ மாரட் வீதி, கீழ வெளிவீதி, அண்ணா சிலை வழியாக ஏ.வி. மேம்பாலத்துக்கு செல்ல அனுமதிக்கப்படும்.

புது நத்தம் ரோடு, அழகர்கோவில் ரோடு, மேலூர் ரோட்டில் இருந்து கீழவாசல், சிம்மக்கல் மார்க்கமாக செல்லவேண்டிய மாநகர டவுன் பஸ்கள், கனரக வாகனங்கள் ரேஸ் கோர்ஸ் ரோடு- நத்தம் ரோடு சந்திப்பு, பாண்டியன் ஓட்டல் சந்திப்பு, பெரியார் சிலை சந்திப்பு, கோர்ட்டு, கே.கே.நகர் ஆர்ச், கே.கே.நகர் ரோடு, ஆவின்சந்திப்பு, அவிந்த் ஆஸ்பத்திரி சந்திப்பு, குருவிக்காரன் பாலம், காமராஜர் சாலை, முனிச்சாலை சந்திப்பு, பழைய குயவர்பாளையம் ரோடு, செயின்ட் மேரிஸ் சந்திப்பு, தெற்குவெளி வீதி வழியாக செல்லவேண்டும்.

எல்.ஐ.சி. சந்திப்பு

பெரியார் பஸ் நிலையத்தில் இருந்து புது நத்தம் ரோடு, அழகர்கோவில் ரோடு, மேலூர் ரோட்டுக்கு செல்லவேண்டிய வாகனங்கள் அனைத்தும் கட்டபொம்மன் சிலை தெற்கு மாரட் வீதி, செயின்ட் மேரிஸ் சந்திப்பு, பழைய குயவர்பாளையம் ரோடு, முனிச்சாலை சந்திப்பு, காமராஜர் சாலை, குருவிக்காரன் சாலை பாலம், அரவிந்த் ஆஸ்பத்திரி சந்திப்பு, ஆவின் சந்திப்பு, கே.கே.நகர்ரோடு, கே.கே.நகர் ஆர்ச் ரவுண்டானா-புதுநத்தம் ரோட்டுக்கு செல்லவேண்டும்.

தத்தனேரி ரோட்டிலிருந்து புது நத்தம் ரோடு, அழகர்கோவில் ரோடு மற்றும் மேலூர் ரோட்டுக்கு செல்ல வேண்டிய வாகனங்கள் அனைத்து எல்.ஐ.சி. சந்திப்பு, குலமங்களம் ரோடு, செல்லூர் 60 அடி ரோடு, பி.டி. ராஜன் ரோடு வழியாக செல்லவேண்டும். மேற்கண்ட தகவலை மாநகர போக்குவரத்து போலீஸ் தெரிவித்துள்ளது.