காலாவதி மளிகைப் பொருட்கள் விற்பனை : கலங்கடிக்கும் அடுத்த 'பகீர்'

காலாவதி மருந்து பொருட்கள் விவகாரம் நாட்டையே உலுக்கி கொண்டிருக்கும் வேளையில் காலாவதி மளிகைப் பொருட்களின் விற்பனை தமிழகம் முழுவதும் கனஜோராக நடைபெற்று வருவதாக அடுத்த, 'பகீர்' புகார் எழுந்துள்ளது.

ஒவ்வொரு காலகட்டத்திலும் புதுப்புது பிரச்னைகள் வெளியில் தெரிந்து அதன் மூலம் நாடு முழுவதும் பெரும் பரபரப்பு ஏற்படுவது வழக்கம். அந்த வகையில், தற்போது கண்டுபிடிக்கப்பட்டுள்ள காலாவதி, போலி மருந்து பொருட்கள் விற்பனை நாடு முழுவதும் பெரும் பரபரப்பை ஏற்படுத்தி உள்ளது.பலசரக்கு மளிகை கடைகள், டிபார்ட்மென்ட் ஸ்டோர்கள் தமிழகம் முழுவதும் பரவலாக காணப்படுகிறது.

சென்னையில் ஒரு சிறிய கடை வைக்க வேண்டும் என்றாலே பல லட்ச ரூபாய் செலவழிக்க வேண்டியுள்ளது. டிபார்ட்மென்ட் ஸ்டோர் அமைக்க வேண்டுமென்றால் அதற்கு லட்சக்கணக்கான ரூபாய் வாடகையாகவே தர வேண்டியுள்ளது.

அதற்கு மேல் ஊழியர்களின் ஊதியம், மின் கட்டணம், மளிகை பொருட்களுக்கான முதலீடு, அரசியல்வாதிகள், போலீசார், ரவுடிகள், அதிகாரிகளுக்கு மாமூல் என கணக்கில் காட்ட முடியாத பல்வேறு கூடுதல் செலவுகள் உள்ளன. காலாவதியான, தரமற்ற பொருட்கள் அனைத்தையும் ஏஜன்சிகள், வினியோகஸ்தர்கள் முழுமையாக எடுத்துக் கொள்வதில்லை. இதனால், போட்ட பணத்தை எடுப்பதற்கும், அதிக லாபம் சம்பாதிப்பதற்கும் பெரும்பாலான வியாபாரிகள் குறுக்கு வழியில் திட்டமிடுகின்றனர். பொருளின் விலை உயர்ந்தால், பழைய விலையை மறைத்து புதிய விலையின் லேபிளை ஒட்டுவது; காலாவதி பொருட்களின் விற்பனையை மறைக்கும் விதத்தில் அதன் மேல் புது தேதியை குறிக்கும் ஸ்டிக்கரை ஒட்டுவது;

மார்க்கெட்டில் நன்றாக விற்பனையாகும் பிரபல பிராண்டுகளின் போலிகளை தெரிந்தே வாங்கி அவற்றை வாடிக்கையாளர்களை ஏமாற்றி அவர்களின் தலையில் கட்டுவது என பல்வேறு விதமான
முறைகேடுகளை கையாண்டு வருகின்றனர். உணவுப் பொருட்கள் காலாவதி ஆகும் தேதியுடன் கூடிய ஸ்டிக்கரை மாற்றி ஒட்டுவதற்கென்றே தனியாக வேலைக்கு ஆட்கள் நியமிக்கப்படுகின்றனர்.

பஸ், ரயில் நிலையங்கள், நெடுஞ்சாலையோர கடைகளில் போலி பிஸ்கட் பாக்கெட்கள், தின்பண்டங்கள், உணவுப்பொருட்கள் அதிகம் விற்கப்படுகின்றன. இதோடு கடைகளில் டீ குடிப்பவர்களுக்கு ஒரு அதிர்ச்சி தகவல் காத்திருக்கிறது.

அது, தமிழகம் முழுவதும் பெரும்பாலான டீக்கடைகளில் கலப்பட டீத்தூள் கொண்டு தான் டீ போடப்படுகிறது. இதற்காக பிரபலடீத்தூள் கம்பெனிகளே, டீக்கடைகளுக்கு என்று தனியே போலியான டீத்தூள்களை விற்பனை செய்து வருகின்றன என்பதை கூறி திகிலடைய வைக்கின்றனர் டீ மாஸ்டர்கள். தரமான டீத்தூள் 100 கிராம் 35 ரூபாய், 40 ரூபாய் கொடுத்து வாங்க
வேண்டும். ஆனால், டீ கடைகளுக்கு அரைகிலோ டீ தூள் 50 ரூபாய்க்கு தருகின்றனர். இதிலிருந்தே, இதன் தரத்தை அறியலாம். அழுகிய பொருட்களைக் கொண்டு உணவு, பழரசம் தயாரித்தல், சுகாதாரமற்ற முறையில் உணவு தயாரித்தல் என கண்ணுக்கு தெரியாத பல முறைகேடுகளும் அரங்கேறி வருகின்றன. இப்படி அனைத்து முறைகேடுகளும் சம்பந்தப்பட்ட அதிகாரிகளுக்கு தெரிந்தாலும் அவற்றை கண்டும் காணாமல் இருந்து வருகின்றனர். இதுகுறித்து அரசு தான் அதிகாரிகளை முடுக்கிவிட்டு நடவடிக்கை எடுக்க வேண்டும் என்பது அனைவரின் எதிர்பார்ப்பாக உள்ளது.

நன்றி : தினமலர்