இந்தியக் குடியரசுத் தலைவர்கள்!

First topic message reminder :

டாக்டர் ராஜேந்திர பிரசாத் (26 ஜனவரி 1950 - 13 மே 1962)

வடக்கு பீகாரில் ஓர் குக்கிராமத்தில் 1884-ம் ஆண்டு டிசம்பர் 3-ம் தேதி பிறந்த டாக்டர் ராஜேந்திர பிரசாத் காந்தியக் கொள்கைகளின் முழுவடிவமாகத் திகழ்ந்தவர். பிரதமர் ஜவஹர்லால் நேரு அவரைப் பற்றி கூறுகையில் பாரதத்தின் அடையாளம் என்றே வர்ணித்தார்.

தமது பள்ளிக் கல்வியை பீகாரில் நிறைவு செய்த டாக்டர் பிரசாத் கொல்கத்தா பிரசிடன்சி கல்லூரியில் சேர்ந்தார். கல்வியில் சிறந்து விளங்கிய அவர் எம்.ஏ முதுகலை பட்டப்படிப்பில் முதலிடமும் முதுகலை சட்டப்படிப்பில் முதலிடமும் பெற்றார்.

1911-ல் தமது வழக்கறிஞர் பணியை கொல்கத்தாவில் துவக்கிய அவர் அகில இந்திய காங்கிரசில் உறுப்பினராக சேர்ந்தார். 1916-ல் பாட்னாவிற்கு இடம்பெயர்ந்த டாக்டர் பிரசாத் அங்கு அமைக்கப்பட்ட பீகார் மற்றும் ஒரிசா மாநிலங்களுக்கான உயர்நீதி மன்றத்தில் வழக்கறிஞராகப் பணியாற்றினார்.

1915-ல் கொல்கத்தாவில் முதன்முதலாக காந்தியடிகளை சந்தித்த டாக்டர் ராஜேந்திர பிரசாத் 1920-ல் விடுதலைப் போராட்டத்தில் தம்மை இணைத்துக் கொண்டார். மும்பையில் நடைபெற்ற இந்திய தேசிய காங்கிரசின் மாநாட்டிற்கு தலைவராகவும் அவர் தேர்ந்தெடுக்கப்பட்டார்.

1937-ல் காங்கிரஸ் அமைச்சரவைகள் பொறுப்பேற்ற போது சர்தார் வல்லபாய் படேல், ராஜேந்திர பிரசாத், மௌலான ஆசாத் ஆகியோரைக் கொண்ட நாடாளுமன்றக் குழு இந்த அமைச்சரவைகளுக்கு தேவையான வழிகாட்டுதலையும் அறிவுரைகளையும் வழங்கிவந்தது. 1939-ல் நேதாஜி சுபாஷ் சந்திர போஸ் காங்கிரஸ் தலைமைப் பொறுப்பில் இருந்து விலக நேரிட்டபோது ராஜேந்திர பிரசாத் அந்த நெருக்கடியை வெற்றிகரமாக சமாளித்தார்.

அரசியல் சாசன நிர்ணய சபையின் தலைவராகவும், உணவு மற்றும் வேளாண் அமைச்சராகவும் பணியாற்றி பெருமை சேர்த்த டாக்டர் ராஜேந்திர பிரசாத் இந்தியா குடியரசாக தம்மை அறிவித்துக் கொண்ட நாளில் நாட்டின் முதலாவது குடியரசுத் தலைவராக பொறுப்பேற்றார்.

சுதந்திர இந்தியாவின் இளம் பருவ நாட்களில் அதனை வழிநடத்திய பெருமை டாக்டர் பிரசாத்தையே சேரும். 1962-ம் ஆண்டு தமது குடியரசுத் தலைவர் பணியை நிறைவு செய்த டாக்டர் ராஜேந்திர பிரசாத் 1963-ம் ஆண்டு பிப்ரவரி 28-ம் தேதி மறைந்தார்.

டாக்டர் ஏ பி ஜே அப்துல் கலாம் (25 ஜூலை 2002 - 24 ஜூலை 2007)

தமிழ்நாட்டின் தொன்மைப் புகழ் பெற்ற ராமேஸ்வரத்தில் 1931-ம் ஆண்டு அக்டோபர் மாதம் 15-ம் தேதி பிறந்த டாக்டர் ஏ பி ஜே அப்துல் கலாம் சென்னை தொழில்நுட்ப கழகத்தில் விமானவியல் பொறியியலில் சிறப்புத் தேர்ச்சி பெற்றவர் ஆவார்.

இந்திய விண்வெளி ஆய்வு நிறுவனத்தில் 20 ஆண்டுகள் பணியாற்றிய டாக்டர் அப்துல் கலாம் ராக்கெட் தொழில்நுட்பங்களில் ஆழ்ந்த அனுபவம் கொண்டவர் ஆவார். நாட்டின் முதலாவது உள்நாட்டிலேயே தயாரிக்கப்பட்ட செயற்கைகோள் செலுத்து வாகனமான எஸ்எல்வி-3ன் திட்ட இயக்குனராக இவர் ஆற்றிய பணி ரோகிணி செயற்கைகோளை 1980-ல் விண்வெளியில் செலுத்த உதவியதன் மூலம் உலகப் புகழை இந்தியாவிற்கு ஈட்டித்தந்தது.

இந்திய விண்வெளி ஆய்வு நிறுவனப் பணியைத் தொடர்ந்து பாதுகாப்பு அமைச்சகத்தின் பாதுகாப்பு ஆய்வு மற்றும் அபிவிருத்தி நிறுவனத்தில் பொறுப்பேற்ற டாக்டர் அப்துல் கலாம் உள்நாட்டிலேயே ஏவுகணைகளை உருவாக்கும் பணியை மேற்கொண்டார். அக்னி மற்றும் பிருதிவி ரக ஏவுகணைகளை உள்நாட்டிலேயே வடிவமைத்து வெற்றிகரமாக செயல்படுத்திய பெருமை அவரையே சேரும்.

பாதுகாப்பு அமைச்சரின் அறிவியல் ஆலோசராகவும், பாதுகாப்பு ஆய்வு மற்றும் அபிவிருத்தி துறையின் செயலாளராகவும் பணியாற்றிய டாக்டர் அப்துல் கலாம் நாட்டின் பாதுகாப்பு முக்கியத்துவம் வாய்ந்த ஏவுகணைகளுக்கு உகந்த ஆயுத கட்டமைப்பை உருவாக்கினார். பொக்ரானில் நடைபெற்ற இரண்டாவது அணுஆயுத பரிசோதனையிலும் அவர் முக்கிய பங்கு வகித்தார். நாட்டின் பாதுகாப்பு கட்டமைப்பை தற்சார்புடையதாக மாற்றியமைத்த பெருமை டாக்டா அப்துல் கலாமையே சேரும்.

இலகுரக விமானத்திலிருந்து பல்வேறுபட்ட அதிநவீன தொழில்நுட்பம் வாய்ந்த ஏவுகணைகள் வரை டாக்டர் அப்துல் கலாமின் பங்கு குறிப்பிடத்தக்கதாகும்.

இந்தியாவின் 2020-ம் ஆண்டுக்கான தொழில்நுட்ப இயக்கத்தை வடிவமைத்த அறிவியல் அறிஞர் குழுவிற்கு டாக்டர் அப்துல் கலாம் தலைமை வகித்தார். 1999 முதல் 2001 வரை காபினெட் அமைச்சர் தகுதியில் இந்திய அரசின் தலைமை அறிவியல் ஆலோசராகவும் அவர் பணியாற்றினார்.

சென்னையில் உள்ள அண்ணா பல்கலைக் கழகத்தில் தொழில்நுட்பம் மற்றும் சமுதாய மறுமலர்ச்சி துறையில் பேராசிரியர் பணியையும் ஆர்வத்துடன் டாக்டர் அப்துல் கலாம் மேற்கொண்டிருந்தார். நாட்டின் இளைய தலைமுறையினரின் உள்ளங்களில் உத்வேகத்தை உருவாக்கி தேச வளர்ச்சியில் அவர்களை ஒருமுகப் படுத்தும் தமது கனவை தொடர்ந்து செயல்படுத்தி வரும் பணியை அவர் மேற்கொண்டுள்ளார்.

பத்மபூஷன், பத்மவிபூஷன் மற்றும் நாட்டின் மிக உயர்ந்த விருதான பாரத ரத்னா ஆகிய விருதுகள் டாக்டர் அப்துல் கலாமிற்கு வழங்கப்பட்டு பெருமை பெற்றன. இந்தியாவின் 11-வது குடியரசுத் தலைவராக 2002-ம் ஆண்டு ஜூலை 25-ம் தேதி பொறுப்பேற்றுள்ள டாக்டர் அப்துல் கலாம் 2020-க்குள் இந்தியாவை வளர்ந்த நாடாக மாற்றியமைக்க உறுதிபூண்டுள்ளார்.

டாக்டர் அப்துல் கலாம் எழுதியுள்ள பல்வேறு புத்தகங்கள் இளைஞர்களையும் மாணவர்களையும் பெரிதும் கவர்ந்து பல்வேறு மொழிகளில் மொழி பெயர்ப்பு செய்யப்பட்டு அவரது கனவை நனவாக்க பயன்பட்டு வருகின்றன.

அருமையான தொகுப்பு.இந்தியக் குடியரசு தலைவர்கள் பற்றிய
தகவல்.நன்றி தல....பிறப்பு, இறப்பு ,நடப்பு என காலச்சுவடுகளாய்
இருப்பது அருமை...