பங்கு சார்ந்த ஆயுள் காப்பீடு தொடர்பான பிரச்சினைக்கு தற்காலிக தீர்வு

மத்திய நிதி அமைச்சகம் தலையிட்டதால் யூலிப் விற்பனை தொடர்பான பிரச்சினைக்கு தற்காலிக தீர்வு ஏற்பட்டுள்ளது.

யூலிப் என்று அழைக்கப்படும் பங்கு சார்ந்த ஆயுள் காப்பீட்டுத் திட்டங்களை கட்டுப்படுத்துவது தொடர்பாக, பங்குச் சந்தை கட்டுப்பாட்டு அமைப்பான செபி மற்றும் காப்பீட்டு ஒழுங்கு முறை மேம்பாட்டு ஆணையம் (இரிடா) இடையே கருத்து மோதல் ஏற்பட்டது.

அதாவது, சென்ற வெள்ளிக்கிழமை அன்று, செபி அமைப்பு, 14 ஆயுள் காப்பீட்டு நிறுவனங்களுக்கு, யூலிப் எனப்படும் பங்கு சார்ந்த காப்பீட்டு பாலிசிகளை விற்பனை செய்ய தடை விதித்தது. இதற்கு இரிடா எதிர்ப்பு தெரிவித்தது.

இதில், மத்திய நிதி அமைச்சகம் தலையிட்டுள்ளதையடுத்து, இப்பிரச்சினைக்கு தற்காலிக தீர்வு ஏற்பட்டுள்ளது. நிதி அமைச்சகம் எடுக்கும் முடிவுக்கு கட்டுப்படுவதாக இரு அமைப்புகளும் தெரிவித்தன.

மத்திய நிதி அமைச்சர் பிரணாப் முகர்ஜி, இரு அமைப்புகளுக்கும் இடையில் சட்டப்பூர்வமாக உடன்பாடு ஏற்படும் வரையில், பழைய நிலையே நீடிக்கும் என்று தெரிவித்தார்.

இதனையடுத்து, யூலிப் பாலிசிகளை விற்பனை செய்ய தடை விதிக்கப்பட்ட 14 ஆயுள் காப்பீட்டு நிறுவனங்களும், அவற்றின் யூலிப் பாலிசிகளை விற்பனை செய்யலாம்.

யூலிப் திட்டத்தில், காப்பீடு மற்றும் முதலீடு என இரண்டு பிரிவுகள் இடம் பெறுகின்றன. இதில், முதலீடு தொடர்பான பிரிவிற்கு தன்னிடம் அனுமதி பெற வேண்டும் என செபி அமைப்பு காப்பீட்டு நிறுவனங்களை கேட்டுக் கொண்டது. இதற்கு நிறுவனங்களிடமிருந்து வந்த பதில் திருப்தி அளிக்காததால், செபி அமைப்பு யூலிப் திட்டங்களை விற்பனை செய்ய தடை விதித்தது.

செபி மற்றும் இரிடா ஆகிய இரண்டு அமைப்புகளும், மத்திய நிதி அமைச்சகத்தின் கட்டுப்பாட்டின் கீழ் செயல்படுகின்றன. இந்நிலையில், நிதி அமைச்சகத்தின் தலையீட்டால், இப்பிரச்சினைக்கு தற்காலிகமாக தீர்வு ஏற்பட்டுள்ளது.

சென்ற நிதி ஆண்டில், ஏப்ரல் முதல் பிப்ரவரி வரையிலான 11 மாத காலத்தில், நாட்டில் உள்ள ஆயுள் காப்பீட்டு நிறுவனங்களின் ஒட்டுமொத்த பிரிமிய வருவாய் ரூ.90,645 கோடியாகும். இதில், யூலிப் பாலிசிகள் (16.70 லட்சம்) விற்பனை வாயிலாக ஈட்டப்பட்ட பிரிமிய வருவாய் ரூ.44,611 கோடியாகும்.

சென்ற 2009ஆம் ஆண்டு ஆகஸ்டு மாதத்தில், பரஸ்பர நிதி திட்டங்களுக்கான நுழைவுக் கட்டணத்தை செபி ரத்து செய்தது. இதனைத் தொடர்ந்து இரிடா யூலிப்கள் மீது வசூலிக்கப்படும் கட்டணங்களுக்கு உச்சவரம்பு நிர்ணயம் செய்தது.

ஏஜியான் ரெலிகார், அவிவா, பஜாஜ் அலையன்ஸ், பார்தி ஏ.எக்ஸ்.ஏ., பிர்லா சன் லைஃப், எச்.டீ.எஃப்.சி. ஸ்டாண்டர்டு, ஐ.சி.ஐ.சி.ஐ. புருடென்சியல், ஐ.என்.ஜி. வைஸ்யா, கோட்டக் மகிந்திரா, மேக்ஸ் நியூயார்க், மெட்லைஃப் இந்தியா, ரிலையன்ஸ் லைஃப், எஸ்.பீ.ஐ. லைஃப் இன்சூரன்ஸ் மற்றும் டாட்டா ஏ.ஐ.ஜி. ஆகிய நிறுவனங்கள் செபி அமைப்பின் தடை உத்தரவால் பாதிப்புக்குள்ளாகும் நிலையில் இருந்தன என்பது குறிப்பிடத்தக்கது

தகவலுக்கு நன்றி அண்னன்

தகவலுக்கு நன்றி தமிழன்