கிர்கிஸ்தானில் கிளர்ச்சி; அதிபர் தப்பியோட்டம் : ஆட்சி எதிரணி வசம்

கிர்கிஸ்தானில் நடந்த திடீர் கிளர்ச்சி காரணமாக, அந்நாட்டின் ஆட்சிப் பொறுப்பு எதிர்க்கட்சிகள் வசம் வந்தது. அதிபர் குர்மான்பெர்க் பாகியேவ், நாட்டைவிட்டுத் தப்பியோடினார்.

பாதுகாப்புப் படையினருக்கும், எதிர்க்கட்சியினருக்கும் இடையே நடந்த மோதலில் 68 பேர் கொல்லப்பட்டனர்.

சோவியத் யூனியனிலிருந்து பிரிந்த நாடுகளில் கிர்கிஸ்தானும் ஒன்று. ரஷ்யா, அமெரிக்கா ஆகிய நாடுகளின் இராணுவ தளங்கள் இங்குள்ளன. கடந்த 2005இல் அதிபராக இருந்த அஸ்கர் அகாயேவ் என்பவருக்கு எதிராக, எதிர்க்கட்சியினர் கிளர்ச்சி நடத்தினர்.

எதிர்க்கட்சியைச் சேர்ந்த குர்மான்பெர்க் பாகியேவ் அதிபராக பொறுப் பேற்றார். இந்தக் கிளர்ச்சியை ஏற்படுத்துவதற்கு பாகியேவ்க்கு பெரிதும் உதவியாக இருந்தவர் ரோஜா ஒடுன்பயெவா என்ற பெண்.

ஆட்சி மாறியதும், இவர் வெளியுறவு அமைச்சராக சில காலம் பணியாற்றினார். பின், எதிர்க்கட்சியினருடன் சேர்ந்து கொண்டார். கடந்த சில மாதங்களாக, கிர்கிஸ்தானில் ஊழல் நடவடிக்கைகள் அதிகரித்துள்ளதாகவும், விலைவாசி உயர்ந்துள்ளதாகவும் கூறி, எதிர்க்கட்சிகள் சார்பில் தொடர்ந்து போராட்டங்கள் நடத்தப் பட்டன.

நேற்று முன்தினம் நள்ளிரவு, இந்த போராட் டம் கிளர்ச்சியாக மாறியது. தலைநகர் பிஷ்கெக்கில் உள்ள அரசு அலுவலகங்களுக்குள் புகுந்த எதிர்க்கட்சியினர், அங்கிருந்த பொருட்களைச் சூரையாடினர். அவர்களுடன் பொதுமக்களும் சேர்ந்து கொண்டனர்.

அதிபர் மாளிகைக்குள்ளும் புகுந்தனர். அங்குள்ள பொருட்களை தூக்கி வெளியில் வீசி, தீ வைத்தனர். வாகனங்கள் எரிக்கப்பட்டன. பாதுகாப்புப் படையினருக்கும், எதிர்க்கட்சியினருக்கும் இடையே நடந்த மோதல் மற்றும் துப்பாக்கிச் சூட்டில் 68க்கும் மேற்பட்டோர் பலியாயினர்.

இந்த மோதலில் அமைச்சர் ஒருவரும் பலியானதாகத் தகவல்கள் வெளியாகியுள்ளன.

மேலும், 500க்கும் மேற்பட்டோர் காயமடைந்தனர்.கிளர்ச்சியாளர்களின் கை ஓங்கியதை அடுத்து, அதிபர் பாகியேவ், விமானத்தில் ஏறி, அவருக்கு செல்வாக்கு உள்ள ஓஷ் நகருக்கு தப்பி ஓடி விட்டார். இந்த பெரும் கலவரத்துக்கு இடையே, ஆட்சியை கைப்பற்றி விட்டதாக எதிர்க்கட்சியினர் அறிவித்துள்ளனர்.

எதிர்க்கட்சித் தலைவரும், முன்னாள் வெளியுறவு அமைச்சருமான ரோஜா ஒடுன்பயெவா தலைமையில், தற்காலிக அரசு அமைத்துள்ளதாகவும் அவர்கள் அறிவித்தனர்.

இதுகுறித்து ஒடுன்பயெவா, நிருபர்களிடம் தெரிவிக்கையில்,

"பாராளுமன்றம் கலைக்கப்பட்டு விட்டது. அடுத்த தேர்தல் இன்னும் சில மாதங்களில் நடக்கும்" என்றார்.

கிர்கிஸ்தான் தற்காலிக அரசுக்கு, ஆதரவு அளிக்கப்போவதாக ரஷ்யா அறிவித்துள்ளது. அதே நேரத்தில் அங்கு நடந்த கிளர்ச்சிக்கும், தங்களுக்கும் எந்தவித தொடர்பும் இல்லை என்றும் தெரிவித்துள்ளது.