சினிமாவை விட்டு விலகல்! நடிகை பூஜா பரபரப்பு பேட்டி

இனி சினிமாக்களில் நடிக்க மாட்டேன். கல்யாணம் செய்து செட்டிலாகப் போகிறேன் என்று நடிகை பூஜா அறிவித்துள்ளார். ஜே.ஜே. படத்தின் மூலம் அறிமுகமாகி ஏராளமான தமிழ் ரசிகர்களின் கனவுக்கன்னியாக திகழ்பவர் நடிகை பூஜா. தம்பி, நான் கடவுள் உள்ளிட்ட படங்களில் நடித்திருக்கும் பூஜா, இலங்கையை சேர்ந்தவர் என்று கூறப்பட்டாலும், அவரது சொந்த ஊர் கர்நாடக மாநிலம் சிருங்கேரி ஆகும். பூஜாவின் தந்தை கர்நாடகாவை சேர்ந்தவர். தாயார் சந்தியா இலங்கையை சேர்ந்தவர். இலங்கையில் தாத்தா - பாட்டி வசித்து வருவதால் பெரும்பாலான நாட்கள் பூஜா இலங்கையில் வசித்து வந்தார். ஒருசில சிங்கள படங்களிலும் நடித்திருக்கிறார்.

நான் கடவுள் படத்திற்கு பிறகு அடுத்த படங்களில் கமிட் ஆகாமல் இருந்த பூஜா, சினிமாவை விட்டு விலகுவதாக அதிரடியாக அறிவித்துள்ளார். அவரது இந்த அறிவிப்பு ரசிகர்களை பெரிதும் கவலைக்குள்ளாக்கி இருக்கிறது.

இந்த திடீர் முடிவு குறித்து நடிகை பூஜா அளித்துள்ள பேட்டி வருமாறு:-

2004ம் ஆண்டு சினிமாவுக்கு வந்தேன். எனக்கு நிறைய பட வாய்ப்புகள் வந்தாலும், எல்லாவற்றையும் ஏற்றுக் கொள்ளாமல் குறிப்பிட்ட படங்களில் மட்டுமே நடித்து வந்தேன். இந்த 6 வருடங்களில் 10 படங்களில் மட்டுமே நடித்திருக்கிறேன். தமிழில் கடைசியாக நடித்த நான் கடவுள் படம் எனக்கு நல்ல பெயரை பெற்றுத் தந்தது. இதுற்காக எல்லோருக்கும் நன்றி தெரிவித்துக் கொள்கிறேன். சிங்களத்தில் நடித்து முடித்திருக்கும் கலந்ததனுனா ஜீவிதே படம் அடுத்த மாதம் திரைக்கு வரவிருக்கிறது. இதுதான் நான் நடித்த கடைசி படமாக இருக்கும். இனிமேல் சினிமாவில் நடிக்கப் போவதில்லை என்று முடிவு எடுத்திருக்கிறேன்.

நான் ஆரம்பத்தில் சினிமாவில் நடிக்க ஆசைப்பட்டபோது, என் அப்பாவுக்கு அதில் விருப்பம் இல்லை. ஆனால் என் ஆசைக்கு குறுக்கே நிற்காமல் நடிப்பதற்கு அனுமதித்தார். சமீபகாலமாக அப்பாவை சந்திக்கும் உறவினர்கள் எல்லாரும், பூஜாவை இன்னும் எவ்வளவு நாளைக்கு நடிக்க வைக்கப் போகிறாய்? அவளுக்கு என்று ஒரு குடும்ப வாழ்க்கையை ஏற்படுத்திக் கொடுக்க வேண்டாமா? என் கேட்கிறார்கள். இதனால், நீ நடித்தது போதும்னு அப்பாவும், அம்மாவும் என்னிடம் கேட்டுக் கொண்டனர். அவர்களின் மனதை நான் கஷ்டப்படுத்த விரும்பவில்லை. அதனால் சினிமாவை விட்டு விலக முடிவு எடுத்திருக்கிறேன்.

நான் திருமணம் செய்து கொண்டு குடும்படம் நடத்த வேண்டும் என்று அப்பாவும் அம்மாவும் விரும்புகிறார்கள். அவர்களின் ஆசையை நிறைவேற்றுவது ஒரு மகள் என்ற முறையின் என் கடமையாக நினைக்கிறேன். எப்போது என்பதை இன்னமும் முடிவு செய்யவில்லை. அது நடக்கும்போது நடக்கட்டும். எனக்கு வரப்போகிறவர் என்னிடம் அன்பாக இருந்தால் போதும். வருங்கால கணவர் குறித்து எனக்கு பெரிய கனவுகள் எதுவும் இல்லை. ஓரளவு எனக் பொருத்தமாக இருந்தால் போதும். அவருடைய நிறம் பற்றியெல்லாம் கவலை இல்லை. சிகரெட் புகைப்பதும், குடிப்பதும் எனக்கு பிடிக்காது. அந்த பழக்கங்கள் இல்லாதவராக இருந்தால் போதும்.

இலங்கையில் இருக்கும் எனது தாத்தாவுக்கு 95 வயதாகிறது. பாட்டிக்கு 90 வயது. கடைசி காலத்தில் அவர்கள் மீது அன்பை முழுமையாக செலுத்தப் போகிறேன். இலங்கையில் தங்கியிருந்து தாத்தா - பாட்டியை கவனித்துக் கொள்வதுதான் எனது இப்போதைய முழுநேர வேலை.

இவ்வாறு நடிகை பூஜா கூறினார்.

நடிகை பூஜா இதுவரை நடித்துள்ள தமிழ் படங்கள் :

* ஜே ஜே
* அட்டகாசம்
* உள்ளம் கேட்குமே
* ஜித்தன்
* பட்டியல்
* தம்பி
* தகப்பன்சாமி
* பொறி
* ஓரம் போ
* நான் கடவுள்