மூணாறு ரோட்டில் வாகனங்களை துரத்திய யானை

உடுமலை- மூணாறு ரோட்டில் வாகனங்களை துரத்திய யானை : ஒரு மணி நேரம் போக்குவரத்து பாதிப்பு



உடுமலை - மூணாறு ரோட்டில் இடையூறு ஏற்படுத்திய வாகனங்களை, யானை துரத்திச் சென்றதால் பரபரப்பு ஏற்பட்டது. இதனால், இந்த வழித்தடத்தில் ஒரு மணி நேரம் போக்குவரத்து பாதிக்கப்பட்டது.

மேற்கு தொடர்ச்சி மலையிலுள்ள வனச்சரக பகுதிகளில் கடும் வறட்சி நிலவுகிறது.
தண்ணீருக்காக வனவிலங்குகள் தொடர்ந்து இடம் பெயர்ந்து வருகின்றன. இதனால்,
நீர் மற்றும் உணவை தேடி அமராவதி வனச்சரக பகுதிகளுக்கு, கடந்த சில நாட்களாக
அதிகளவு வன விலங்குகள் வருகின்றன. அமராவதி அணையின் வறண்ட பகுதியில்
காணப்படும் புல் வகைகளுக்காகவும், தண்ணீருக்காகவும் யானை, மான், காட்டெருமை
ஆகியவை அடர்ந்த வனப்பகுதியில் அமைந்துள்ள, உடுமலை - மூணாறு ரோட்டை கடந்து
செல்வது தொடர்கதையாகியுள்ளது.

புங்கன் ஓடை, ஏழுமலையான் கோவில், காமனூத்து உட்பட பல பகுதிகளிலிருந்து மாலை நேரங்களில் நூற்றுக்கணக்கான யானைகள், அமராவதி அணைக்கு செல்கின்றன. அப்போது, மூணாறு ரோட்டில் செல்லும் வாகனங்களால் வன விலங்குகளுக்கு இடையூறு ஏற்படுகிறது. விலங்குகள் விலகி செல்வதற்காக, தடை செய்யப்பட்ட ஏர் ஹாரன்களை வாகன ஓட்டிகள்
பயன்படுத்துகின்றனர்.

இதனால், இயல்பான வழித்தடத்தில் செல்லும் யானைகளின் கவனம், வாகனங்கள் மீது திரும்புகிறது. நேற்று முன்தினம் மாலை புங்கன் ஓடை பாலம் அருகே யானைகள் கூட்டம், ரோட்டை கடக்க முயற்சித்தது. அப்போது, அவ்வழியே கேரளாவிலிருந்து வந்த வாகனத்திலிருந்து அதிக சத்தமுள்ள ஏர் ஹாரன் ஒலிக்கப்பட்டதோடு, அச்சுறுத்தும் வகையில் வாகனத்திலிருந்தவர்கள் சத்தமிட்டனர். இதனால் அச்சமடைந்த காட்டு யானைகள், வனத்திற்குள் சிதறி ஓடின.

முன்னால் வந்த பெரிய யானை ஒன்று, திடீரென வாகனங்களை துரத்த துவங்கியது. இதனால், அவ்வழியே வாகனங்களில் வந்தவர்கள் அதிர்ச்சியடைந்து, இரு புறமும் வாகனங்களை வேகமாக பின்னால் எடுத்துச் சென்றனர். இருப்பினும், ஆவேசமடைந்த யானை வனப்பகுதிக்குள் செல்லாமல், ஒரு மணி நேரத்திற்கும் மேலாக ரோட்டில் நின்றது.
இதனால், மூணாறு ரோட்டில் போக்குவரத்து தடைபட்டது.

இது குறித்து வனத்துறை அதிகாரிகள் கூறியதாவது: அமராவதி வனச்சரக பகுதியிலிருந்து மூணாறு ரோடு வழியாக கடந்து செல்லும் விலங்குகளின் எண்ணிக்கை அதிகரித்துள்ளது. இது குறித்து அறிவிப்பு பலகைகளும் வைக்கப்பட்டுள்ளது. மாலை நேரங்களில்
வனத்துறையினர் பாதுகாப்பு பணியில் ஈடுபடுத்தப்பட்டுள்ளனர். வாகன ஓட்டிகள்
குறித்த வேகத்தில் செல்லவும், விலங்குகளுக்கு இடையூறு ஏற்படுத்தாமல் இருக்க
வேண்டும். வாகனங்களிலிருந்து பொதுமக்கள் இறங்கக்கூடாது என எச்சரிக்கப்படுகிறது' என்றனர்.


நன்றி : தினமலர்