மாணிக்கவாசகம்: பதவி துறக்கப்போவதில்லை

* கடும் நடவடிக்கை எடுக்காவிடில் பதவி துறக்கப்போவதாக மருட்டல்
* விரைவில் புலன்விசாரணை முடிவுகள் அறிவிக்கப்படும்

சிலாங்கூர் கெஅடிலான் கட்சித் தலைவர் எஸ். மாணிக்கவாசகம், கட்சியின் மாநில துணை தொடர்பு தலைவர் என்ற முறையில் தமது பதவியை துறக்கப்போவதில்லை என்று அவரது அரசியல் செயலாளர் எம். சண்முகம் இன்று கூறியுள்ளார்.

அம்பாங் இந்து கோவில் உடைபடுவதற்குப் பொறுப்பானவருக்கு எதிராக கடும் நடவடிக்கை எடுக்கப்படாவிடில் தாம் பதவி விலகப்போவதாக இதற்கு முன்னர் மருட்டிய அந்த காப்பார் நாடாளுமன்ற உறுப்பினருடன் தொடர்பு கொள்ளமுடியவில்லை.

தமது கைதொலைபேசியை துண்டித்துள்ளதால், அவருடன் தொடர்பு கொள்ளும் முயற்சிகள் பலனளிக்கவில்லை.

இந்த விவகாரம் தொடர்பில், நேற்று மாநில அரசாங்கம், அம்பாங் ஜெயா நகராண்மைக் கழக துணைத் தலைவர் ஹமிட் ஹூசேனுக்கு எதிராக ஒரு வார இடைநீக்கத்தை விதித்தது.

“அந்த நடவடிக்கையை தொடர்ந்து மாணிக்கவாசகம் சிலாங்கூர், கெஅடிலான் துணை தொடர்புத் தலைவர் என்ற முறையில் தமது பதவியை தக்க வைத்துக் கொள்வார்,” என்று சண்முகம் கூறினார்.

அந்த கோவில் உடைப்பு விவகாரம் மீதான புலன் விசாரணைகள் மேற்கொள்ளப்படும்வரை, ஹமிட் இடைநீக்கம் செய்யப்பட்டிருப்பாரென மாநில அரசாங்க ஆராய்ச்சி மற்றும் ஆய்வுக்குழுத் தலைவர் ரோனி லியு கூறியுள்ளதாக த ஸ்டார் பத்திரிகை இன்று தகவல் வெளியிட்டது.

இரண்டு வாரங்களுக்கு முன்னர், கம்போங் தாசேக் தம்பஹானில் உள்ள 19ஆண்டு பழமைவாய்ந்த அந்த கோவிலை உடைக்கும்படி ஹமிட் அதிகாரிகளுக்கு ஆணையிட்டதாக கூறப்படுகிறது.

தெரெசா கொக், டாக்டர் சேவியர் ஜெயக்குமார், ரோனி லியு ஆகியோர் இடம் பெற்றுள்ள முஸ்லீம் அல்லாதவர்களின் சமய விவகாரங்கள் மீதான மாநிலத்தின் மூவரடங்கிய குழு, தனது புலன்விசாரணைகளை தொடக்கியுள்ளதாக அந்த பத்திரிகை தகவல் மேலும் கூறியது.

முடிவுகள் வரும் திங்கட்கிழமைக்குள் வெளியிடப்படும் என்று எதிர்பார்க்கப்படுகிறது.