இன்றிரவு 8.30 - 9.30 மணி வரை மின் விளக்குகள் அணையுமா?

**இளமாறன்** · **இளமாறன்** Sat Mar 27, 2010 7:43 pm

இன்றிரவு 8.30 - 9.30 மணி வரை மின்
விளக்குகள் அணையுமா?

சென்னை:மின்சார சிக்கனம் குறித்து அனைவருக்கும்
விழிப்புணர்வு ஏற்படுத்தும் வகையில் இன்று இரவு 8.30 மணியிலிருந்து 9.30 மணி வரை
வீட்டில் தேவையில்லா பல்புகள், 'ஏசி' மிஷின் மற்றும் மின்சாரத்தால் இயங்கும்
சாதனங்களை நிறுத்தி வைக்க வேண்டும்,'' என்று தமிழ்நாடு மின்சார வாரியத் தலைவர்
சி.பி.சிங், பொதுமக்களுக்கு வேண்டுகோள் விடுத்துள்ளார்.

இது குறித்து சென்னையில் நிருபர்கள் சந்திப்பில்
சி.பி.சிங் கூறியதாவது: விழாக்களுக்கு அனுமதி பெறாமல் மின்சாரம் எடுக்கக் கூடாது
என்று கட்டுப்பாடு போடப்பட்டிருந்தாலும் சில இடங்களில் தவறு நடந்து
வருகிறது.தமிழகத்தில் மின்சார தட்டுப்பாட்டை போக்க, ஒரு யூனிட் மின்சாரம் ஐந்து
ரூபாய்க்கு வெளிமாநிலங்களிலிருந்து வாங்கப்பட்டு வந்தது. விலை எட்டு ரூபாய் வரை
உயர்ந்துள்ளது.

விலை அதிகமென்றாலும் இங்கு மின்சார தட்டுப்பாட்டை
தவிர்க்க, தேவையான மின்சாரம் வெளிமாநிலங்களிலிருந்து வாங்கலாம் என்றும் அரசு
தெரிவித்துள்ளது.தினசரி 1,100 மெகாவாட் மின்சாரம் வெளி மாநிலங்களிலிருந்து
வாங்கப்படுகிறது. இதை 1,500 மெகாவாட்டாக உயர்த்தி வாங்கினால் மின்தடை இருக்காது.
ஆனால், போதுமான மின்சாரம் வெளிமாநிலங்களிலிருந்து கிடைக்கவில்லை.

மின்சாரம் பயன்படுத்துவதில் சிக்கனம் குறித்த
விழிப்புணர்வை ஏற்படுத்தும் விதமாக உலகம் முழுவதும் இன்று இரவு 8.30 மணிலிருந்து
9.30 மணி வரை வீடுகளில் தேவையில்லா பல்புகள், மின்சார சாதனங்களை நிறுத்தி வைக்க
பொதுமக்களுக்கு வேண்டுகோள் விடுக்கப்பட்டுள்ளது.விழிப்புணர்வு பிரசாரத்தில் பள்ளி,
கல்லூரி மாணவர்களும் ஈடுபட்டுள்ளனர்.

மக்கள் மின்சார சிக்கனம் கருதி இரவு 8.30 மணியிலிருந்து
9.30 மணி வரை தேவையில்லாத மின்சார பல்புகள், 'ஏசி' மிஷின்கள், மின்சார உபகரணங்களை
அணைத்து வைக்க வேண்டும்.கடந்த ஆண்டு இந்தியாவில் நடத்தப்பட்ட இந்த விழிப்புணர்வு
நாளில் மும்பையில் 600 மெகாவாட் மின்சாரமும், டில்லியில் 700 மெகாவாட் மின்சாரமும்
சேமிக்கப்பட்டது. இந்த ஆண்டு இன்று தமிழகம் முழுவதும் விழிப்புணர்வு நடவடிக்கையை
பொதுமக்கள் பின்பற்றினால் 80 மெகாவாட் மின்சாரம் சேமிக்கப்படலாம் என்று
எதிர்பார்க்கிறோம்.இவ்வாறு சி.பி.சிங் தெரிவித்தார்.

தமிழக எரிசக்தி மற்றும் தகவல் தொழில் நுட்பத்துறை
செயலர் தேவிதார் பேசும் போது,மின்சார தேவை அதிகரித்து வருகிறது. மின்சார சேமிப்பை
வலியுறுத்தி கடந்த 2007ம் ஆண்டு ஆஸ்திரேலியாவில் விழிப்புணர்வு நடவடிக்கை
மேற்கொள்ளப் பட்டது. ''கடந்த ஆண்டு உலகம் முழுவதும் 6,000 நகரங்களில் இந்த
விழிப்புணர்வு நடவடிக்கை மேற்கொள்ளப்பட்டது. பொதுமக்கள், மின்சாரத்தை
பயன்படுத்துவதில் விழிப்புணர்வு மூலம் மின்சாரத்தை சேமிக்க வாய்ப்புள்ளது,''
என்றார்.

**Aathira** · **Aathira** Sat Mar 27, 2010 8:48 pm

நல்ல தகவல். எங்களுக்கு காலையில் இருந்தே மின்சாரம் இல்லை இளா. மாலை 5. 30 க்குத்தான் வந்தது.
இன்றிரவு 8.30 - 9.30 மணி வரை மின் விளக்குகள் அணையுமா? 678642