திருமண பத்திரிகையில் அரசு சின்னம்: காங்., பிரமுகரின் அத்துமீறல்

திருமண பத்திரிகையில் அரசு சின்னம்:
காங்., பிரமுகரின் அத்துமீறல்












திருச்சி : தனது மகள் திருமண பத்திரிகையில், இந்திய
அரசின் சின்னத்தை அச்சிட்ட காங்கிரஸ் பிரமுகர் மீது நடவடிக்கை எடுக்கவேண்டும் என
கோரிக்கை எழுந்துள்ளது.

திருச்சியைச் சேர்ந்த காங்கிரஸ் பிரமுகர் சுப.சோமு,
தேசிய பிற்படுத்தப்பட்டோர் நல ஆணையத்தின் உறுப்பினராக உள்ளார். இவருடைய மகள்
திருமணம், திருச்சியில் நேற்று நடந்தது. கடந்த ஒரு மாதத்துக்கு முன்பிருந்தே,
திருமண பத்திரிகையை உறவினர்கள் மற்றும் நண்பர்களுக்கு வினியோகம் செய்து வந்தார்.
பத்திரிகையில், அசோக சக்கரத்துடன் கூடிய தேசியச் சின்னம் அச்சிடப்பட்டிருந்தது.
அரசின் காரியங்களுக்கு மட்டும் பயன்படுத்தப்படும் தேசியச் சின்னம், திருமண
பத்திரிகையில் அச்சிடப்பட்டிருந்ததால், அதைப் பார்த்தவர்கள்
அதிர்ச்சியடைந்தனர்.

தமிழகம், புதுச்சேரி, மகாராஷ்டிரா மாநில கவர்னர்களும்,
மத்திய சட்டத்துறை அமைச்சர் வீரப்ப மொய்லியும் திருமண விழாவில் பங்கேற்கின்றனர்
என்று அச்சிடப்பட்டிருந்தது. காங்கிரஸ் பிரமுகரான சுப.சோமு தனது காரில் சைரன்
மற்றும் தேசியக்கொடியுடன் தான் வலம் வருகிறார். இதுவும் விதிமுறை மீறல்.

திருச்சி வக்கீல் அலெக்ஸ் கூறுகையில், 'தனிப்பட்ட
ஒருவரின் வீட்டு பத்திரிகையில் தேசிய சின்னம் இடம்பெற்றிருப்பது சட்ட விரோதமானது.
தேசிய பிற்படுத்தப்பட்டோர் நல ஆணைய உறுப்பினராக இருந்து கொண்டு, சைரன் வைத்த காரில்
தேசியக்கொடி கட்டிச் செல்ல யார் அனுமதி கொடுத்தனர் என்று தெரியவில்லை. தேசிய
சின்னத்தை அவமானப்படுத்தும் வகையில் பத்திரிகையில் அச்சிட்டவர்கள் மீது தக்க
நடவடிக்கை எடுக்கப்பட வேண்டும்' என்றார்.

திருச்சி கலெக்டர் சவுண்டையா கூறுகையில், 'அரசு
சின்னத்தை யாரும் தேவையில்லாமல் பயன்படுத்தக்கூடாது. அதுவும் திருமண பத்திரிகைளில்
எல்லாம் அச்சிடவே கூடாது. சட்டப்படி அது தவறு. அப்படி தவறு செய்திருந்தால் போலீஸ்
மூலம் சட்டப்படி நடவடிக்கை எடுக்கப்படும். அரசு சின்னத்தை பயன்படுத்துவது
கண்டிப்பாக விதிமுறையை மீறும் செயல்தான்' என்றார்.

காங்கிரஸ் பிரமுகரின் இல்ல திருமணம் நடந்த மண்டப
வாசலின் வரவேற்பு தோரணையில் தேசிய சின்னமும், அதன்கீழ் பிரதமர் மன்மோகன் சிங்
படமும் பெரிதாக பொறிக்கப்பட்டிருந்தது. இந்த திருமண விழாவில், காங்கிரஸ் மாநில
தலைவர் தங்கபாலு பங்கேற்றார் என்பது குறிப்பிடத்தக்கது.

ஓ, இதுபோன்று போடக்கூடாதா?