நபி மொழி தொகுப்பு நற்சிந்தனை -கணவனின் உரிமைகள்-11

சபீர் · சபீர் Tue 23 Mar 2010 - 21:56

அறிவிப்பாளர் : இப்னு உமர் (ரலி)
அண்ணல் நபி (ஸல்) அவர்கள் நவின்றார்கள்:
“உங்களில் ஒவ்வொருவரும் பொருப்பாளரும், பாதுகாவலரும் ஆவார். உங்களில் ஒவ்வொருவரும் அவரது கண்காணிப்பின், பொறுப்பின் கீழ் உள்ளவர்களைப் பற்றிக் கேட்கப்படுவார். ஆட்சியாளரும் பொறுப்பாளரே, அவரிடமும் அவரது குடிமக்களைப் பற்றி வினவப்படும். கணவன் தன் வீட்டாருக்குப் பொறுப்பாளியாவான். பெண், தன் கணவனின் வீடு, அவனுடைய குழந்தைகளுக்குப் பொறுப்பாளியாவாள். பணியாள் தன் எஜமானின் பொருளுக்குப் பொறுப்பாளனாவான். உங்களில் ஒவ்வொருவரும் பொறுப்பாளரே! உங்களில் ஒவ்வொருவரிடமும் அவர்களின் பொறுப்பில் ஒப்படைக்கப்பட்டவர்களைப் பற்றிக் கேட்கப்படும். ” (புகாரி, முஸ்லிம்)
விளக்கம் :
பெண் தன் கணவனின் வீடு, அவனுடைய குழந்தைகள் ஆகியோருக்குப் பொறுப்பாறியாவாள் எனும் நபிமொழி வாக்கியம் குறிப்பாக கவனிக்கதக்கதாகும். கணவன் தன் மனைவிக்கு உணவளித்திட மட்டும் பொறுப்பாளியல்லன், அவளது மார்க்க உணர்வையும் ஒழுக்கத்தையும் பாதுகாக்கும் பொறுப்பும் அவனுடையதே என்றும், மனைவியின் பொறுப்பு இரட்டிப்பு மடங்காகும் என்றும் உணர்த்துகின்றது. அவள் கணவனின் வீட்டிற்கும், அவனது பொருளுக்கும் பொறுப்பாளியாக இருக்கிறாள் என்பதும் மட்டுமல்ல, அத்துடன் அவனது குழந்தைகளுக்கு ஒழுக்கப்பயிற்சி அளிக்கும் விசேடப் பொறுப்பும் அவள் மீதுள்ளது. ஏனெனில், கணவன் பொருள் தேடுவதற்காக பெரும்பாலும் வெளியுலகில் இருக்கின்றான். வீட்டில் குழந்தைகளைக் கண்காணித்து வளர்ப்பதும், அவர்களுக்குக் கல்வியும் ஒழுக்கப்பயிற்சியும் அளிப்பதுமான இரட்டைப் பொறுப்பு தாயைச் சார்கின்றது.