கள்ள நோட்டு போலிஸ்...

தினமலர் மார்ச் 21,2010

திருநெல்வேலி: கலர் ஜெராக்ஸ் மெஷின் மூலம் லட்சக்கணக்கில் கள்ளநோட்டு தயாரித்து விநியோகத்தில் விட்ட போலீஸ்காரர் உள்பட மூவர் கைதுசெய்யப்பட்டனர்.கன்னியாகுமரி மாவட்டம் மண்டைக்காடு அருகே உள்ள காட்டுவிளையை சேர்ந்தவர் சேகர்(40). தூத்துக்குடி மாவட்ட ஆயுதப்படை போலீசில் ஏட்டாக பணியாற்றுகிறார். அதே கிராமத்தை சேர்ந்த துரைநாடார் மகன் ஐயப்பன்(40). இவர் மரம் டிசைனிங் தொடர்பான பணிகளை மேற்கொண்டுவருகிறார்.

கெடுத்தது ஜெராக்ஸ் மிஷின் : மரத்தில் செய்த டிசைன்களை ஜெராக்ஸ் எடுக்க வாங்கிய மெஷின் துல்லியமாக செயல்பட்டதை பார்த்து அதை வைத்து ரூபாய் நோட்டுக்களையும் ஜெராக்ஸ் எடுத்து பார்த்தனர். வெள்ளை நிற பாண்ட் பேப்பரில் 100 ரூபாய் தாளையும், லேசான மஞ்சள் நிற தாளில் 500 ரூபாய் நோட்டையும் ஒரேதாளில் இருபுறமும் கலர் ஜெராக்ஸ் எடுத்தனர். பார்ப்பதற்கு ஒரிஜினல் நோட்டுபோலவே தெரிய கொஞ்சம் கசக்கியும், அதன் வெள்ளை பகுதியில் ஏதாவது எண்களை எழுதியும் ஜெராக்ஸ் எடுத்தனர்.

பிராந்தி கடைக்கு புழக்கம் போகும் : அச்சு அசலாக கரன்சி நோட்டுபோலவே இருந்ததால் புழக்கத்தில் விட துவங்கினர். நெல்லை மாவட்டம் பணகுடியை சேர்ந்த நிலபுரோக்கர் ராபர்ட்(35) என்பவர் மூலம் பிராந்திகடை போன்ற சந்தேகம் ஏற்படாத கடைகளில் புழக்கத்தில் விட்டனர்.தினமும் ஆயிரக்கணக்கில் அச்சடித்து புழக்கத்தில் விட்டதால் போலீஸ் வேலைக்கு போக மனமில்லாத சேகர், கடந்த சில மாதங்களாக மெடிக்கல் லீவு போட்டு கள்ளநோட்டு அச்சுப்பணிகளில் தீவிரமாக இறங்கினார். ஐயப்பன், ராபர்ட் ஆகியோரிடமும் பணப்புழக்கம் அதிகரித்தது.

பணகுடி ராபர்ட்டிடம் பணபுழக்கம் அதிகரித்திருப்பது குறித்து ஏற்பட்ட சந்தேகத்தில் பணகுடியை சேர்ந்த ஒருவர், நெல்லை எஸ்.பி.,ஆஸ்ரா கார்க்கிற்கு தகவல் தெரிவித்தார். பணகுடியில் இவரை ரகசியமாக கண்காணித்த போலீசார், பேக்கரி ஒன்றில் இவர் கொடுத்த 100 ரூபாய் நோட்டு கள்ளநோட்டு என்பதை ஊர்ஜிதப்படுத்தி அவரை கைதுசெய்தனர். காட்டுவிளையில் போலீஸ்சேகர் , 60 லட்சம் ரூபாய் மதிப்பில் பங்களா வீடு கட்டியுள்ளார். அங்கு வைத்துதான் தினமும் அச்சடிப்பு பணிகள் நடந்துள்ளது.

அந்த வீட்டில் இருந்து அறுபத்தி ஆறு 500 ரூபாய் நோட்டுக்களையும், நாற்பத்தி ஐந்து 100 ரூபாய் நோட்டுக்களையும் பறிமுதல் செய்தனர். கள்ளநோட்டு தயாரிக்க பயன்படுத்தி எச்பி காப்பியர் மெஷின், மை, காகிதங்கள், கட்டர் ஆகியவற்றையும் பறிமுதல் செய்தனர்.நெல்லை, கன்னியாகுமரி மாவட்டங்களில் கடந்த சில மாதங்களில் இவர்கள் லட்சக்கணக்கில் கள்ளநோட்டுகளை புழக்கத்தில் விட்டிருக்கலாம் என்பதால் அவற்றை மீட்பது போலீஸ், வங்கித்துறையினருக்கு சவாலாக உள்ளது.

வட மாநிலங்களில் தான் கள்ள நோட்டு கும்பல் உலவி வந்தது. அங்கிருந்து தமிழகத்தில் புழக்கத்தில் விட்டு வந்தனர். இது தொடர்பாக வட மாநிலத்தை சேர்ந்தவர்களும் கைது செய்யப்பட்டு வந்தனர். தற்போது தமிழகத்திலும் கள்ள நோட்டு அச்சடிப்பு தொழிலாக மாறிப்போனது போலீசாருக்கு அதிர்ச்சியை ஏற்படுத்தியுள்ளது.