காலாவதி மருந்துகளை புதியதாக பேக்கிங் செய்து மோசடி

அ.பாலா · அ.பாலா Fri Mar 19, 2010 7:58 am

சென்னை: கொடுங்கையூர் குப்பை கிடங்கில் கொட்டப்பட்ட
காலாவதியான மருந்துகளை சேகரித்து புதியதாக 'பேக்கிங்' செய்து, மருந்து கடைகளில்
விற்று மோசடி செய்த ஏழு பேர் கொண்ட கும்பலை, தனிப்படை போலீசார் தேடி
வருகின்றனர்.

பெரம்பூர் மருந்து கட்டுப்பாட்டுத் துறை இன்ஸ்பெக்டர்
இளங்கோ தலைமையில் ஒரு குழுவினர், மருந்து கடைகளில் உள்ள மருந்துகளை ஆய்வு செய்தனர்.
அதில், காலாவதியான மருந்துகளை புதியதாக 'பேக்கிங்' செய்து விற்பனைக்கு
வைத்திருந்தது தெரிந்தது. இது குறித்து, மருந்து கட்டுப்பாட்டுத் துறை அதிகாரிகள்
தீவிர விசாரணை நடத்தினர். இதில், கொடுங்கையூர் குப்பை கிடங்கில் இருந்து காலாவதியான
மருந்துகளை சேகரித்து, அவற்றை ஒரு கும்பல், 'நெட்வொர்க்' அமைத்து விற்பனை செய்தது
தெரிய வந்தது. இது குறித்து மருந்து கட்டுப்பாட்டுத் துறை இன்ஸ்பெக்டர் இளங்கோ,
சென்னை மாநகர போலீஸ் கமிஷனர் ராஜேந்திரனிடம் புகார் செய்தார். இதையடுத்து,
புளியந்தோப்பு துணை கமிஷனர் பாஸ்கரன் மேற்பார்வையில் கொடுங்கையூர் இன்ஸ்பெக்டர்
ராஜேந்திரன் தலைமையில் தனிப்படைகள் அமைக்கப்பட்டு தீவிர விசாரணை நடத்தப்பட்டது.

தனிப்படை போலீசாரின் விசாரணையில் கிடைத்த தகவல்கள்:
காலாவதியான மருந்துகளை கடைகளுக்கு விற்பனை செய்தது கொடுங்கையூர், முத்தமிழ் நகர்,
51வது தெருவைச் சேர்ந்த ரவி என்ற பிரபாகரன்(40). கொடுங்கையூர், எழில் நகரில்
மாநகராட்சிக்குச் சொந்தமான குப்பை கிடங்கு உள்ளது. அங்கு, சென்னை மற்றும் புறநகர்
பகுதிகளில் உள்ள மருந்து தயாரிக்கும், கொள்முதல் நிறுவனங்களில் இருந்து காலாவதியான
மருந்துகளை கொட்டி அழிப்பது வழக்கம். அவற்றை சேகரித்து சுத்தப்படுத்தி, காலாவதியான
தேதிகளை அழித்து, புதிய தேதிகளை அதில் பிரின்ட் செய்து, விற்பனைக்கு ரவி
தயாரித்துள்ளார். அவ்வாறு தயாரிக்கப்பட்ட காலாவதியான மருந்துகளை, தனது நெருங்கிய
நண்பரான மூலக்கடை, சந்துரு பிரபா காலனியைச் சேர்ந்த டிரைவர் வெங்கடேசன் உதவியுடன்
விற்பனை செய்துள்ளார்.

அவர்களிடம் இருந்து பெறப்பட்ட காலாவதியான மருந்துகளை
எழும்பூர், ஆராமுதன் கார்டன் தெருவைச் சேர்ந்த சஞ்சய்குமார்; புரசைவாக்கம்
அஷ்டபுஜம் தெரு கணபதி ஏஜன்சி உரிமையாளர் சேகர்; சூளைமேடு ராகவன் தெருவைச் சேர்ந்த
பாஸ்கரன்; அரும்பாக்கத்தில் டி.எச்., பார்மா நடத்தி வரும் பிரதிப் சோர்த்தியா
மற்றும் சின்மயா நகரில் மீனா 'ஹெல்த் கேர்' நடத்தி வரும் மீனாட்சி சுந்தரம் ஆகியோர்
மூலம் விற்பனை செய்துள்ளனர். இதையடுத்து, அந்த ஏழு பேர் மீதும் போலீசார் வழக்கு
பதிந்து, தனிப்படை போலீசார் தீவிரமாக தேடி வருகின்றனர். காலாவதியான மருந்துகள்,
சென்னை முழுவதும் மருந்து கடைகளுக்கு பரவலாக வினியோகம் செய்யப்பட்டுள்ளதாகக்
கூறப்படுகிறது.

நன்றி தினமலர்