மாயாவதி இனி எங்கு சென்றாலும் பணமாலை மட்டுமே போடப்படும்

மாயாவதி இனி எங்கு சென்றாலும் பணமாலை மட்டுமே போடப்படும்





முதல்வர் மாயாவதிக்கு ரூ. 10 கோடி பண மாலை அணிவிக்கப்பட்ட சர்ச்சை அடங்குவதற்குள், எதிர்க்கட்சிகளின் குற்றச்சாட்டுக்கு பதிலடியாக பகுஜன் சமாஜ் கட்சி சார்பில் மாயாவதிக்கு மீண்டும் ரூ. 18 லட்ச ரூபாய் பண மாலை அணிவிக்கப்பட்டது. மேலும், இனிமேல் மாயாவதி எங்கு சென்றாலும் மாலைக்கு பதிலாக பணமாலையே அணிவிக்கப்படும் என்று பகுஜன் சமாஜ் அறிவித்துள்ளது.

பகுஜன் சமாஜ் கட்சியின் 25ம் ஆண்டு விழாவை முன்னிட்டு லக்னோவில் கடந்த திங்கட்கிழமை கட்சியின் தலைவரும். உ.பி. முதல்வருமான மாயாவதி தலைமையில் மாநாடு நடந்தது. இதில் மாயாவதிக்கு ஆயிரம் ரூபாய் நோட்டுக்களைக் கொண்ட பிரம்மாண்ட பண மாலையை கட்சி நிர்வாகிகள் அணிவித்தனர். இது பெரும் சர்ச்சையை ஏற்படுத்தியது. மாலையில் இருந்தது ரூ.10 கோடி என்று சமாஜ்வாடி கட்சி குற்றம் சாட்டியது.

இது குறித்து சி.பி.ஐ. விசாரிக்க வேண்டும் என்று மக்களவையில் நேற்று முன் காங்கிரஸ், சமாஜ்வாடி கட்சிகள் வலியுறுத்தியதால் அமளி ஏற்பட்டு மக்களவை ஒத்திவைக்கப்பட்டது. ஆனால், மாலையில் இருந்த தொகை ரூ.21 லட்சம்தான் என்றும் தொண்டர்கள் அளித்த பணம் என்றும் பகுஜன் சமாஜ் கட்சி விளக்கம் அளித்தது. வருமான வரித்துறை விசாரணை: சர்ச்சையைத் தொடர்ந்து, மாலை குறித்து வருமானவரித் துறை விசாரணையைத் தொடங்கியுள்ளது. மாலையின் வீடியோ படங்களையும் புகைப்படங்களையும் வருமான வரித் துறை சேகரித்து வருகிறது.

அவசரக் கூட்டம்: எதிர்க்கட்சிகளின் குற்றச்சாட்டு மற்றும் வருமான வரித் துறை விசாரணை ஆகியவற்றைத் தொடர்ந்து இந்த பிரச்னை குறித்து விவாதிக்க பகுஜன் சமாஜ் கட்சியின் உயர்நிலைக் குழுக் கூட்டத்தை லக்னோவில் மாயாவதி நேற்று கூட்டினார். இதில் மாலை தொடர்பாக ஏற்பட்டுள்ள சர்ச்சைகள், விசாரணை ஆகியவை குறித்து ஆலோசிக்கப்பட்டது. மாலை பிரிக்கப்பட்டு அதில் உள்ள பணம் கட்சியின் வங்கிக் கணக்கில் சேர்க்கப்பட்டதாக கட்சி வட்டாரங்கள் தெரிவித்தன.

மீண்டும் பண மாலை: ரூ. 10 கோடி பண மாலை சர்ச்சை இன்னும் முடிவுக்கு வராத நிலையில், இக்கூட்டத்தில் கலந்து கொண்ட மாயாவதிக்கு ரூ.18 லட்சத்தில் ரூ.100, 500, 1000 ரூபாய் நோட்டுக்களைக் கொண்ட மாலை அணிவிக்கப்பட்டது.

இது குறித்து மாநில அமைச்சர் நசிமுதீன் சித்திக் கூறுகையில், "எதிர்க்கட்சிகளின் குற்றச்சாட்டுக்கு பதிலடியாகவே மாயாவதிக்கு மீண்டும் பண மாலை அணிவித்துள்ளோம். இது தொண்டர்களின் பணம். இனி மாயாவதி எங்கு சென்றாலும் அவருக்கு பூமாலைக்கு பதிலாக பண மாலையே அணிவிக்கப்படும். இதில் எந்த தவறும் இல்லை" என்றார். மாயாவதிக்கு மீண்டும் பண மாலை அணிவிக்கப்பட்டு இருப்பது பரபரப்பை ஏற்படுத்தியுள்ளது.

ஏழைப்பங்காளி.