"நமீதாவால் பல கோடி ரூபாய் நஷ்டம்" டைரக்டர் கண்ணீர் பேட்டி

"நமீதாவால் பல கோடி ரூபாய் நஷ்டம்" டைரக்டர் கண்ணீர் பேட்டி




நமீதா கதாநாயகியாக நடித்து, திரு டைரக்ஷனில் சமீபத்தில் திரைக்கு வந்த படம், `அழகான பொண்ணுதான்.' இந்த படத்தில் நமீதா ஒத்துழைப்பு கொடுக்காததால், நினைத்த கதையை படமாக்க முடியவில்லை என்றும், தயாரிப்பாளருக்கு பல கோடி ரூபாய் நஷ்டம் ஏற்பட்டு இருக்கிறது என்றும் டைரக்டர் திரு கூறினார்.

இதுபற்றி டைரக்டர் திரு, சென்னையில் நேற்று நிருபர்களுக்கு பேட்டி அளித்தார். அவர் கூறியதாவது:-

``அழகான பொண்ணுதான் படம் 3 வருடங்களுக்கு முன்பு ஆரம்பிக்கப்பட்டது. அழகான ஒரு பெண்ணை, அழகே இல்லாத ஒரு இளைஞன் ஒருதலையாக காதலிப்பதுதான் கதை. நமீதாவை நேரில் சந்தித்து கதை சொன்னேன். அப்போது அவர் கைவசம் படமே இல்லை. அந்த நிலையில், `அழகான பொண்ணுதான்' படத்தில் நடிக்க உடனே சம்மதித்தார். ஒரு பெரும் தொகை அட்வான்சாக கொடுக்கப்பட்டது.

பூஜை போட்டு 6 மாதங்கள் கழித்து, படப்பிடிப்பை கொடைக்கானலில் தொடங்கினோம். சில நாட்களே நடித்த நமீதா, அப்புறம் படத்தில் நடிக்க மறுத்து, சென்னை திரும்பிவிட்டார்.

இதுபற்றி நான் தயாரிப்பாளர்கள் சங்கத்தில் புகார் செய்தேன். அவர்கள் நமீதாவை அழைத்து விசாரித்தபோது, ``திருவுக்கு டைரக்டு செய்ய தெரியவில்லை'' என்று சொன்னார். உடனே நான் அதுவரை படமான படத்தை திரையிட்டு காண்பித்தேன்.

படத்தை பார்த்த பிறகு, ``திருவை பார்த்தால் எனக்கு பயமாக இருக்கிறது'' என்று நமீதா முன்னுக்குப்பின் முரணாக மாற்றி மாற்றி பேசினார். அப்போதே அவர் படத்தில் இருந்து விலகியிருந்தால், தயாரிப்பாளரின் பணம் காப்பாற்றப்பட்டிருக்கும்.

படப்பிடிப்பை தொடங்கிய பின், நமீதா ஒத்துழைப்பு கொடுக்கவே இல்லை. என்னை ஒரு டைரக்டராக அவர் மதிக்கவே இல்லை. சிரிக்க சொன்னால் கூட சிரிக்க மாட்டார். அவரிடம், பத்து அடி தூரத்தில் நின்றுதான் பேசவேண்டும். ``உங்களுக்கு என்ன பிரச்சினை மேடம்?'' என்று கேட்டேன்.

உடன் நடித்த பையனை பிடிக்கவில்லை என்றார். என் கதையே அழகு இல்லாத பையன், அழகான பெண்ணை காதலிப்பதுதானே என்று விளக்கினேன். அதன்பிறகு ஒருவழியாக சமாதானம் ஆகி நடிக்க ஆரம்பித்தார்.

`அழகான பொண்ணுதான்' படத்துக்காக நமீதாவிடம் மொத்தம் 35 நாட்கள் கால்ஷீட் வாங்கியிருந்தேன். ஆனால், அவர் நடித்தது 25 நாட்கள்தான். அதற்கு மேல் நடிக்க மறுத்து விட்டார். அதனால் நான் நினைத்த கதையை படமாக்க முடியவில்லை.

படத்துக்கு நிஜமாக வேறு ஒரு `கிளைமாக்ஸ்' வைத்திருந்தேன். நமீதா கால்ஷீட் கொடுக்காததால், கிளைமாக்சையே மாற்ற வேண்டியதாகி விட்டது. இரண்டு மணி நேரம் இருபத்தைந்து நிமிடங்கள் ஓட வேண்டிய படம், ஒரு மணி நேரம் ஐம்பத்து எட்டு நிமிடங்களாக படத்தின் நீளம் குறைந்து போனது. இதற்கு நமீதாதான் காரணம். அவரால் தயாரிப்பாளருக்கு பல கோடிகள் நஷ்டம் ஏற்பட்டு இருக்கிறது.

தயாரிப்பாளரரையும், என்னையும் நமீதா காலி செய்து விட்டார். எங்களை அழவைத்து விட்டார்.

அநியாயமாக எங்களை தண்டித்த அவரை, கடவுள் நிச்சயமாக தண்டிப்பார்.''

இவ்வாறு டைரக்டர் திரு கூறினார்.

மச்சான்...........

இவனுங்களுக்கெல்லாம் வேண்டும். தமிழ் தமிழன் என்று பேசுவாங்க ஆனா தமிழ்ப் பெண்களுக்கு வாய்ப்புத்தராமல் சிவப்புத்தோலைத் தேடிச்சென்று அறிமுகப்படுத்திவிட்டு ஒரு படம் நன்றாக ஓடிவிட்டால் அவர்களுடைய காலடியில் வீழ்ந்து கிடப்பார்கள். பின்னர் இதுபோல் கண்ணீர் சிந்துவார்கள். இவர்களுக்கெல்லாம் பரிதாபமேப்படக்கூடாது.