மதுரை - நெல்லை கோயில்களில் சிவனை தரிசிக்கும் சூரியக்கதிர்கள்

**சிவா** · **சிவா** Sun Sep 21, 2008 4:51 am

கட்டட கலையின் சிறப்பை உணர்த்தும் வகையில் சிவன்கோயில்களில் சூரியக்கதிர் நுழையும் காட்சி பிரமிப்பை ஏற்படுத்துகிறது.நெல்லை மாவட்டம் களக்காட்டில் உள்ள சத்தியவாகீஸ்வரர் சமேத கோமதியம்மன் கோயில் 11ம் நூற்றாண்டில் வீரமார்த்தாண்ட மன்னரால் கட்டப்பட்டதாகும். இந்த கோயிலில் உள்பகுதியில் மூலஸ்தான சிவலிங்கத்தின் மீது அதிகாலையில் சூரியன் உதிக்கும் போது சூரிய ஒளிக்கற்றை நேரடியாக லிங்கத்தின் மீது படும் அரியகாட்சி நடந்தது. இன்னும் சில தினங்களுக்கும் அந்த காட்சியை காணலாம். இதே போல சங்கரன்கோவில் சங்கரலிங்கசுவாமி கோயிலிலும் லிங்கத்தின் மீது சூரிய ஒளிக்கற்றை சிறிய வட்டம் போல விழுகிறது. இன்று 21ம் தேதி முதல் 4 நாட்களுக்கு நடக்கிறது.

சூரியனே நேரடியாக சிவலிங்கத்தை தரிசிப்பதாக கூறப்படுகிறது. அறிவியல் பூர்வமாக இந்த சூரிய ஒளி கட்டட கலையின் சிறப்பை உணர்த்துவதாக உள்ளது. சூரியன் வடக்கிலோ தெற்கிலோ திசை மாறாமல் நேராக ஒளிவீசும் போது லிங்கத்தின் மீது படும் வகையில் செப்டம்பர் 21 முதல் சில நாட்களுக்கும் மார்ச் மாதம் 21ம் தேதி முதல் சில நாட்களுக்கும் படும் வகையில் கோயில் கட்டப்பட்டுள்ளது குறிப்பிடத்தக்கது.மேகங்கள் மறைத்தாலோ, வெளிச்சம் குறைவாக இருந்தாலோ இத்தகைய காட்சி காணக்கிடைக்காது. சங்கரன்கோவிலில் இந்த அபூர்வ காட்சியை காண அதிகாலையிலேயே ஏராளமான பக்தர்கள்கோயிலில் கூடுவார்கள். சுவாமி சன்னதிக்கு எதிரே அமைந்துள்ள சூரியனார் சன்னதியில் அப்போது சிறப்பு பூஜைகள் நடத்தப்படுவது குறிப்பிடத்தக்கது.

மதுரை கோயில்: இதேபோல் மதுரை தெப்பக்குளம் முக்தீஸ்வரர் கோயிலில் ஆண்டு தோறும் செப்டம்பர் மாதம் கோபுரத்தில் உள்ள துவாரம் வழியாக சூரியஒளி கோயிலின் உட்புறம் உள்ள நந்தியின் மீதும், மூலவர் சிவன் மீதும் விழும். இந்த அபூர்வ நிகழ்வை 30 ம் தேதி வரை காலை 6 முதல் 6.50 மணி வரை தரிசிக்கலாம்.