ஏர் பிரான்ஸ் விமானம் கடலில் விழுந்து 228 பேர் பலி.!!

ஏர் பிரான்ஸ் விமானம் அட்லாண்டிக் கடலில் விழுந்து 228 பேர் பலி!
பாரிஸ்: 228 பயணிகள் மற்றும் ஊழியர்களுடன் காணாமல் போன ஏர்பிரான்ஸ் விமானம் மின்னல் தாக்கியதால் கட்டுப் பாடிழந்து அட்லாண்டிக் கடலில் நொறுங்கி விழுந்ததாக ஏர் பிரான்ஸ் அறிவித்துள்ளது.
அதில் பயணம் செய்தவர்களில் ஒருவர் கூட உயிர் பிழைக்கவில்லை என அறிவிக்கப்பட்டுள்ளது.

ஞாயிற்றுக்கிழமை காலை 7 மணிக்கு பிரேஸில் தலைநகர் ரியோ டி ஜெனிரோவிலிருந்து 216 பயணிகள் மற்றும் 12 ஊழியர்களுடன் பாரிஸுக்கு கிளம்பியது ஏர் பிரான்ஸ் விமானம். மோசமான வானிலை காரணமாக வழக்கமாகப் புறப்படும் நேரத்தைவிட 4 மணிநேரம் தாமதமாகவே அந்த விமானம் கிளம்பியது.
ஞாயிறு முற்பகல் (பாரீஸ் நேரப்படி) பாரீஸ் விமான நிலையத்தை வந்தடைந்திருக்க வேண்டும். ஆனால் வழியில் அட்லான்டிக் கடல் மீது விமானம் பறந்து கொண்டிருந்தபோது திடீரென ராடார் பார்வையிலிருந்து மறைந்ததோடு, தகவல் தொடர்பும் முற்றாக துண்டிக்கப்பட்டது.
இதையடுத்து பிரேசில் விமானப்படை உடனடியாக தேடுதல் பணிகளில் இறங்கியது.
இந்த நிலையில் பலத்த இடி மற்றும் மின்னல் தாக்கி இந்த விமானத்தின் மின் செயல்பாடுகள் முடக்கப்பட்டதால் அது கட்டுப்பாடிழந்து அட்லாண்டிக் கடலில் விழந்து நொறுங்கிவிட்டதாகவும், அதில் பயணித்த ஒருவர் கூட உயிர் பிழைக்கவில்லை என்றும் ஏர்பிரான்ஸ் அறிவித்துள்ளது.
இத் தகவல் அறிந்ததும் ஏராளமான உறவினர்கள் கண்ணீருடன் பாரிஸின் ரோஸி டி கல்லே விமான நிலையத்தில் அழுத வண்ணம் விபரங்களைக் கேட்டுக் கொண்டிருந்தனர். பலர் விபத்து நடந்த பகுதிக்கு தங்களைக் கூட்டிச் செல்லுமாறு ஏர்பிரான்ஸ் அதிகாரிகளிடம் கெஞ்சினர்.
இன்னமும் விமானம் எந்தப் பகுதியில் விழுந்திருக்கக் கூடும் என்ற விபரங்கள் யாருக்கும் தெரியாததால், தேடல் பணி தொடர்கிறது.
பிரான்ஸின் 75 ஆண்டு கால விமான சேவையில் இதுபோன்ற மிகப் பெரிய விமான விபத்து நிகழ்ந்ததில்லை என்று பிரான்ஸ் அரசு வானொலி அறிவித்துள்ளது.
விபத்துக்குள்ளான விமானத்தைத் தேடும் பணியில் பிரேஸில் நாட்டு விமானப் படையும் தீவிரமாக இறங்கியுள்ளது. கடைசியாக ராடாரில் விமானம் தெரிந்த போது அது 35000 அடி உயரத்தில் பறந்து கொண்டிருந்தது.