இறந்த குழந்தையுடன் இரவு முழுவதும் இளம்பெண் தவிப்பு : போலீஸ் அலட்சியத்தால் அவலம்

திருமங்கலம் : மதுரை, திருமங்கலத்தில்
போலீசின் அலட்சியத்தால் இறந்த குழந்தையுடன் இரவு முழுவதும் ஒரு இளம்பெண்,
மருத்துவமனையில் காத்திருந்தார்.


வத்திராயிருப்பு
இலந்தைக்குளத்தைச் சேர்ந்தவர் பானுமதி (23). இவருக்கும் மதிப்பனூர்
கல்லுப்பட்டியைச் சேர்ந்த ஜோதிமணி (27) என்பவருக்கும் காதல் ஏற்பட்டது.
இதில், பானுமதி கர்ப்பமடைந்தார். இந்நிலையில், ஜோதிமணி -பானுமதியை விட்டு
பிரிந்து சென்றுவிட்டார். ஜோதிமணி தன்னை மானபங்கம் செய்துவிட்டதாக பானுமதி
கொடுத்த புகாரின் பேரில், அவர் மீது வழக்குப் பதிந்து ஜோதிமணியை போலீசார்
கைது செய்தனர். அவர் தற்போது ஜாமீனில் உள்ளார். இந்நிலையில், கடந்த மூன்று
மாதங்களுக்கு முன், பானுமதிக்கு ஆண்குழந்தை பிறந்தது. அந்த குழந்தை நேற்று
முன்தினம் மாலை இறந்துவிட்டது. வழக்கு நிலுவையில் இருப்பதால், இது குறித்து
பானுமதி திருமங்கலம் மகளிர் போலீசுக்கு தகவல் தெரிவித்தார். ஆனால்,
போலீசார் அலட்சியமாக, இறந்த குழந்தையின் பிணத்தை எதுவும் செய்துவிடாமல்,
மறுநாள் காலை மருத்துவமனைக்கு கொண்டு வருமாறு கூறியுள்ளனர்.


பானுமதி முதல்நாள் மாலையில் இருந்தே,
மருத்துவமனையில் இறந்த குழந்தையுடன் இருந்தார். நேற்று காலை 11 மணி வரை
போலீசார் யாரும் வரவில்லை. மருத்துவமனையின் ஒரு ஓரத்தில் சோகமாக
அமர்ந்திருந்த இந்த பெண்ணை அங்கிருந்தவர்கள் விசாரித்த போதுதான், அவர்
இறந்த குழந்தையுடன் காத்திருந்தது தெரியவந்தது. இதையடுத்து, அரசு தலைமை
டாக்டர் ரவிகலா, போலீசாருக்கு தகவல் தெரிவித்த பின்னர், அந்த குழந்தையின்
பிணத்தை பிரேத பரிசோதனைக்காக பிணவறைக்கு கொண்டு செல்ல உத்தரவிட்டார்.
மகளிர் போலீசின் இந்த செயலால், 12 மணி நேரத்திற்கும் மேலாக இறந்த
குழந்தையுடன் ஒரு தாய், இரவு முழுவதும் தவித்த சம்பவம் மருத்துவமனையில்
இருந்த அனைவரையும் அதிர்ச்சியில் ஆழ்த்தியது.