இந்திரஜித்தை எப்படி வீழ்த்தினான் இலட்சுமணன்?

எது சத்தியம்? சத்தியபுருஷர் யார்?

வேதங்களும், சாஸ்திரங்களும், உபநிடதங்களும் சத்திய பிரமாணங்கள் ஆகும். ஸ்ரீராம், ஸ்ரீகிருஷ்ண அவதாரங்களும் அடங்கிய தஸாவதாரங்களும் சத்திய பிரமாணங்கள் ஆகும்.

பகவான் ஸ்ரீகிருஷ்ணரும், ஸ்ரீராமரும் பரஸத்தியம் ஆவர். சாக்ஷாத் ஸ்ரீமந் நாராயணா தான் மேற்கொண்ட மொத்த ஸ்வரூபங்களும் ஆகும்.

வேதோநாராயணா சாக்ஷாத் என்பது ஸத்தியமான வேதவாக்கு ஆகும். நம் அனைவருக்கும் மோட்சம், முக்தி முதலியவற்றை அளிப்பவர் கோவிந்தன் ஆகிய அவர் ஒருவர்தான் என வேதம் உரைக்கிறது.

ஸ்ரீ கிருஷ்ணா ஸ்ரீ ஹரி ஆகிய ஸ்ரீமகா விஷ்ணு தான் வேத பரம புருஷர் ஆவார். அவர் ஆயிரத்திற்கும் மேற்பட்ட திருநாமங்களை உடையவர்.

வால்மீகி இராமாயணத்தில் ஸ்ரீ ராமர் தன்னை மனிதனாகத்தான் தஸரதபுத்திரனாகத் தான் கூறியுள்ளார். 'ஆத்மாநம் மானுஷம் மந்யே ராமன் தஸரதாத் மஜம்!'. அவர் பரசத்தியமான மஹா புருஷர் என்பது நிதர்சனம். நமக்கு இங்க ஒரு கேள்வி எழுகிறது.

ஸ்ரீராமர் ஜடாயுவுக்கும் , சபரிக்கும் மோட்சம் அளித்தார். மற்றும் பலருக்கும் பாவவிமோசனம், முக்தி, மோட்சம் போன்றவை அளித்தார்.

எப்படி மனிதன் எனக் கூறிக்கொண்ட ஒருவர் மோட்சம் போன்றவற்றை அளிக்க முடியும்? இதற்கு வால்மீகி ஸ்ரீராமாயணத்திலேயே விடை இருக்கிறது.

இலட்சுமணர் இந்திரஜித்தனுடன் கடுமையாகப் போர் புரிந்தார். அதுவும் மிகவும் வீரமாக. ஆனால் அவரால் வெல்ல முடியவில்லை.

இந்திரஜித்தன் மிகவும் சாமர்த்தியமாக பலரூபமெடுத்து, விண்ணிலும், மண்ணிலும் மறைந்து மறைந்து திரிந்து போர் புரிந்தான். இலட்சுமணரும் பல அஸ்திரங்களை உபயோகப்படுத்தியும் அவனை வெல்ல முடியாமல் துவண்டு போய்விட்டார். இறுதியில் சோர்வுற்றார்.

இளைய பெருமாளாகிய இலட்சுமணர் கடைசியாக ஒரு பாணத்தை நாண் ஏற்றி, 'ஸ்ரீ ராமர் சத்தியமானால் சத்தியபுருஷரானால் இந்த அம்பு இந்திரஜித்தை கொன்று வீழ்த்தட்டும்' எனக்கூறி அஸ்திரித்தை இந்திரஜித்தை நோக்கி ஏவினார். இந்திரஜித்தனும் மாண்டான். இதிலிருந்து சத்தியமும் சத்தியபுருஷரும்மோட்சம் அளிக்கலாம் என தெரிகிறது.

ஆதலால் நாமும் சத்தியத்தை கடைபிடித்து வாழ வேண்டும் எனத் தெரிகிறது.


அம்பத்தூர் டாக்டர் R. பக்தவத்ஸலம்