சுப்ரியா சாந்திலால் கவிதைகள்

**சிவா** · **சிவா** Thu Feb 04, 2010 1:53 am

சுப்ரியா சாந்திலால்

நான் கவிஞன் இல்லை!

முதலாம் எழுத்து ஒன்றி வருதல் மோனை
இரண்டாம் எழுத்த ஒன்றி வருதல் எதுகை
யாப்பு அடிரொடை சீர்தளை பலவும்
இப்பவும் படிக்காமற் துருப்பிடித்ததென்னே!
பதினெண் கீழ்க்கணக்கும் பதினெண் மேற்கணக்கும்
கணிதத்தில் மட்டுமே உண்டென்றெண்ணிக் கற்றேன்!
அகநானூறும் புறநானூறும் இருந்திடலறியாது
அகத்தில் அழுக்காறும் புறத்தில் ஒப்பனையும் பெற்றேனே!
தாய்ப்பால் ஆட்டுப்பால் ஆவின்பால் எனும்
முப்பாலுக்கப்பால் எப்பாலும் அறியேனே!
எட்டுத்தொகை கலித்தொகை பதிற்றுப்பத்து
பட்டினப்பாலை எட்டா உயரக் கொய்யாக்கனிதானே!
அப்பர் சுந்தரர் மேகலைச் சாத்தனார்
கம்பர் ஒட்டக்கூத்தர் இளங்கோவடிகளார்
பார் அதிரப்பாடிய பாரதி யாரோ?
பாண்டியன் பரிசு தந்த பாரதிதாசன் எவரோ?
செத்துப் போனது சுண்டெலி தானென
நாத்தம் மோந்து கண்டுகொள்ளும் மூக்கன் நான்!
உணர்ச்சி உலையில் வார்த்தை ரவை கொட்டி
அகங் காரம் கலந்து உப்புமாக் கவி சமையற்காரன் தான்!!

**சிவா** · **சிவா** Thu Feb 04, 2010 1:54 am

சிவராத்திரி

சன் முதல் விண் வரை
மாத்தி மாத்தி மேய்ஞ்சாச்சி!
இருவத்தி நாலுமணி இடைவிடா எ·ப்.எம்.
கேட்டுக் கேட்டுப் புளிப்பாச்சி!
அரைகுறைக் கிறுக்கல் கவிதை
அடிச்சித் திருத்தி முடிச்சாச்சி!
விட்டுவிட்டுச் சொட்டும் குழாய்
கழுத்தைத் திருகி நெறிச்சாச்சி!
சும்மாச் சும்மா குரைக்கும் தெருநாய்
சன்னல் இழுத்து அடைச்சாச்சி!
காத்தில் படபடக்கும் புத்தகப்பம்
தூக்கிப் பரணில் எறிஞ்சாச்சி!
காதோரம் சுத்தும் ஒத்தைக் கொசு
வத்தி கொளுத்தி விரட்டியாச்சி!
மீந்துபோன சாம்பார் நாத்தம்
மூச்சடக்கி பாத்திரம் வெளக்கியாச்சி!
ஒண்ணுக்கு மேல் இன்ணொன்னு தலையணை
தலையை ஒசத்தி வச்சாச்சி!
இடமாய் வலமாய் மல்லாந்து குப்புற
மூச்சுத் திணறி எழுந்தாச்சி!
எதிர்த்த வீட்டு ரெண்டாம் தாரம்
கூட்டிப் பெருக்கி தெளிச்சாச்சி!
சைச்கிள் பையன் பின்சீட்டு தினசரி
வாசப்படியில் விழுந்தாச்சி!!

**சிவா** · **சிவா** Thu Feb 04, 2010 1:54 am

ஆறு வாரச் சுதந்திரம்

மேலிருந்து கீழும் கீழிலிருந்து மேலும்
சோப்பு நுரையுடன் மூப்பு நரையை
வழித்து வழித்து வாஷ்பேசினில் கரைக்கும்
காலைநேரச் சடங்கு இல்லை!

பூச்சிக் கத்திரிக்காய் பச்சைத் தக்காளி
முற்றல் வெண்டைக்காய் முனை உடைத்து விலக்கி
கருவேப்பிலை கொத்துமல்லி கொசுறு கேட்டு...
சந்தைத் தொல்லை இப்போது இல்லை!

கறுப்பாக்கி இளமையூட்ட நரைமுடிக்கு 'டை' போட்டு
கழுத்தை இறுக்க சாரைப்பாம்பு 'டை' கட்டி
கரும்புகை கக்கும் வாகன வியூகத்தில் புகுந்து
வெளியேறும் இன்னல் இல்லை!

அலுவலக மேலதிகாரியின் அர்ச்சனை இல்லை!
அக்கம்பக்க வெட்டிப் பேச்சு அறுவை இல்லை!
'செய்வேலை சரியில்லை' - மனைவியின் திட்டில்லை!
சின்னத்திரை தொடர்நாடகச் சித்ரவதை இல்லை!

இடுப்பு முதல் பாதம்வரை மாவுக்கட்டு
படுத்த படுக்கையில் ஆனந்த சுதந்திரம்!
''அடுத்த வாரம் கட்டு பிரிப்போம்!''
''அதற்குள் என்ன டாக்டர் அவசரம்?''

**சிவா** · **சிவா** Thu Feb 04, 2010 1:55 am

துரிதம்

கருப்பைக்குள் தலைகீழாய் கரணம்!
எட்டே மாதத்தில் ஆயுத ஜனனம்!
பிறப்புச் சான்றிதழ் திருத்தம்!
இரண்டே வயதில் எல்.கே.ஜி.!
மூன்றாம் வகுப்பிலிருந்து டபுள் பிரமோஷன்!
முதுகலைப் பட்டம் டீன்-ஏஜ் முடிவில்!
ஒருவருட இந்தியச் சம்பளம்
ஒருமாத அமெரிக்க டாலராய்...

சாதம், சாம்பார், கூட்டுக்குப் பதிலாக...
பத்தே நிமிடத்தில இன்ஸ்டன்ட் ·பிரைட் ரைஸ்!
வான்வழி பறந்து...
தூக்கம் துறந்து...
கனவிலும் கடிகார முட்களின் விரட்டு!
காலன் பிரதிநிதி செல்லிடப்பேசி
அழைப்பு... அழைப்பு... ஓயா அழைப்பு...

முப்பதில் மாரடைப்பு!
அசையா சொத்துக்கள்
அசையும் சொந்தங்கள்
அனாதையாய்....!!

**சிவா** · **சிவா** Thu Feb 04, 2010 1:55 am

பாரதி என் தோழன்

அன்பு பாரதி! வாழிய நலம்!
உனைப் பார்த்து எண்பத்தெட்டு ஆண்டுகள்!
நீ நலமா? செல்லம்மா நலமா?
காக்கை குருவி கழுதை நலமா?
இங்கு நரி முதலை பச்சோந்தி நலம்!
மற்றும் நானும் குடும்பத்தினரும் நலம்!
தேர்தலுக்குத் தேர்தல் ஓரணியிலிருந்து மற்றொன்றுக்கு
வானரங்களாய்த் தாவும் கட்சிப்பிழைகள் நலம்1
வெந்ததைத் தின்று தந்ததைப் பெற்று
கோணலாய் முதுகு வளைந்த காட்சிப்பிழைகள் நலம்!
ஆட்சி மாறியும் அஞ்சி அஞ்சி
நீதிக்கூண்டில் கரணம் போடும் சாட்சிப்பிழைகள் நலம்!
இடிப்பாரை எல்லாம் ஏமரா மன்னன்
சிறைச்சாலை அனுப்பும் ஆட்சிப்பிழைகள் நலம்!
போலிப் பக்தர்கள் சுதேசிச் சாமியார்கள்
அரசியல் எத்தர்கள் தொலைக்காட்சிப் பித்தர்கள் நலம்!
புள்ளி ராஜாக்கள் கரும்புள்ளி மந்திரிகள்
'மில்லி' ராஜாக்கள் 'டாஸ்மாக்' கடைகள்!
ஆணுரு கொண்ட அலிகள் நலம்!
பெண்ணுரு கொண்ட பேய்கள் நலம்!
தமிழின எதிரிகள் இலங்கையில் நலம்!
தமிழினத் துரோகிகள் இங்கே மிகமிக நலம்!

சுருங்கக் கூறின்,

இங்கு அன்னைத் தமிழைத்தவிர அனைத்தும் நலம்!
இங்கு உன் நலமறிய ஆவல்!!
இப்படிக்கு,
உன் உயிர்த்தோழன்

சாந்திலால்

**சிவா** · **சிவா** Thu Feb 04, 2010 1:56 am

மழை

தவளைக்குத் திருமணம்!
கழுதைக்குக் கல்யாணம்!
கன்னிப்பெண் நிர்வாணம்!
அம்மன்களுக்குக் கூழ்!
கோவில்களில் யாகம்!
குன்னக்குடியின் ராகம்!

கடைசியில்...
பெய்தே விட்டது அடைமழை
அமேசான் காட்டில்!!