டோனி - ஷேவாக் இடையில் மோதல் இல்லை : ஹர்பஜன்சிங்

இந்திய கிரிக்கெட் அணி வங்காள தேசத்தில் விளையாடியபோது கேப்டன்
டோனிக்கும், துணை கேப்டன் ஷேவாக்குக்கும் இடையே மோதல் ஏற்பட்டதாக தகவல்
வெளியாகி இருந்தது.கிட்டகாங்கில் நடந்த முதல் டெஸ்டில் முதுகுவலி
காரணமாக டோனி ஆடவில்லை. இதனால் ஷேவாக் கேப்டனாக பணியாற்றினார். அந்த
டெஸ்டில் ஹர்பஜன் சிங் காயம் அடைந்ததால் அமித் மிஸ்ராவுக்கு வாய்ப்பு
கிடைத்தது. அவர் சிறப்பாக பந்து வீசி 7 விக்கெட் கைப்பற்றினார்.
ஆனால் மிர்பூரில் நடந்த 2-வது டெஸ்டில் மிஸ்ரா நீக்கப்பட்டார்.
அவருக்கு பதிலாக ஒஜாவுக்கு கேப்டன் டோனி வாய்ப்பு கொடுத்தது, மிஸ்ரா
நீக்கப்பட்டது தொடர்பாக கேப்டன் டோனிக்கும், துணை கேப்டன் ஷேவாக்குக்கும்
இடையே கருத்து வேறுபாடு ஏற்பட்டதாகவும், இந்திய அணியில் டோனி கோஷ்டி,
ஷேவாக் கோஷ்டி என்று பிளவுபட்டு இருப்பதாகவும் செய்திகள் வெளியாகி
இருந்தது.
டெல்லியை சேர்ந்த ஷேவாக் கோஷ்டியில் அந்த ஊரை சேர்ந்த காம்பீர், இஷாந்த் சர்மா, அமித்மிஸ்ரா இருப்பதாகவும் அந்த தகவல் தெரிவித்தனர்.
இந்த தகவலை தற்போது ஹர்பஜன்சிங் மறுத்துள்ளார்.
இது தொடர்பாக அவர் கூறியதாவது,
வங்காள தேசத்தில் சுற்றுப்பயணம் செய்தபோது இந்திய அணியில் மோதல்
இருப்பதாக செய்தி வெளியாகி இருந்த தகவல் இங்கு வந்த பிறகுதான் தெரிந்தது.
யூகத்தின் அடிப்படையில் இந்த செய்திகள் வெளியாகி இருந்தது.
எந்த ஒரு வீரர் தொடர்பாகவும் டோனிக்கும், ஷேவாக்குக்கும் மோதல்
ஏற்படவில்லை. யூகத்தின் அடிப்படையில் செய்திகள் வெளியானால் அணியில்
பாதிப்பு ஏற்படும்.
தென் ஆப்பிரிக்காவுக்கு எதிரான தொடரில் சிறப்பாக விளையாடுவோம் என்ற
நம்பிக்கை உள்ளது. தென் ஆப்பிரிக்க அணி தலைசிறந்தது என்பதில் சந்தேகம்
இல்லை. ஆனால் உள்ளூர் மைதானத்தில் விளையாடுவதால் நாங்கள் சிறப்பாக
ஆடமுடியும். தென் ஆப்பிரிக்க அணியின் எந்த சவாலையும் சந்திக்க இந்திய அணி
தயாராக இருக்கிறது என்றார் ஹர்பஜன்சிங்.