சிறிலங்கா உறுதிப்படுத்தியும் ஆதாரமில்லாமல் இந்தியா நம்ப மறுப்பு

விடுதலைப் புலிகளின் தலைவர் பிரபாகரனைன் கொன்றுவிட்டதாகவும், இந்தியாவிற்கு சென்று பசில் ராஜபக்சவும், கோத்தபாய ராஜபக்சவும் அதனை உறுதிப்படுத்திவிட்டதாகவும் சிறிலங்கா கூறி வருகின்றது.

ஆனால், சிறீலங்கா இன்னும் அதற்கு ஆதரமான இறப்புச் சான்றிதழை வழங்கவில்லை என இந்தியா கூறியுள்ளது. ராஜிவ் காந்தி படுகொலை வழக்கு தொடர்பாக விடுதலைப் புலிகளின் தலைவர் பிரபாகரனின் இறப்புச் சான்றிதழ் சிறிலங்கா அரசிடமிருந்து இதுவரை கிடைக்கவில்லை என இந்தியாவின் குற்றப் புலனாய்வு அமைப்பான சிபிஐ தெரிவித்துள்ளது.

இதுதொடர்பாக தகவல் பெறும் உரிமைச் சட்டத்தின்கீழ் விண்ணப்பதாரர் ஒருவர் கேட்டிருந்த கேள்விக்கு சிபிஐ கண்காணிப்பாளர் பி.என் மிஸ்ரா மேற்கண்டவாறு பதிலளித்துள்ளார். சிறீலங்கா அரசிடமிருந்து பிரபாகரன் இறப்புச் சான்றிதழைப் பெற சிபிஐ காத்திருப்பதாக மிஸ்ரா தனது பதிலில் தெரிவித்துள்ளார்.

இவ்விவகாரத்தில் தூதரகம் மூலமாக நடவடிக்கைகள் மேற்கொள்ளப்பட்டு வருவதாக அந்த பதிலில் தெரிவிக்கப்பட்டுள்ளது. பிரபாகரன் இறந்த தகவல் அறிந்ததும், அவரது இறப்புச் சான்றிதழைப் பெற தூதரகம் மூலமாக சிறிலங்கா அரசுக்கு தகவல் தெரிவிக்கப்பட்டதாகவும், அவரது இறப்புச் சான்றிதழ் இதுவரை சிபிஐக்கு கிடைக்கவில்லை என்றும் மிஸ்ரா தனது பதிலில் தெரிவித்துள்ளார்.

பிரபாகரன் இறந்ததாக ஒரு உடலைக்காட்டி சர்வதேச ரீதியாக பிரச்சாரம் செய்த சிறிலங்கா, அதனை உறுதிப்படுத்தி இறப்புச்சான்றிதழை வழங்க இத்தனை மாதங்களாக ஏன் இழுத்தடிக்கின்றது என்ற கேள்வி இப்போது பல்வேறு மட்டத்திலும் ஏற்படத்தொடங்கியுள்ளது குறிப்பிடத்தக்கது.

சிறிலங்கா அரசின் இந்த இழுத்தடிப்பானது பிரபாகரன் இறந்துவிட்டதாக நம்பிய பலரையும், இப்போது அது குறித்து சந்தேகம் கொள்ள வைத்துள்ளதாகவும் அவதானிகள் சுட்டிக்காட்டியுள்ளனர்