இன்றைய செய்திகள்-அக்டோபர் 9

**ayyasamy ram** · **ayyasamy ram** Wed Oct 09, 2024 6:28 am

கேரளாவில் இருசக்கர வாகனங்களில் 4 வயதுக்கு மேல் உள்ள குழந்தைகளுக்கு ஹெல்மெட் கட்டாயம்
-
இன்றைய செய்திகள்-அக்டோபர் 9 IXn8ysV

-
திருவனந்தபுரம்: கேரளாவில் இருசக்கர வாகனங்களில் 4 வயதுக்கு மேல் உள்ள குழந்தைகளுக்கு ஹெல்மெட் கட்டாயமாக்கப்பட்டுள்ளது. மேலும் குழந்தைகளுக்கு அவர்களது வயதுக்கு ஏற்ப கார்களில் பின் இருக்கையில் சீட் பெல்ட் கட்டாயமாக்கப்பட்டுள்ளது. கேரளாவில் கடந்த சில வாரங்களுக்கு முன் ஏற்பட்ட ஒரு சாலை விபத்தில் காரின் முன் இருக்கையில் தாயின் மடியில் அமர்ந்திருந்த 2 வயது குழந்தை ஏர்பேக் அமுக்கி மூச்சுத் திணறி பரிதாபமாக உயிரிழந்தது. இந்த சம்பவத்தை தொடர்ந்து கார்கள் மற்றும் இருசக்கர வாகனங்களில் பயணம் செய்யும் குழந்தைகளுக்கு பாதுகாப்பை அதிகரிக்க கேரள மோட்டார் வாகனத்துறை தீர்மானித்துள்ளது.

இதுதொடர்பாக கேரள போக்குவரத்துத் துறை ஆணையாளர் எச். நாகராஜு வெளியிட்டுள்ள உத்தரவில் கூறியிருப்பது: கார்கள் மற்றும் இருசக்கர வாகனங்களில் பயணம் செய்யும் குழந்தைகளுக்கு பாதுகாப்பை அதிகரிக்க தீர்மானிக்கப்பட்டுள்ளது. கார்களில் பின் இருக்கையில் குழந்தைகளுக்கு அவர்களது வயதுக்கு ஏற்ப தனி இருக்கையும், சீட் பெல்ட்டும் கட்டாயமாகும். 4 முதல் 14 வயது வரை உள்ள 135 செமீக்கு குறைவான உயரமுள்ள குழந்தைகளுக்கு கார்களில் பின் இருக்கையில் குஷன் உள்ள இருக்கையும், சீட் பெல்ட்டும் இருக்க வேண்டும்.

இருசக்கர வாகனத்தில் 4 வயதுக்கு மேல் உள்ள குழந்தைகளுக்கு ஹெல்மெட் கட்டாயமாகும். பெற்றோருடன் பைக்கில் செல்லும்போது குழந்தைகள் தூங்குவதற்கு வாய்ப்பு உண்டு. எனவே குழந்தையுடன் சேர்த்து ஒரு பெல்ட் போட்டுக் கொள்வது நல்லதாகும். கார்கள் மற்றும் இருசக்கர வாகனங்கள் செல்லும் போது குழந்தைகளுக்கு ஆபத்து ஏற்பட்டால் அதற்கு வாகன ஓட்டுநர் தான் முழு பொறுப்பாகும். இதை மீறுபவர்களுக்கு டிசம்பர் மாதம் முதல் அபராதம் விதிக்கப்படும். இவ்வாறு அந்த உத்தரவில் தெரிவிக்கப்பட்டுள்ளது.

நன்றி-தினகரன்

**ayyasamy ram** · **ayyasamy ram** Wed Oct 09, 2024 6:32 am

வளி மண்டல சுழற்சி 11 மாவட்டங்களில் கனமழை வாய்ப்பு

இன்றைய செய்திகள்-அக்டோபர் 9 7kLLcHv

சென்னை:
வளி மண்டல கீழடுக்கு சுழற்சி காரணமாக தமிழகத்தில்
12ம் தேதி வரை அனேக இடங்களில் கனமழை பெய்யும் என்று
சென்னை வானிலை ஆய்வு மையம் தெரிவித்துள்ளது.

வட தமிழகம், கேரளா மற்றும் லட்சத் தீவுப் பகுதிகளின் மேல்
ஒரு வளி மண்டல கீழடுக்கு சுழற்சி நிலை கொண்டுள்ளது.
அதன் காரணமாக கோவை, திருப்பூர், தேனி , திண்டுக்கல்
மாவட்ட மலைப் பகுதிகள், நீலகிரி, ஈரோடு, கிருஷ்ணகிரி,
தர்மபுரி, சேலம் மற்றும் திருப்பத்தூர் மாவட்டங்களில் ஓரிரு
இடங்களில் இன்று தொடங்கி 11ம் தேதி வரையும்,
12ம் தேதியில் செங்கல்பட்டு விழுப்புரம், கடலூர், தஞ்சாவூர்,
திருவாரூர், நாகப்பட்டினம், மயிலாடுதுறை ராமநாதபுரம்,
சிவகங்கை, புதுக்கோட்டை, தூத்துக்குடி, திருநெல்வேலி,
கன்னியாகுமரி, தென்காசி, விருதுநகர், மதுரை, தேனி,
திண்டுக்கல், திருப்பூர், கோவை மற்றும் நீலகிரி மாவட்டங்களில்
ஓரிரு இடங்களில் கனமழை பெய்யும் வாய்ப்பும் உள்ளது.

சென்னையில் சில இடங்களில் இடி மின்னலுடன் கூடிய லேசானது
முதல் மிதமான மழை பெய்யும் வாய்ப்பும் உள்ளது. அதிகபட்ச
வெப்பநிலை 90 டிகிரியை ஒட்டி இருக்கும். தமிழக கடலோரப்
பகுதிகளில் தென் தமிழக கடலோரப் பகுதிகள் மன்னார் வளைகுடா
மற்றும் குமரிக் கடல் பகுதிகளில் சூறாவளிக் காற்று மணிக்கு
55 கிமீ வேகத்தில் இன்று முதல் 12ம் தேதி வரை வீசும் என்பதால்
மீனவர்கள் மேற்கண்ட பகுதிகளுக்கு செல்ல வேண்டாம் என்று
அறிவுறுத்தப்படுகின்றனர்.
-
-தினகரன்