ஆம்ஸ்ட்ராங் படுகொலை: கைதாகியிருப்பவர்கள் உண்மை குற்றவாளிகள் அல்ல.. திருமாவளவன் பகீர் குற்றச்சாட்டு!

--



தமிழ்நாடு மாநில பகுஜன் சமாஜ் கட்சியின் தலைவர்
ஆம்ஸ்ட்ராங் நேற்றிரவு மர்ம நபர்களால் வெட்டி படுகொலை
செய்யப்பட்டார். இந்த படுகொலை சம்பவம் தமிழகம்
மட்டுமின்றி நாடு முழுவதும் பெரும் அதிர்வலைகளை
ஏற்படுத்தியுள்ளது.

இந்நிலையில் சென்னை ராஜீவ் காந்தி மருத்துவமனையில்
வைக்கப்பட்டுள்ள ஆம்ஸ்ட்ராங்கின் உடலுக்கு விடுதலை
சிறுத்தைகள் கட்சியின் தலைவர் திருமாவளவன் நேரில்
அஞ்சலி செலுத்தினார்.

இதனை தொடர்ந்து செய்தியாளர்களிடம் பேசிய அவர், மக்கள்
பிரச்சினைகளில் தலையிட்டதால் ஆம்ஸ்ட்ராங்கிற்கு அச்சுறுத்தல்
இருந்து வந்ததாகவும் பகையும் இருந்து வந்ததாகவும்
தெரிவித்துள்ளார். ஆம்ஸ்ட்ராங்கிற்கு காவல்துறை உரிய
பாதுகாப்பு அளித்திருக்க வேண்டும் என்றும் காவல்துறை உரிய
பாதுகாப்பு வழங்காதது அதிர்ச்சி அளிக்கிறது என்றும்
திருமாவளவன் தெரிவித்துள்ளார்.

தமிழக அரசுக்கும், காவல்துறைக்கும் விடுக்கப்பட்ட சவால் தான்
ஆம்ஸ்ட்ராங் படுகொலை என்றும் திருமாவளவன் தெரிவித்துள்ளார்.
தமிழ்நாட்டில் குறிப்பாக தென் மாவட்டங்களில் பட்டியலின மக்கள்,
இளைஞர்கள் அடுத்தடுத்து கொலை செய்யப்படுவது நீடித்து
வருகிறது என்றும் குற்றம் சாட்டியுள்ளார்.

மேலும் பகுஜன் சமாஜ் கட்சி நிர்வாகிகள் முன்வைத்த கோரிக்கைகளை
அரசு பரிசீலிக்க வேண்டும் என்றும் திருமாவளவன் வலியுறுத்தியுள்ளார்.
ஆம்ஸ்ட்ராங் படுகொலை தொடர்பாக தற்போது கைதாகி இருப்பவர்கள்
உண்மையான குற்றவாளிகள் இல்லை என்று தெரிவித்துள்ள
திருமாவளவன், கொலையின் பின்னணியில் உள்ள உண்மையான
குற்றவாளிகளை உடனடியாக கைது செய்ய வேண்டும் என்றும்
வலியுறுத்தியுள்ளார்.

கொலையாளிகள் என 8 பேர் சரணடைந்து விட்டதால் புலன் விசாரணையை
காவல்துறை முடித்து விடக்கூடாது என்று கூறியுள்ள திருமாவளவன்
கூலிப் படை கும்பலைக் கைது செய்து சட்டத்தின் முன் நிறுத்தி அவர்களுக்கு
தண்டனை பெற்று தர வேண்டும் என்றும் தெரிவித்துள்ளார்.

ஆம்ஸ்ட்ராங் கொலை தொடர்பாக அண்ணாநகர் காவல் நிலையத்தில்
நேற்று இரவு 8 பேர் சரண் அடைந்தனர். ஆற்காடு சுரேஷ் கொலைக்கு
பழிக்கு பழியாக ஆம்ஸ்ட்ராங்கை கொன்றதாக அவர்கள் வாக்குமூலம்
அளித்துள்ளது குறிப்பிடத்தக்கது.
-
நன்றி- சமயம் செய்திகள்