திறந்தும் பயன் இல்லாத மருத்துவமனை

திருவள்ளூர், அக். 14: திருவள்ளூர் அரசு மருத்துவமனையில் அனைத்து வசதிகளுடன் கூடிய நவீன மகப்பேறு மற்றும் பச்சிளம் குழந்தைகள் பிரிவு திறந்து ஒரு வாரமாகியும் இன்றுவரை மக்களின் பயன்பாட்டுக்கு வராமல் உள்ளது.திருவள்ளூர் ஜே.என். சாலையில் உள்ளது மாவட்ட அரசு தலைமை மருத்துவமனை. இதில் புற நோயாளிகள் பிரிவு, பிரசவப் பிரிவு, குழந்தைகள் பிரிவு, விபத்து சிகிச்சை பிரிவு, உள்நோயாளிகள் பிரிவு, இதய சிகிச்சை பிரிவு, காசநோய் பிரிவு, எச்ஐவி பிரிவு போன்றவை உள்ளன.திருவள்ளூர், கடம்பத்தூர், பேரம்பாக்கம், வெள்ளியூர், வெங்கல், வெள்ளவேடு, மணவாளநகர், கீழானூர், மேல்நல்லாகத்தூர், போளிவாக்கம் போன்ற பகுதிகளில் விபத்தில் காயம்பட்டவர்கள் முதலுதவி சிகிச்சைக்காக இங்கு வருகின்றனர்.காயத்தின் தீவிரத்தைப் பொருத்து அங்கேயே உள் நோயாளியாக தங்க வைக்கப்படுகின்றனர். அல்லது சென்னை அரசு மருத்துவமனைக்கு மாற்றப்படுகின்றனர்.மேற்கண்ட பகுதிகளில் உள்ள கர்ப்பிணிகளும் பிரசவத்துக்காக இங்கு வருகின்றனர். மேலும் நோயால் பாதிக்கப்பட்ட குழந்தைகளையும் இங்கு சேர்க்கின்றனர்.திருவள்ளூர், ஜெயாநகர், பெரியகுப்பம், பூங்காநகர், எம்ஜிஆர் நகர், ராஜாஜிபுரம், சேலை, ஈக்காடு, பாண்டூர், ஒதிக்காடு போன்ற பகுதியில் இருந்து தினசரி 1000 முதல் 1500 பேர் வரை வெளி நோயாளிகளாக சிகிச்சை பெற்றுச் செல்கின்றனர்.நாளுக்கு நாள் வெளி, உள் நோயாளிகளின் வருகையும் அதிகரித்து வருவதால் இட நெருக்கடி ஏற்பட்டது.இதையடுத்து வெளி நோயாளிகளுக்கு தனியாக புதிய பிரிவும், மகப்பேறு மற்றும் பச்சிளம் குழந்கைகளுக்காக நவீன வசதிகள் மற்றும் கூடுதலாக 30 படுக்கைகள் கொண்ட புதிய பிரிவும் ரூ.1.62 கோடி செலவில் 2008-ம் ஆண்டு துவக்கப்பட்டு கடந்த சில மாதங்களுக்கு முன் பணிகள் முடிக்கப்பட்டன. இம்மாதம் 7-ம் தேதி இந்தப் பிரிவுகள் அனைத்தும் துணை முதல்வர் மு.க.ஸ்டாலினால் திறந்து வைக்கப்பட்டன. திறந்து ஒருவாரமாகியும் இந்தப் பிரிவுகள் இன்று வரை மக்களின் பயன்பாட்டுக்கு வரவில்லை.இதுகுறித்து மருத்துவமனை அதிகாரி ஒருவர் கூறுகையில்,""கடந்த வியாழக்கிழமை முதல் புறநோயாளிகள் பிரிவு இயங்கிவருகிறது. மகப்பேறு மற்றும் பச்சிளம் குழந்தை பிரிவில் மூன்று ஷிப்டுகளிலும் பணி புரிய போதிய அளவு நர்சுகள், ஊழியர்கள் இல்லாததால் இதுவரை இயங்கவில்லை. இது குறித்து மேலிடத்தில் பேசியுள்ளோம். விரைவில் அந்தப் பிரிவும் இயங்கத் தொடங்கிவிடும்'' என்றார்