பொன்முடி பதவிப்பிரமாணம்: ஆளுநர் ரவி மீது உச்சநீதிமன்றம் அதிருப்தி.. நாளை வரை கெடு

-------
பொன்முடிக்கு பதவிப்பிரமாணம் நடத்தி வைப்பது குறித்து
ஆளுநர் ரவி நாளைக்குள் பதில் அளிக்க வேண்டும் என்று
உச்சநீதிமன்றம் கெடு விதித்துள்ளது.

சொத்து குவிப்பு வழக்கில் முன்னாள் அமைச்சர் பொன்முடி
மற்றும் அவரின் மனைவிக்கு 3 ஆண்டுகள் சிறை தண்டனை,
ரூ.50 லட்சம் அபராதம் விதித்து சென்னை உயர்நீதிமன்றம்
உத்தரவிட்டிருந்தது.

இதனால் பொன்முடி தனது அமைச்சர், எம்.எல்.ஏ பதவிகளை
இழந்தார். இதை எதிர்த்து, பொன்முடி உச்சநீதிமன்றத்தில்
முறையிட்டார். இந்த வழக்கில், சென்னை உயர்நீதிமன்றம்
விதித்த தண்டனை மற்றும் அபராதத்தை நிறுத்தி வைத்து
உச்சநீதிமன்றம் உத்தரவிட்டது.

இதன் காரணமாக பொன்முடியின் தகுதி நீக்கம் ரத்தாகி
மீண்டும் திருக்கோவிலூர் எம்.எல்,ஏ. ஆனார். இதைத்தொடர்ந்து
அவருக்கு மீண்டும் அமைச்சராக பதவிப்பிரமாணம் செய்து
வைக்க ஆளுநருக்கு முதல் அமைச்சர் மு.க.ஸ்டாலின்
பரிந்துரைத்தார்.

ஆனால் அதற்கு ஆளுநர் ஆர்.என்.ரவி மறுப்பு தெரிவித்தார்.
இதையடுத்து, பொன்முடிக்கு அமைச்சராக பதவிப்பிரமாணம்
செய்து வைக்க ஆளுநருக்கு உத்தரவிட கோரி தமிழ்நாடு அரசின்
சார்பில் உச்சநீதிமன்றத்தில் மனு தாக்கல் செய்யப்பட்டது.

இவ்வழக்கு இன்று தலைமை நீதிபதி அமர்வில் விசாரணைக்கு
வந்தது.

விசாரணையின் போது, 'நீதிமன்ற உத்தரவை மீறி பதவிப்
பிரமாணம் செய்ய முடியாது என ஆளுநர் எவ்வாறு கூற முடியும்?
உங்கள் ஆளுநர் என்ன செய்கிறார் ?

பொன்முடிக்கு அமைச்சராக பதவிப்பிரமாணம் செய்து வைக்காதது
குறித்து நாளைக்குள் ஆளுநர் பதில் அளிக்க வேண்டும்.

பாஸிட்டிவ் ஆன பதில் ஆளுநர் தரப்பில் இருந்து நாளை வரவில்லை
என்றால் கடும் உத்தரவை பிறப்பிக்க வேண்டி வரும். அரசியல் சாசன
நடைமுறையை பின்பற்ற ஒரு அவகாசம் வழங்குகிறோம்.

ஆளுநர் நீதிமன்றத்தை அவமதித்துள்ளார். ஆளுநர் செயல்பாடுகள்
எங்களுக்கு கவலை அளிக்கிறது. இன்றைய இரவு மட்டுமே
ஆளுநருக்கு அவகாசம்.

அரசியல் சாசனப்படி ஆளுநர்கள் செயல்படுவதை உச்ச நீதிமன்றம்
உறுதிப்படுத்தப்பட வேண்டிய தேவை இருக்கிறது'.
இவ்வாறு நீதிபதிகள் கூறினர்.
-

-டைம்ஸ் நவ் & Dailyhunt