தன்மானம் அற்றவனா தமிழன்!

தமிழகத்தில் 234 தொகுதிகளுக்கு வரும் ஏப்ரல் 13 அன்று தேர்தல் நடைபெற உள்ளது. கடந்த ஐந்து வருடங்களாக தமிழகத்தை ஆட்சி செய்து வரும் திமுகவும் முக்கிய எதிர்க்கட்சியான அதிமுகவும் தேர்தலுக்குத் தயாராகி விட்டன. இரு கட்சிகளும் கூட்டணிக் கட்சிகளின் பேச்சுவார்த்தையை வெற்றிகரமாக முடித்து வேட்பாளர்களை அறிவித்து பிரச்சார களம் இறங்கி விட்டன.
திமுக முதலில் தன் தேர்தல் அறிக்கையை வெளியிட்டது. 2006 சட்டமன்றத் தேர்தலில் வண்ணத் தொலைக் காட்சி, இலவச அடுப்பு, 2 ஏக்கர் நிலம் என இலவசங்களை அள்ளித் தந்த திமுகவின் தேர்தல் அறிக்கையில் இம்முறையும் பல்வேறு இலவசங்கள் அறிவிக்கப் படும் என்ற எதிர்பார்ப்பு அதிகரித்த நிலையில் வழக்கம் போலவே இம்முறையும் இலவச மிக்சி அல்லது கிரைண்டர், இலவச பஸ் பாஸ், இலவச லேப் டாப் என கவர்ச்சி அறிவிப்புகள் பலவும் திமுகவின் தேர்தல் அறிக்கையில் இடம்பிடித்தன.

மற்றொருக் கட்சியான அதிமுகவும் நாங்கள் என்ன திமுகவுக்கு இளைத்தவர்களா? என்ற பாணியில் நீங்கள் மிக்சி அல்லது கிரைண்டர் தானே கொடுப்பீர்கள் நாங்கள் மிக்சி, கிரைண்டர்,பேன் என மூன்றையும் இலவசமாக வழங்குவோம் என்று தமது தேர்தல் அறிக்கையில் தெரிவித்துள்ளது. மேலும் இலவசமாக ஆடு, மாடு, 4 கிராம் தங்கம் என பட்டியல் போட்டுள்ளது அதிமுக. இதன்மூலம், இரு திராவிட கட்சிகளும் போட்டி போட்டுக்கொண்டு இலவசம் என்ற பெயரில் தமிழனின் மானத்தைக் கப்பலேற்றி விட்டுள்ளன.

இரு அரசியல் கட்சிகளும் வேலை வாய்ப்புக்கான உத்தரவாதம், நீண்ட கால தொலை நோக்குத் திட்டங்கள், கல்வி வளர்ச்சி, எல்லாருக்கும் எளிதில் கிடைக்கும் மருத்துவ முன்னேற்றம், தொழில் மேம்பாடு போன்ற சமூக பிரச்னைகளை முன் வைக்காமல் தமிழர்களைப் பிச்சைக் காரர்களாகக் கருதி அது இலவசம், இது இலவசம் என தமிழனின் தன்மானத்தை ஏலம் போட்டுள்ளன.

இலவசங்களை அள்ளி வழங்கி தமிழ்நாட்டின் கடன் சுமை ஒரு பக்கம் ஏறிக் கொண்டே இருக்கிறது. சொல்லவே கேவலமாக இருக்கிறது- தமிழக அரசின் கடன் சுமை ரூ 1 லட்சம் கோடிக்கும் மேலாம். தமிழக அரசின் கடன் சுமை மட்டும் ஏறிக் கொண்டே போகிறதே என்று வருத்தப் படாதீர்கள். மற்றொரு புறம் அரசியல்வாதிகளின் சொத்துக்களும் கடந்த ஐந்து வருடங்களில் பல மடங்குகள் ஏறிப் போயுள்ளன. ஒரு அமைச்சரின் சொத்து கடந்த ஐந்து வருடங்களில் 780 மடங்கு அதிகரித்துள்ளதாம்.

அரசியல் கட்சிகளிடையே வேற்றுமைகள் பல கண்டாலும் இந்த அரசியல்வியாதிகளிடையே என்ன ஒரு ஒற்றுமை பாருங்கள். ஊழலை ஒழிப்போம் என்றோ ஊழல் செய்பவர்களுக்குக் கடுமையான தண்டனை தரும் வகையில் சட்டத் திருத்தம் மேற்கொள்ள முயற்சி செய்வோம் என்றோ எந்த ஒரு அரசியல் கட்சியும் மறந்துகூட தங்கள் திருவாய் மலரவில்லை. என்னதான் திமுக மற்றும் அதிமுகவிடையே ஆயிரம் முரண்பாடுகள் கண்டாலும் இந்த ஒரு விசயத்தில் இரு கட்சிகளிடையே என்ன ஒரு ஒற்றுமை பாருங்கள். இதைக் காண அண்ணா இன்று உயிரோடு இருந்து இருந்தால் ஒரு கணம் மனம் பூரித்து தான் போயிருப்பார்.

நல்லவேளையாக அண்ணா இன்று நம்மிடையே இல்லை. அவர் மட்டும் உயிரோடு இருந்திருந்தால் "தன்மான திராவிடர்" பெயரால் கட்சி நடத்தும் இவ்விரு திராவிட கட்சிகளும் அவருக்கும் ஏதாவது இலவச வாக்குறுதி கொடுத்து தலையில் துண்டைப்போட்டு மூலையில் உட்கார வைத்திருக்கும்!


இந்நேரம்

///வேலை வாய்ப்புக்கான உத்தரவாதம், நீண்ட கால தொலை நோக்குத் திட்டங்கள், கல்வி
வளர்ச்சி, எல்லாருக்கும் எளிதில் கிடைக்கும் மருத்துவ முன்னேற்றம், தொழில்
மேம்பாடு போன்ற சமூக பிரச்னைகளை முன் வைக்காமல் தமிழர்களைப் பிச்சைக்
காரர்களாகக் கருதி அது இலவசம், இது இலவசம் என தமிழனின் தன்மானத்தை ஏலம்
போட்டுள்ளன///

மலேசியாவிலும் நிறைய தமிழர்கள் இப்படித்தான் இருக்கிறார்கள்.
இது என்ன பாவப்பட்ட சமுதாயமா? கேட்பாரற்று கிடக்கறதே, மாறுமா இந்த நிலை.

நல்ல பதிவு நண்பா பகிர்வுக்கு நன்றி