ஒருநாள் புரியும் (ச. யுனேசா )

Yunesha. S · Yunesha. S Sun Dec 03, 2023 11:26 pm

(கவிதை )

ஒருநாள் புரியும்!
___________________

வீதியோரமாய் ஒரு வண்டி
அதற்கு நான்கு சக்கரங்கள்
ஆறு ஆசனங்கள்
ஏறி அமர
அழகாய் பயணம் செய்ய
ஏதுவான ஒரு வண்டி!

வண்டியின் கீழே ஒரு நாய்!
அதன் கீழே நாய்க்கு அத்தனை வசதி!
நிற்கவும் முடியும்!
ஓடவும் முடியும்!
உறங்கவும் முடியும்!

சாரதி வந்து வண்டியில் அமர்ந்தால்;
முதலில் நாய் ஓடும்!
பின்னர் தான் வண்டி ஓடும்!
நாயின் பணி அதுவே!!

நாய்க்கு கொஞ்சம் கர்வம்!
சின்னதாய் ஒரு தலைக்கணம்!!
தன்னால்தான் அந்த வண்டி
ஓடுகின்றது என்று!!

சிங்கத்தைப் போல்
தன்னை எண்ணியது - அச்
செந்நாய்
அவ்வப்போது தான்
சுமந்து செல்லும்
வண்டியின் நிழலை பார்த்து!

ஒரு நாள்;
நெடிலாய் தொடர்ந்தது பயணம்!
தீயாய் எரித்தது வெயில்!
குறிலாய் போனது
நாயின் வேகம்! - இருப்பினும்
வண்டியோ ஓயவே இல்லை!
நாய்க்கு ஓடுவதைத் தவிர
வேறு வழியே இல்லை!!

நாக்கு வறண்டது!
தாகம் தலைக்கேறியது!
உடல் சோர்ந்தாலும்
உளம் சோரவில்லை,
உரிய இடம் செல்ல வேண்டுமென்று!!

ஓடியது!
ஓடியது!
ஓடிக்கொண்டே இருந்தது!!

ஓயாப் பயணத்தில்!
ஒரு கட்டத்தில்!
காலில் பட்ட குட்டை நீரில்!
வாய் நனைக்க நினைத்து
தன்னை மறந்து தலை குனிந்தது!
களைத்து நின்றது.!!

நிதானம் வெளிப்பட
நிமிர்ந்து பார்த்தது!
நிலை குலைந்து போனது!
தான் சுமந்து வந்த வண்டி
தன்னை விட்டு எங்கோ
நகர்ந்ததை எண்ணி!

அப்போது தான் புரிந்தது நாய்க்கு!
தானாய் ஓடிய வண்டியின் கீழ்
தான் ஓடிய கதை!
வண்டி தன்னால் ஓடவில்லை என்று!!

அந்த நாய் போலவே
வாழ்வில் சில மனிதர்களும்!
தானாக நடப்பவற்றை
தானே நடத்தியது போல்!!

நிசப்தமாய் நகரும் வாழ்க்கையை -தாம்
நிர்பந்தமாய் சுழற்றியது போல்!!
ஒரு நாள் புரியும்
எல்லாம்!
அந்த நாய்க்கு புரிந்தது போல்!!

**T.N.Balasubramanian** · **T.N.Balasubramanian** Thu Dec 07, 2023 11:53 am

அருமை.
இன்றுதான் படிக்கமுடிந்தது

மின்சாரம் இல்லை.
ரோடு முழுதும் நீர்.
sump ல் நீர் இருந்தும்
pump பண்ணவில்லை.
மின்சாரம் இல்லை.

ஆனந்திபழனியப்பன் · 29/03/2023

புரியுமா தோழரே அப்படியே புரிந்தாலும் அதை ஏற்றுக்கொள்ள மனமில்லாமல் இது என் கற்பனை நான் இல்லை என்றால் இங்கே எதுவுமே இல்லை என்று தனக்குள் ஒரு குறுகிய வட்டம் போட்டு அவர் மடிந்தாலும் பரவாயில்லை சுற்றி உள்ளவர்களையும் சேர்த்து உள்ளே இழுத்து விடுகிறார்களே இப்படியே பலபேர் தன் சுயத்தை இழந்து வாழ்கிறார்கள் சுயமாகவும் யோசிக்காமல் நல்லவர்களின் கூற்றுக்கும் செவிசாய்காமல் வாழ்ந்து முடித்து விடுகிறார்கள் தோழரே