வாழ்க்கை நொடிக்கு ஒரு பாடத்தைக் கற்றுக் கொடுக்கின்றது. அவற்றுள் சில.

**ayyasamy ram** · **ayyasamy ram** Sun Dec 17, 2023 4:52 pm

உன் வாழ்க்கையை குறை கூறும் யாராலும்
உன் வாழ்க்கையை ஒரு நொடி கூட வாழ இயலாது.
எனவே அடுத்தவர் வாழ்வை நீயும் குறை கூறாதே!
-
அனுதாபத்திலோ அல்லது உணர்ச்சி வேகத்திலோ
முடிவும் எடுக்காதே உதவியும் செய்யாதே
இரண்டையும் நினைத்து ஒரு நாள் நிச்சயம் வருந்துவாய்.
-
சின்னச் சின்ன சந்தோசங்களை அப்போதே அனுபவித்து விடு.
பின்னாளில் நீ தேடினாலும் அது கிடைப்பது அரிது.
-
யாரைப் பற்றியும் புறம் பேசாதே
உன்னைப் பற்றியும் பேச சிலர் இருப்பார்கள்
-
கடன் கிடைக்கிறதே என வாங்கும் முன் பலமுறை
யோசித்துக் கொள். கடன் வாங்கும் போது இருக்கும் வேகம்
திரும்பக் கொடுப்பதிலும் இருக்க வேண்டும்.
-
வருமானத்தில் ஒரு சதவீதமாவது சேமித்துக் கொள்.
உன் சம்பளத்தை விட சேமிப்பு உன்னை காத்திடும்.
-
கையில் பணமிருக்கும் போது ஆடிடாதே. ஆடினால் அசதியில்
ஒருநாள் தள்ளாடி விழுவாய்.
-
எளிமையாய் வாழ்ந்திடப் பழகிக் கொள்.
ஏனெனில் நீ எதையும் இங்கு வரும் போது கொண்டுவரவில்லை.
போகும் போது எதுவும் கொண்டு செல்லப் போவதுமில்லை.
-
உனக்கு ஒன்று நிகழவில்லை என எப்போதும் வருத்தம் கொள்ளாதே!
அதைவிட சிறப்பான ஒன்று உனக்காக காத்திருக்கும்.
-
கோபத்தைக் காட்டிடக்கூட காலம் தாழ்த்து
ஆனால் அன்பைக் காட்டிட நொடிப் பொழுதையும் தாமதிக்காதே!
-
உனக்கு எளிதாகக் கிடைக்கும் ஒன்று உன்னைப் போன்ற ஒருவனுக்கு
பல போராட்டங்களுக்குப் பின்னே கிடைக்கும்.
எனவே கிடைப்பவற்றை மதித்துப் பழகு.
-
எவ்வளவு குழப்பம் வந்தாலும் கலங்கிடாதே
குழப்பங்கள் வருவதே தெளிவடையத்தான்!
-
உன்னால் எவ்வளவு முடியுமோ அவ்வளவு முயற்சி செய்
ஏனெனில் மூச்சு கூட முயன்றால் மட்டுமே வரும்.
-
யாரையும் குறைத்து எடை போடாதே!
வாழ்வில் நீ முழுமையாக எதையும் கற்று முடிக்கவில்லை.
-
வாழ்க்கையை அனுபவித்து வாழப் பழகிடு.
ஏனெனில் உன் இன்பத்தையும் துன்பத்தையும் உன்னைத் தவிர
யாராலும் அனுபவிக்க இயலாது.
-
இதுபோல இன்னும் பலவற்றை வாழ்க்கை நொடிக்கு நொடி கற்றுக்
கொடுத்துக் கொண்டே இருக்கும்.
-
-கமல் ராஜ் ராஜேந்திரன் - தமிழ் கோரா