உன்னால் முடியும்!

Yunesha. S · Yunesha. S Sat Nov 18, 2023 1:41 am

உன்னால் முடியும்!
-----------------------------------

உனக்குள்ளேயே எல்லாம் இருக்கும்! -நீ
உந்தமொன்று கொடுக்கும் வரை அவை
உறங்கிக் கொண்டேதான் இருக்கும்!!

எல்லாமும் நீ அறிவாய்!
எதிலும் நீ துப்பறியும் போது!!
வெற்றியும் உன்னுள்!
வெகுண்டெழும் கோபமும் உன்னுள்!
சத்தியம் காக்கும் குணத்தோடு
சாந்தமும் உன்னுள்!
முற்றிய அறிவோடு
முடங்கிய கனவுகள் உன்னுள்!
எல்லாமே உன்னுள்!!

அத்தனைக்கும் உயிர்கொடு!
அன்று ;
நீயே தலைவன்!
நீயே கலைஞன்!
நீயே மனிதன்!
ஆம்,
நீயே மனிதன்!!

இன்னும்
எத்தனை!
எத்தனை! எத்தனை!
அத்தனையும் உன்னுள்!!

எதை நீ எண்ணுகிறாயோ
அதுவாகவே ஆகிவிடுகிறாய்!
உன்னை நீ தாழ்த்ததே!
எண்ணத்தில் உயர்வு வை!
அது உன்னை எங்கோ உயர்த்தும்!

தப்பிப் பிழைக்க நினைக்காதே!
எதற்கும் துணிந்து நில்!
போராட்டம் இல்லா வெற்றியில் சுவாரசியம் இல்லை!
ஊசலாடும் எண்ணங்களோடு
ஒருநிமிடம் போராடு!
ஊமையான உணர்வுகளுக்கு
உயிர்கொடு!
உன்னை நீயே தட்டியெழுப்பு!
உடலுக்கே ஓய்வு தேவை!
உயிருக்கோ,
உணர்வுக்கோ அல்ல!!
உன்னை நீயே செதுக்கு!
உன்னால் முடியும்!
ஆம்,
உன்னால் மட்டுமே முடியும்!!

ச. யுனேசா