தி.மு.க. -வின் ஊழல்களுக்கு இரையாகும் சிறு தொழில்கள் - அண்ணாமலை

சென்னை 'தி.மு.க., செய்து வரும் ஊழல்களுக்கு குறு, சிறு தொழில்கள் இரையாவதை எப்படி அனுமதிக்க முடியும்?' என, தமிழக பா.ஜ., தலைவர் அண்ணாமலை கேள்வி எழுப்பியுள்ளார்.

அவரது அறிக்கை:

கடந்த ஆண்டு அனைத்து நுகர்வோர்களுக்குமான மின் கட்டணத்தை, 50 சதவீதம் வரை தி.மு.க., அரசு உயர்த்தியது.

அப்போதைய மின் துறை அமைச்சர் ஊழல் செய்வதில் கவனமாக இருந்ததால், பெயரளவுக்கு சிறிய மாற்றத்துடன் கட்டண உயர்வை அமல்படுத்தி விட்டார்.

அதன் விளைவாக இன்று, தமிழகம் முழுதும் உள்ள குறு, சிறு தொழில் நிறுவனங்கள் கடும் நிதி நெருக்கடியில் உள்ளன. பல ஆயிரம் நிறுவனங்கள் முடங்கி விட்டன.

கடந்த 2022 செப்., உயர்த்திய மின் கட்டணத்தையே தொழில் நிறுவனங்கள் தாங்கிக் கொள்ள முடியாத நிலையில், இந்தாண்டு ஜூலையில் மின் கட்டணத்தை மீண்டும் 2.4 சதவீதம் உயர்த்தி இருக்கிறது, ஊழல் தி.மு.க., அரசு.

இதை கண்டித்து, கோவை, ஈரோடு, திருப்பூர் மாவட்ட நுாற்பாலைகள் வேலைநிறுத்தம் அறிவித்தன.

மின் கட்டண உயர்வை எதிர்த்து நடந்து வரும் போராட்டங்களின் தொடர்ச்சியாக, கோவை, திருப்பூர், ஈரோட்டைச் சேர்ந்த, 72 தொழில் அமைப்புகள் ஒன்று சேர்ந்து, தமிழக தொழில் துறை மின் நுகர்வோர் என்ற கூட்டமைப்பை உருவாக்கி, இம்மாதம் 7ல் பல்லடம், காரணம்பேட்டையில் கவன ஈர்ப்பு உண்ணாவிரதம் நடத்தின.

மாநிலம் முழுதும், 30 லட்சம் பேருக்கு வேலைவாய்ப்பு அளிக்கும் நிறுவனங்கள் சார்பில் போராட்டம் நடப்பதாகவே நாம் எடுத்துக் கொள்ள வேண்டும். இதை முதல்வர் கண்டுகொள் ளாமல் இருப்பது மிகுந்த வேதனை அளிக்கிறது.

கடந்த ஆண்டு வரை கிலோ வாட்டிற்கு 35 ரூபாயாக இருந்த நிலை கட்டணத்தை, 562 ரூபாய் வரை உயர்த்தியதை திரும்ப பெற வேண்டும் என்பது உட்பட ஐந்து கோரிக்கைகளும் மிகவும் நியாயமானவை.

தி.மு.க., செய்து வரும் ஊழல்களுக்கு குறு, சிறு தொழில்கள் இரையாவதை எப்படி அனுமதிக்க முடியும்? தொழில் துறையினரின் கோரிக்கைகளுக்கு, பா.ஜ., சார்பில் முழு ஆதரவு தெரிவிக்கிறோம்.

உடனே தமிழக தொழில் துறை மின் நுகர்வோர் கூட்டமைப்பின் கோரிக்கைகளை ஏற்று, அவற்றை நடைமுறைப்படுத்த முன் வர வேண்டும்.

இவ்வாறு அறிக்கையில் கூறியுள்ளார்.