குருப்பெயர்ச்சியால் நன்மை அடையும் ராசிகள்

குருபகவானின் இந்த இடப் பெயர்ச்சியால் எந்த ராசிக்காரர்களுக்கு நன்மை, பரிகாரம் செய்ய வேண்டிய ராசிகள் எவை, நன்மை தீமை இரண்டும் கலந்து பலன்பெறும் ராசிகள் எவை என்று தெரிந்துகொள்வோம்.

சோபகிருது வருஷம் உத்திராயணம் சிசிரருது முடிந்து வஸந்து ருது சித்திரை மாதம் 9ம் நாள் இதற்குச் சரியான ஆங்கில தேதி 22.04.2023 சுக்லபட்சம் துவிதியை திதி, சனிக்கிழமையும் சித்தயோகமும் கூடிய சுபயோக சுபதினத்தில் குரு பகவான் திருக்கணித பஞ்சாங்கத்தின்படி அதிகாலை 5.14 மணிக்கும், வாக்கிய பஞ்சாங்கத்தின்படி இரவு 11.26 மணிக்கும் மீன ராசியிலிருந்து மேஷ ராசிக்கு இடம் பெயர்ச்சி ஆகிறார்.

மேஷ ராசிக்கு வரும் குரு பகவான் தொடர்ந்து 1 வருட காலத்திற்கு இந்த ராசியில் சஞ்சாரம் செய்து அருளாசி வழங்குவார்.

தற்போது மாறக்கூடிய குருபகவான் எந்த ஸ்தானத்தை பார்க்கிறாரோ அந்த ஸ்தானம் பலமும், விருத்தியும் அடைகிறது. குரு பார்வை சர்வ தோஷ நிவர்த்தி. குருவுக்கு 5,7,9 ஆகிய பார்வைகள் உள்ளன. அதாவது குரு இருக்கும் இடத்தில் இருந்து 5,7,9 ஆகிய இடங்களை பார்வையிடுகிறார். ஐந்தாம் பார்வையும், ஒன்பதாம் பார்வையும் சிறப்புப் பார்வைகளாகும்.

நன்மை பெறும் ராசிகள்: சிம்மம் - துலாம் - தனுசு - மீனம்

பரிகாரத்தின் மூலம் பயன் பெறும் ராசிகள்: ரிஷபம் - கன்னி - விருச்சிகம்

நன்மை தீமை இரண்டும் கலந்துபெறும் ராசிகள்: மேஷம் - மிதுனம் - கடகம் - மகரம் - கும்பம்

தோஷம் பெறும் ராசிக்காரர்கள் இன்று இரவோ அல்லது நாளை காலையோ அருகில் இருக்கும் கோயிலுக்குச் சென்று குருவுக்கு வஸ்திரம் சாத்தி, முறையான பரிகாரம், குரு சாந்திக்கான அர்ச்சனை செய்துகொள்ளலாம்.

குருவிற்கு உண்டான பரிகாரம், ஹோமம் மற்றும் பூஜைகளில் பங்கேற்பதாலும், கல்வி பயிலும் மாணவர்களுக்கு கல்வி உதவிகளை அளிப்பதாலும், பெரியோர்களிடம் ஆசி பெறுவதாலும் அசுப பலன்களின் தாக்கத்தில் இருந்து விடுபடலாம்.

குருப்பெயர்ச்சியில் ஏற்படும் சுப பலன்களை அவரவர் ஜென்ம ஜாதகத்தில் உள்ள தசா புத்திக்கு ஏற்ப குருபகவான் அளிப்பார். அதாவது தசா புத்தியானது உங்களுக்கு சாதகமாக இருந்தால், அதிகளவு நன்மையையும், குறைந்தளவு தீமையும் தரவல்லவர்.

குரு பெயர்ச்சியை முன்னிட்டு, தமிழகத்தில் உள்ள குரு பகவான் ஸ்தலங்களில், அறநிலையத் துறை சார்பில் சிறப்பு வழிபாடு நடத்தப்பட்டது.

நவ கிரகங்களில் சுப கிரகமான குரு பகவான், ஆண்டுக்கு ஒரு முறை, ஒரு ராசியில் இருந்து மற்றொரு ராசிக்கு இடம் பெயர்கிறார்.

இந்த ஆண்டு, மீன ராசியில் இருந்து மேஷ ராசிக்கு நேற்று இடம் பெயர்ந்தார்.

இதை முன்னிட்டு, தமிழகத்தில் உள்ள குரு பகவான் ஸ்தலங்களில், அறநிலையத் துறை சார்பில் வழிபாடு நடத்தப்பட்டது. நவ கிரக ஸ்தலங்களில், திருவாரூர் மாவட்டம், ஆலங்குடி குரு ஸ்தலமாக விளங்குகிறது.

இத்தலத்து சிறப்புடைய குரு தட்சிணாமூர்த்தி, தெற்கு நோக்கி அமர்ந்துள்ளார். அங்கு சிறப்பு வழிபாடு நடத்தப்பட்டது.

சென்னை பாடியில் மேற்கு நோக்கி அருள் பாலிக்கும் லலிதாயநாதர் கோவில், திருவொற்றியூரில் வடக்கு நோக்கி அருள் பாலிக்கும் தட்சிணா மூர்த்தி சன்னிதி, சிவகங்கை மாவட்டம், பட்டமங்கலத்தில் கிழக்கு நோக்கி அருள் பாலிக்கும் தட்சிணாமூர்த்தி சன்னிதி, இழுப்பக்குடி வாலகுருநாதர் கோவில் ஆகியவற்றிலும் சிறப்பு வழிபாடு நடத்தப்பட்டது.

தஞ்சை அடுத்துள்ள தென்திட்டை கோவிலில் குரு பெயர்ச்சி விழாவும், அதை முன்னிட்டு லட்சார்ச்சனையும், குரு பரிகார ஹோமங்களும் நடந்தன.

மேலும், சோழவந்தான் அடுத்த குருவித்துறை சித்திர ரத வல்லப பெருமாள் கோவில், அகரம், கோவிந்தவாடி கோவில், வேலுாரை அடுத்த தக்கோலம் கோவில், திருச்செந்துார் முருகன் கோவில்.

ஆழ்வார்திருநகரி கோவில் ஆகியவற்றிலும் குரு பெயர்ச்சியை முன்னிட்டு, அறநிலையத் துறை சார்பில் சிறப்பு வழிபாடு நடத்தப்பட்டது; ஏராளமான பக்தர்கள் தரிசனம் செய்தனர்.