பாதாம் பிசின்

**சிவா** · **சிவா** Tue Apr 11, 2023 5:33 pm

கோடைக்காலம் வந்துவிட்டது இதனால் உடல் சூடு, கண் எரிச்சல் போன்றவை ஏற்படும். கோடையின் தாக்கத்தில் உடற்சூட்டிலிருந்து பாதுகாத்துக் கொள்ள சிறந்த தீர்வாக அமைகிறது பாதாம் பிசின். பாதாம் மரத்திலிருந்து வடியும் பசை போன்ற வெண்மை கலந்த பழுப்பு நிறத்தில் காணப்படும் பிசினே பாதாம் பிசின் ஆகும். பாதாம் பிசினில் புரதம், வைட்டமின் மற்றும் தாதுக்கள் உள்ளன. பாதாம் பிசின் பாரம்பரிய மருத்துவத்திலும் பயன்படுகிறது. இந்த பாதாம் பிசினை குளிர்பானங்களில் சுவைக்காக பயன்படுத்துகின்றனர். மேலும், ஜெல்லி, மில்க் ஷேக், ஆரோக்கிய பானங்கள், இனிப்புகள், ஜிகர்தண்டா போன்றவற்றில் இந்த பாதாம் பிசின் சேர்க்கப்படுகிறது.

உடல் சூடு தணியும்

பாதாம் பிசின் இயற்கை உடல் குளிரூட்டியாக இருப்பதால், கோடையில் உடலை குளிர்ச்சியாக வைத்திருக்க உதவுகிறது. வெப்பத்தினால் கண்கள் சிவப்பது, உடலில் எரிச்சல் போன்ற சில அறிகுறிகள் இருந்தால், அதிலிருந்து விடுபட பாதாம் பிசின் உதவும். சிலருக்கு உடல் சூடு காரணமாக சதைப் பிடிக்காமல் இருக்கும். அவர்களுக்கு தினசரி சிறிதளவு பாதம் பிசின் உட்கொள்வது சூட்டை குறைத்து உடல் எடையை கூட்ட உதவும்.

பிரசவத்துக்கு பின்

பெண்களின் பிரசவத்திற்கு பின், அவர்களது உடலில் குறைந்துவிட்ட ஊட்டச்சத்துக்களை மீட்டெடுக்க பாதாம் பிசின் கலந்த உணவு அல்லது மருந்து பொருட்கள் தரப்படுகிறது. இதனால் பெண்கள் மகப்பேறுக்கு முன்பு இருந்த நிலையை எளிதில் அடைவதற்கு பாதம் பிசின் உதவுகிறது.

ஆக்ஸிஜனேற்றி

பாதாம் பிசின் ஒரு அற்புதமான ஆக்ஸிஜனேற்றி ஆகும். இதை தொடர்ந்து உட்கொள்ளும் போதும் முதுமை தோற்றத்தை ஏற்படுத்தும் ஃப்ரீ ரேடிக்கல்களை எதிர்த்துப் போராட உதவுவதுடன், இளமை தோற்றத்தை தக்க வைக்கவும் உதவுகிறது.

சிறுநீரகப் பிரச்னைகள்

கோடைக்காலங்களில் உடலில் நீர்வறட்சி மற்றும் சிலருக்கு நீர்ச்சுருக்கு ஏற்படுகிறது. மேலும், சிறுநீரக பைகளில் அடைப்பு ஏற்பட்டு சிறுநீரக சரியாக கழிக்க முடியாத நிலையும் உண்டாகிறது. ஊறவைத்த பாதாம் பிசினை சாப்பிட்டு வந்தால் சிறுநீர் அடைப்பு நீங்கி, சிறுநீர் நன்கு வெளியேறும். இதனால் கோடையில் ஏற்படும் நீர்வறட்சி மற்றும் நீர்ச்சுருக்கு போன்றவை நீங்கும்.

வெள்ளைப்படுதல்

பெண்களுக்கு ஏற்படும் வெள்ளைப்படுதல் பிரச்னை குணமாக மூன்று நாட்கள் தினமும் காலை, மாலை, இரவு என மூன்று வேளையும் ஊறவைத்த பாதாம் பிசின் ஒரு டீஸ்பூன் அளவு எடுத்து அப்படியே சாப்பிட்டு வர, வெள்ளைப்படுதல் குணமாகும்.

காயங்கள் ஆற்றும்

தண்ணீரில் ஊற வைத்த பாதாம் பிசினை சிறிது உள்ளங்கையில் எடுத்து நன்றாக குறைத்து புண்கள், காயங்கள் மீது தடவி வந்தால், அவை விரைவாக ஆறும்.

முடி உதிர்வு

மன அழுத்தம், மோசமான ஊட்டச்சத்து, ஹார்மோன் மாற்றங்கள் மற்றும் முதுமை போன்றவற்றால் ஏற்படும் முடி உதிர்தல் பிரச்னைக்கு பாதாம் பிசின் தீர்வளிக்க உதவுகிறது. பாதாம் பிசின் உச்சம் தலையில் ரத்த ஓட்டத்தை தூண்டும், இது முடியின் புதிய வளர்ச்சியை ஊக்குவிக்கிறது.

எலும்புகளை பலப்படுத்துகிறது

பாதாம் பிசினில் உள்ள கால்சியம் எலும்புகளை பலப்படுத்துகிறது. இதிலுள்ள வைட்டமின் கே எலும்பு உருவாக்கத்தில் பங்கு வகிக்கிறது. பாஸ்பரஸ் ஆரோக்கியமான பற்கள் மற்றும் எலும்புகளை ஊக்குவிக்கிறது. இதிலுள்ள மெக்னீசியம் உடலுக்கு வலிமை தருகிறது.

எச்சரிக்கை

அதிகப்படியான பாதாம் பிசினை உட்கொள்வது சிலருக்கு இறப்பை பிரச்னைகளை ஏற்படுத்தும். எந்த ஒரு மூலிகையும் மருந்துகளையும் எடுத்துக் கொள்ளும் முன் மருத்துவர் அல்லது உணவியல் நிபுணர் ஆலோசனை பெறுவது அவசியம்.

குறிச்சொற்கள் #பாதாம்_பிசின் #Almond_gum

தினமலர்