ஆன்லைன் ரம்மி தடை சட்ட மசோதா; தமிழக ஆளுனர் ஒப்புதல்

தமிழ்நாடு சட்டப்பேரவையில் இரண்டாவது முறையாக நிறைவேற்றப்பட்ட ஆன்லைன் சூதாட்ட தடை சட்ட மசோதாவிற்கு ஆளுனர் ஆர்.என்.ரவி ஒப்புதல் அளித்துள்ளார்.

ரம்மி உள்ளிட்ட ஆன்லைன் சூதாட்டத்தால் ஏராளமானவர்கள் பணத்தை இழந்து, தங்கள் உயிரை இழந்து வருகின்றனர். எனவே ஆன்லைன் சூதாட்டத்தை தடை செய்யும் வகையில், ஆன்லைன் சூதாட்ட தடை சட்ட மசோதா தமிழக சட்டசபையில் கடந்த 2022-ம் ஆண்டு அக்டோபர் மாதம் 19- ஆம் தேதி தாக்கல் செய்யப்பட்டு, கவர்னருக்கு அனுப்பப்பட்டது. இதுகுறித்து ஓய்வு பெற்ற நீதிபதி சந்துரு தலைமையில் குழு ஒன்று அமைக்கப்பட்டு, அந்த குழு அளித்த பரிந்துரையின் அடிப்படையில் இந்த தீர்மானம் கொண்டு வரப்பட்டது.

ஆனால் இந்த சட்டத்திற்கு ஒப்புதல் அளிக்காமல் கவர்னர் காலம் தாழ்த்தி வந்தார். இதனையடுத்து ஆளும் கட்சி உள்ளிட்ட தமிழக அரசியல் கட்சிகள் மசோதாவுக்கு ஒப்புதல் அளிக்க ஆளுரை வலியுறுத்தின. இந்தநிலையில், ஆன்லைன் சூதாட்ட தடை சட்ட மசோதாவை இயற்ற, தமிழக அரசுக்கு அதிகாரம் இல்லை என்று கூறி கடந்த 6- ஆம் தேதி, சட்ட மசோதாவை அரசுக்கு கவர்னர் ஆர்.என்.ரவி திருப்பி அனுப்பினார். இதற்கு தமிழக அரசியல் கட்சி தலைவர்கள் கடும் கண்டனத்தை தெரிவித்தனர்.

இதைத்தொடர்ந்து, ஆன்லைன் சூதாட்ட தடை சட்ட மசோதாவை மீண்டும் சட்டசபையில் நிறைவேற்றி கவர்னர் ஒப்புதலுக்கு அனுப்ப தமிழக அமைச்சரவை முடிவு செய்தது. அதன்படி, கவர்னர் ஆர்.என்.ரவி திருப்பி அனுப்பிய ஆன்லைன் சூதாட்ட தடை சட்ட மசோதாவை கடந்த 23-ம் தேதி சட்டசபையில் முதலமைச்சர் மு.க.ஸ்டாலின் மீண்டும் தாக்கல் செய்தார். இந்த மசோதா ஒரு மனதாக நிறைவேறியது.

இந்தநிலையில், 2 ஆவது முறையாக சட்டமன்றத்தில் நிறைவேற்றிய மசோதா கவர்னருக்கு அனுப்பப்பட்ட நிலையில் மசோதாவிற்கு கவர்னர் ஆர்.என்.ரவி ஒப்புதல் அளித்துள்ளார். ஆளுநர் ஒரு மசோதாவுக்கு ஒப்புதல் அளிக்காமல் காலம் தாழ்த்துகிறார் என்றால், அதற்கு நிராகரிக்கப்பட்டது என்று பொருள் என ஆர்.என்.ரவி அண்மையில் பேசியிருந்த நிலையில், தமிழக சட்டப்பேரவையில் தமிழக ஆளுநருக்கு எதிராக முதலமைச்சர் மு.க.ஸ்டாலின் தனித்தீர்மானம் ஒன்றை சட்டப்பேரவையில் கொண்டு வந்தார். சட்டப்பேரவையில் கவர்னருக்கு எதிராக முதலமைச்சர் தனி தீர்மானம் நிறைவேற்றிய நிலையில் மசோதாவுக்கு ஒப்புதல் அளிக்கப்பட்டுள்ளது.

கவர்னரின் ஒப்புதலை தொடர்ந்து ஆன்லைன் சூதாட்டம் தடைச்சட்டம் விரைவில் நடைமுறைக்கு வருகிறது. சட்டத்தின்படி ஆன்லைனில் ரம்மி விளையாடினால் 3 மாதங்கள் சிறை தண்டனை விதிக்க சட்டத்தில் வழிவகை செய்யப்பட்டுள்ளது. மேலும், 5 ஆயிரம் அபராதம் அல்லது 3 மாத சிறை தண்டனையுடன் அபராதமும் சேர்த்து விதிக்கப்படும்.

சென்னை: சட்டசபையில் நிறைவேற்றப்படும் மசோதாக்களுக்கு விரைவில் ஒப்புதல் வழங்க கவர்னருக்கு, ஜனாதிபதியும், மத்திய அரசும் அறிவுரை வழங்க வேண்டும் என வலியுறுத்தும் அரசின் தனித்தீர்மானம் சட்டசபையில் தீர்மானம் ஒரு மனதாக நிறைவேறியது.

இந்த தீர்மானத்தை முன்மொழிந்து பேசிய முதல்வர் ஸ்டாலின், கவர்னர் மீது தாக்குதல் கணைகளை தொடுத்தார். அரசியல்வாதியாக பேசுகிறார். தமிழக அரசுக்கு எதிராக பேசுகிறார் என குற்றம் சாட்டினார்.

கடந்த சில நாட்களுக்கு முன்னர் கவர்னர் மாளிகையில் நடந்த நிகழ்ச்சியில், கவர்னரின் பணிகள் குறித்து மாணவர்கள் எழுப்பிய கேள்விகளுக்கு பதிலளித்து கவர்னர் ரவி கூறும்போது, சட்டசபை அதிகாரம் முதல் ஸ்டெர்லைட் ஆலை வரை தெரிவித்த பல கருத்துகள் சர்ச்சையை ஏற்படுத்தியது.

தீர்மானம்

இந்நிலையில், கவர்னரின் செயல்பாடு தொடர்பாக அரசு சார்பில் தமிழக சட்டசபையில் தனித்தீர்மானம் கொண்டு வர முடிவு செய்யப்பட்டது. கவர்னர் தொடர்பாக சட்டசபையில் விவாதிக்கக்கூடாது என்ற விதிகளை தளர்த்துவதற்கான தீர்மானம் சட்டசபையில் நிறைவேற்றப்பட்டது.

இதன் பின் ரவிக்கு எதிராக முதல்வர் ஸ்டாலின் கொண்டு வந்த தீர்மானத்தில், சட்டசபையில் நிறைவேற்றி அனுப்பப்படும் மசோதாக்களுக்கு கவர்னர் ஒப்புதல் வழங்க குறிப்பிட்ட கால நிர்ணயம் செய்ய, மத்திய அரசையும், ஜனாதிபதியையும் வலியுறுத்தும் தனித்தீர்மானத்தை கொண்டு வந்தார்.

அரசியல்வாதியாக பேசுவதா ?

இந்த தீர்மானத்தை முன்மொழித்து ஸ்டாலின் பேசியதாவது: மக்களுக்கு கொடுத்த வாக்குறுதிகளை நிறைவேற்றும் பொறுப்பு மாநில அரசுக்கு உண்டு.மக்கள் நலனுக்கு கொண்டு வரும் மசோதாக்களை கிடப்பில் போடுவதால் வருத்தம் ஏற்படுகிறது. நாட்டுக்கு கவர்னர் தேவையில்லை என்ற போதும், பதவிக்கான மரியாதையை கொடுக்க தவறவில்லை. மக்களுக்கும் அரசுக்கும் வழிகாட்டியாக, நண்பராக கவர்னர் இருக்க வேண்டும் என உச்சநீதிமன்ற தீர்ப்பு உள்ளது. அரசியல் கட்சி கண்ணோட்டத்தில் செயல்பட்டு வருகிறார். கவர்னர் என்ற நிலையை தாண்டி அரசியல்வாதியாக பேசுகிறார். தமிழக அரசுக்கு எதிராக பேசுவதை நோக்கமாக கொண்டுள்ளார். கவர்னர் பற்றற்ற அடையாளம் உள்ளவராக இருக்க வேண்டும்.

சட்டசபையில் இயற்றப்படும் மசோதாக்களுக்கு ஒப்புதல் அளிக்க வேண்டும். கவர்னர் என்ற நிலை மாறி அரசியல்வாதியாக கவர்னர் பேசுகிறார். தமிழக மக்களின் நலனுக்கு குறுக்கே நிற்கிறார். மதச்சார்பின்மைக்கு எதிராக பேசுகிறார். சட்டசபையை அவமதிக்கிறார். வகுப்புவாத சக்திகளுக்கு ஊதுகுழலாக உள்ளார். ராஜ்பவனை அரசியல்பவனாக மாற்றி வருகிறார். கவர்னரின் தனிப்பட்ட செயல்பாடுகளை தான் விமர்சிக்கிறோம்.

வேடிக்கை பார்க்க மாட்டோம்

கவர்னர் பேசி வந்த கருத்துகளுக்கு பதிலுக்கு பதில் சொல்ல சட்டசபையை அரசியல்மன்றமாக மாற்ற விரும்பவில்லை. சட்டசபைக்கு அரசியல்நோக்கத்தோடு இடைஞ்சல் கொடுக்க நினைத்தால், வேடிக்கை பார்த்து கொண்டு இருக்க மாட்டோம். கவர்னர் கூறுவதை நம்பும் அளவுக்கு தமிழக மக்கள் ஏமாளிகள் அல்ல.

மாநில மக்களின் குரலாக விளங்கும் சட்டசபையில் நிறைவேற்றப்பட்ட மசோதாக்களுக்கு ஒப்புதல் வழங்க குறிப்பிட்ட காலக்கெடு வழங்க ஜனாதிபதி, மத்திய அரசுயை வலியுறுத்துவது என்றும், சட்டசபையில் நிறைவேற்றும் மசோதாக்களுக்கு ஒப்புதல் வழங்க கவர்னருக்கு உரிய அறிவுரைகளை, ஜனாதிபதியும் , மத்திய அரசும் வழங்க வேண்டும் என வலியுறுத்துகிறேன். இவ்வாறு ஸ்டாலின் பேசினார்.

நிறைவேற்றம் தொடர்ந்து அனைத்து கட்சி தலைவர்கள் பேசியதை தொடர்ந்து அரசின் தனித்தீர்மானம் சட்டசபையில் நிறைவேறியது.

சட்டசபை எதிர்க்கட்சி துணைத்தலைவர் பதவியில் இருந்து பன்னீர்செல்வத்தை நீக்க வேண்டும் என தெரிவித்தும், சபாநாயகர் கண்டுகொள்ளவில்லை. எதிர்க்கட்சி எம்.எல்.ஏ.,க்கள் பேசுவது அவைக்குறிப்பில் இருந்து நீக்கப்படுவதை கண்டித்தும் அ.தி.மு.க., வெளிநடப்பு செய்தனர். எதிர்க்கட்சி தலைவர் பேசுவது நேரடி ஒளிபரப்பு செய்வது இல்லை. முதல்வர், அமைச்சர்கள் பேசுவது மட்டும் தான் நேரடி ஒளிபரப்பு செய்யப்படுகிறது என்றும் குற்றம்சாட்டினர்.