போலிப் பட்டியல், பொய்க் கணக்கு, ஒரு கோடி உறுப்பினர் சேர்க்கை, இலக்கை எட்டுமா தி.மு.க?

நாங்கள் இளைஞர்கள் என்பதால், தொகுதியில் சீனியர்கள் யாருமே ஒத்துழைப்பு கொடுப்பதில்லை. `உங்களுக்கு என்ன தெரியும்... நாங்கள் சொல்வதைக் கேளுங்கள்’ என்ற தொனியிலேயே பேசுகிறார்கள். ‘உடன்பிறப்புகளாய் ஒன்றிணைவோம்’ என்ற பெயரில் தமிழ்நாடு முழுவதும் ஒரு கோடி உறுப்பினர்களைச் சேர்க்கும் பணியை ஏப்ரல் 2-ம் தேதி கொளத்தூரில் தொடங்கிவைத்திருக்கிறார் தி.மு.க தலைவர் மு.க.ஸ்டாலின். ஜூன் 3-ம் தேதிக்குள் இலக்கை எட்ட உத்தரவிட்டிருக்கும் தலைமை, இந்தப் பணிகளைக் கண்காணிக்க 234 தொகுதிப் பார்வையாளர்களையும் நியமித்திருக்கிறது. களத்தில் இருக்கும் பிரச்னைகள் என்னென்ன... உறுப்பினர் சேர்க்கை எப்படி நடக்கிறது என்ற விசாரணையில் இறங்கினோம்.

தி.மு.க உறுப்பினர் சேர்க்கை!

முதலில் தி.மு.க உறுப்பினர் சேர்க்கை எப்படி நடக்கிறது என தி.மு.க தேர்தல் பணிக்குழுச் செயலாளர் ஒருவரிடம் பேசினோம். “நாடாளுமன்றத் தேர்தலுக்குக் கட்சியைத் தயார்படுத்தும் வேலைதான் இது. ஆனால், அப்படிச் சொன்னால், தேர்தலுக்கு இன்னும் ஓராண்டு இருக்கிறது என நிர்வாகிகள் மெத்தனமாக இருந்துவிடுவார்கள் என்பதால்தான், `கலைஞரின் நூற்றாண்டை ஒட்டி உறுப்பினர் சேர்க்கை’ எனச் சொல்லியிருக்கிறோம். இப்போதே பலரும் வேலையைத் தொடங்கிவிட்டார்கள். ஆளுங்கட்சியாக இருப்பதால் இன்றைய சூழலில் இரண்டு மாதங்களுக்குள் ஒரு கோடி உறுப்பினர்களைச் சேர்ப்பது எங்களுக்குப் பெரிய விஷயம் இல்லை.

பா.ஜ.க-போல இல்லாமல் முறையான உறுப்பினர் சேர்க்கையாக இருக்க வேண்டும் என்பதால், வாக்காளர் அடையாள அட்டை கட்டாயம் என்றும், இன்னும் வாக்காளர் அட்டை பெறவில்லையென்றால் அடுத்த தேர்தலில் வாக்களிக்க வசதியாக, குறைந்தது 17 வயது பூர்த்தி அடைந்தவராக இருக்க வேண்டும் என்றும் அறிவுறுத்தப்பட்டிருக்கிறது. அதேபோல பூத் கமிட்டி உறுப்பினர் சேர்க்கையிலும், 10 வாக்காளருக்கு ஒரு தி.மு.க உறுப்பினர் என நியமிக்கச் சொல்லியிருக்கிறோம். அதே நேரத்தில் ஒரு குடும்பத்திலிருந்து ஒருவரை மட்டுமே பூத் கமிட்டிக்கு நியமிக்க வேண்டும் என்ற விதியும் இருக்கிறது” என்றார் அவர்.

குளறுபடிகள்!

உறுப்பினர் சேர்க்கையில் இருக்கும் பிரச்னைகள் குறித்து சுற்றுச்சூழல் அணி நிர்வாகி ஒருவரிடம் பேசினோம். “ஒவ்வொரு தொகுதியிலும் மாவட்ட, ஒன்றிய, நகர, பேரூர் கழகக் கூட்டங்களை நடத்தி, உறுப்பினர் சேர்க்கை முகாம்களை முறையாக நடத்த ஆலோசனை வழங்கப்பட்டிருக்கிறது. உறுப்பினர் சேர்க்கையின் முதல் படியாக, பூத் கமிட்டிக்கு உறுப்பினர்களை நியமித்துவருகிறோம். பெரும்பாலும் இளைஞர்கள் நியமிக்கப்பட்டிருப்பதால் ஆர்வத்தோடு வேலை செய்கிறார்கள். ஆனால், கோஷ்டி அரசியல் செய்தே பழக்கப்பட்ட சீனியர்கள், இதற்கு முழுமையான ஒத்துழைப்பு தரவில்லை. சிலர், தலைமைக்குப் பதில் சொல்லவேண்டியிருக்குமே என்பதால், ‘கடமையே’ என்று உதவுகிறார்கள்” என்றார்.

தொகுதி அளவில் உறுப்பினர் சேர்க்கையைக் கண்காணிக்கும் பொறுப்பிலிருக்கும் தொழில்நுட்ப அணி நிர்வாகியிடம் பேசியபோது, “நாங்கள் இளைஞர்கள் என்பதால், தொகுதியில் சீனியர்கள் யாருமே ஒத்துழைப்பு கொடுப்பதில்லை. `உங்களுக்கு என்ன தெரியும்... நாங்கள் சொல்வதைக் கேளுங்கள்’ என்ற தொனியிலேயே பேசுகிறார்கள். உறுப்பினர் சேர்க்கைக்கான ஆலோசனை கூட்டங்களை, தங்களுக்குள் இருக்கும் முரண்களைப் பேசுவதற்கான இடமாகச் சிலர் பயன்படுத்துவதால் வேலை கெட்டுவிடுகிறது. மாவட்டச் செயலாளர்கள், அமைச்சர்கள் போன்ற பெரிய பொறுப்பில் இருப்பதால் எங்களாலும் ஒரு கட்டத்துக்குமேல் அவர்களை எதிர்த்து பேச முடியவில்லை. வாக்காளர் அடையாள அட்டை கட்டாயம் என்பதால், பலரும் உறுப்பினராகச் சேருவதற்குத் தயக்கம் காட்டுகிறார்கள். தலைமை சொன்ன எண்ணிக்கையை எட்டுகிறோமோ, இல்லையோ மரியாதையான எண்ணிக்கையில் உறுப்பினர் சேர்க்கையை நடத்த வேண்டும் என்ற முனைப்போடு ஓடுகிறோம். அதைப் புரிந்துகொண்டு சீனியர்கள் ஒத்துழைப்பு கொடுத்தால் நன்றாக இருக்கும்” என்றார்.

களப்பணிக்குப் பெயர்பெற்ற தி.மு.க மாவட்டச் செயலாளர் ஒருவரிடம் பேசினோம். “தி.மு.க-வில் ஏற்கெனவே இருக்கும் உறுப்பினர் எண்ணிக்கை விவரத்தையும், பட்டியலையும் முதலில் வெளியிட வேண்டும். ஒவ்வொரு தொகுதியின் பார்வையாளர்களுக்கும் அந்தந்தத் தொகுதியில் பதிவுசெய்த தி.மு.க உறுப்பினர்களின் எண்ணிக்கை, பெயர் விவரங்களைக் கொடுத்து, முதலில் அவற்றைச் சரிபார்க்க வேண்டும். உட்கட்சித் தேர்தலுக்காகப் புதிதாகக் கட்சியில் சேர்ந்தவர்கள், மாற்றுக் கட்சிகளிலிருந்து வந்தவர்களெல்லாம் இப்போதும் கட்சியில் இருக்கிறார்களா என்பதைச் சரிபார்க்க வேண்டும். போலியாகப் பலரும் கட்சியில் சேர்ந்து உறுப்பினர் அட்டை வாங்கியதாகப் புகார்கள் இருக்கின்றன. அது குறித்தும் விசாரணை செய்ய வேண்டும்.

அதேபோல, உறுப்பினர் கட்டணத்தைக் கட்சிக்காரர்களே கட்டி போலியாக, பெரிய பெயர்ப் பட்டியலை எழுதி புதிய உறுப்பினர் பட்டியல் என்று கொடுப்பது, உறுப்பினர் அட்டையை உறுப்பினர்களிடமே கொடுக்காமல் இருப்பது போன்ற தகிடு தத்தங்களையெல்லாம் தடுக்க வேண்டும். இவை எதையுமே செய்யாமல், முதன்முதலில் வாக்களித்தவர்கள், கட்சியில் புதிதாகச் சேர்ந்தவர்கள், கள அரசியல் குறித்துத் துளியும் அறிவில்லாதவர்களைப் பார்வையாளர்களாக நியமித்து ஒரு கோடிப் பேரைக் கட்சியில் இணைக்கப்போகிறோம் எனச் சொல்லுவது வேடிக்கையாக இருக்கிறது” என்றார் ஆதங்கத்தோடு.

சுருக்கமாகச் சொன்னால், “எப்படி வாக்காளர் பட்டியல் திருத்தப் பணிகள் நடக்கின்றனவோ அதைப்போல, உறுப்பினர் சேர்க்கையையும் பக்காவாக நடத்தினால்தான் தலைமை என்ன நோக்கத்துக்காக இந்த வேலையைத் தொடங்கியிருக்கிறதோ அந்த நோக்கம் வெற்றிபெறும். இல்லையென்றால், ‘ஒரு கோடிப் பேரை புதிதாகச் சேர்த்தோம்’ என்று வெறும் பெருமை பேசத்தான் உதவுமே தவிர, கட்சி வளர்ச்சிக்கோ, தேர்தல் வெற்றிக்கோ துளியும் பயன்படாது” என்கிறார்கள் கட்சிக்காரர்கள்.