என்னை அரசியலுக்கு இழுத்தால் தாங்க மாட்டீங்க' - பாலாஜி முருகதாஸ்

என்னை அரசியலுக்கு இழுத்தால் தாங்க மாட்டீங்க' - யாருக்கு சொல்கிறார் பாலாஜி முருகதாஸ்?

'ஆன்லைன் சூதாட்டமான ரம்மியை ஒப்பிடும்போது குடியால் அழிந்தவர்கள்தான் அதிகம்' என்றும், 'தயவுசெய்து என்னை அரசியலுக்கு இழுக்காதீங்க, அப்படிச்செய்தால் நீங்கள் தாங்கமாட்டீங்க' என பிக்பாஸ் பிரபலம் பாலாஜி முருகதாஸ் 'ட்வீட்' போட்டுள்ளது தமிழக அளவில் பெரும் பரபரப்பை ஏற்படுத்தியுள்ளது.

தொலைக்காட்சிகளில் மிகவும் பிரபலமான விஜய் டிவியில் நடிகர் கமல்ஹாசன் தொகுத்து வழங்கிய நிகழ்ச்சி பிக்பாஸ். இந்த பிக்பாஸ் சீசன் 4 நிகழ்ச்சியில் போட்டியாளர்களில் ஒருவராகக் கலந்து கொண்டு பலரது கவனத்தையும் பெற்றவர் பாலாஜி முருகதாஸ். இந்த பிக்பாஸ் சீசன் 4-ல் இரண்டாவது இடம் பிடித்தார். ஆனால், பிக்பாஸ் அல்டிமேட் நிகழ்ச்சியில் 'சாம்பியன்' பட்டம் வென்று பலரையும் திகைக்கவைத்தார்.

இதனைத்தொடர்ந்து, பிரபலங்களின் திரைப்படங்களில் பாலாஜி முருகதாஸ் நடிப்பார் என்று எதிர்பார்க்கப்பட்ட நிலையில், தயாரிப்பாளர் ரவீந்தர் சந்திரசேகரன் தனது தயாரிப்பில் பாலாஜி முருகதாஸ் ஹீரோவாக நடிக்க உள்ளதாக அறிவிப்பு வெளியிட்டார். ஆனால், என்ன காரணமோ இந்தப் படம் துவங்கப்படாமலே உள்ளது.

இப்படி, பிக்பாஸ் நிகழ்ச்சியின் மூலம் பிரபலமான பாலாஜி முருகதாஸ், 'தன்னை அரசியலுக்கு இழுத்தால், தாங்கமாட்டீங்க' என்று முதல்வரை 'டேக்' செய்து வெளியிட்டுள்ள ட்விட்டர் பதிவு பெரும் பரபரப்பை ஏற்படுத்தியுள்ளது.

இது குறித்து, பாலாஜி முருகதாஸ் வெளியிட்டுள்ள முதல் ட்விட்டர் பதிவில், 'டாஸ்மாக் கடைகளைத் தயவுசெய்து மூடிவிடுங்கள். இந்த டாஸ்மாக் மதுக்கடை ஏராளமான அப்பாவி உயிர்களை அழித்துவிட்டது. ஆன்லைன் சூதாட்டமான ரம்மியை ஒப்பிடும்போது குடியால் அழிந்தவர்களே அதிகம்' என்று பதிவிட்டிருந்தார். பாலாஜி முருகதாஸ் பதிவுக்கு ஆதரவும், எதிர்ப்பும் சமூகவலைதங்களில் வெளியானது.

இந்த நிலையில், இதற்குப் பதிலடி தரும் வகையில், பாலாஜி முருகதாஸ் மீண்டும் இரண்டாவது பதிவை வெளியிட்டுள்ளார். அதில், 'குடியால் என்னைப் போன்ற பலரும் அனாதையாகிவிட்டனர். குடும்பங்கள் பலர் பாதிக்கப்பட்டுள்ளனர். எனவேதான் மதுக்கடைகளை மூடவேண்டும் எனச் சொல்கிறேன். தயவு செய்து என்னை அரசியலுக்கு இழுக்கவேண்டாம். அப்படிச் செய்தால் நீங்கள் தாங்க மாட்டீங்க' என்று பதிவு செய்துள்ளார். இந்தப் பதிவு தற்போது பரபரப்பாக வைரலாகி வருகிறது.