புதின், ட்ரம்ப், இம்ரான் - கைதாவார்களா உலக தலைவர்கள்?

``ஐ.சி.சி-ன் முடிவு சட்டப்படி செல்லாது. இந்த முடிவை ஏற்றுக்கொள்ள முடியாது” என்று கொந்தளித்த ரஷ்யா, அந்த நீதிமன்றத்துக்கு எதிராகவே வழக்கு பதிந்திருக்கிறது.

சமீபகாலமாக உலக நாடுகள் பலவற்றிலும் பதற்றமான சூழலே நிலவிவருகிறது.

போர், எல்லைப் பிரச்னை, ஏவுகணைச் சோதனை, போராட்டம் உள்ளிட்ட பிரச்னைகள் ஒருபுறமிருக்க, உலகத் தலைவர்கள் சிலர் கைதாகும் நிலைக்குத் தள்ளப்பட்டிருக்கிறார்கள். ரஷ்ய அதிபர் விளாடிமிர் புதின், அமெரிக்க முன்னாள் அதிபர் டொனால்டு ட்ரம்ப், பாகிஸ்தான் முன்னாள் பிரதமர் இம்ரான் கான் ஆகிய மூவரையும் கைதுசெய்ய முயற்சிகள் நடந்துகொண்டிருக்கின்றன. இவர்கள் எந்தெந்த வழக்குகளில் சிக்கியிருக்கிறார்கள்...

2006-ம் ஆண்டு, அமெரிக்காவின் முக்கிய ரியல் எஸ்டேட் அதிபராக இருந்த டொனால்டு ட்ரம்ப், ஆபாசப் பட நடிகை ஸ்டார்மி டேனியல்ஸை கோல்ஃப் போட்டி ஒன்றில் சந்தித்திருக்கிறார். அதன் பிறகு ட்ரம்ப்பும், அந்த நடிகையும் நெருக்கமான உறவில் இருந்ததாகச் சொல்லப்படுகிறது. 2016-ம் ஆண்டில் ட்ரம்ப் குடியரசுக் கட்சியின் அதிபர் வேட்பாளராக அறிவிக்கப்பட்ட நிலையில், அவர் தன்னுடன் உறவிலிருந்ததை மீடியாக்களிடம் வெளிப்படுத்தி, பணம் பெறும் திட்டத்தைக் கையிலெடுத்திருக்கிறார் ஸ்டார்மி டேனியல்ஸ். இந்தத் தகவல் ட்ரம்ப்பின் காதுகளை எட்ட, ஸ்டார்மியிடம் பேரம் பேசி, பணம் கொடுத்து அவர் வாயை அடைத்திருக்கிறார். இதற்காகத் தன்னுடைய வழக்கறிஞர் மூலமாக ட்ரம்ப் சட்டவிரோதமான முறையில் பணப் பரிவர்த்தனை செய்திருப்பதாகக் குற்றச்சாட்டுகள் எழுந்தன.

அந்தக் குற்றச்சாட்டுகளை ட்ரம்ப் தொடர்ந்து மறுத்துவந்த நிலையில், அது தொடர்பான வழக்கில் தான் கைதுசெய்யப்படவிருப்பதாக அவரே அறிவித்திருக்கிறார். மேலும், `போராட்டத்துக்குத் தயாராகுங்கள்’ என்று தனது ஆதரவாளர்களுக்கும் அழைப்பு விடுத்திருக்கிறார். இதனால், ட்ரம்ப்பின் ஆதரவாளர்கள் பலரும் அமெரிக்க அரசின் சட்டத்துறை அதிகாரிகளுக்குச் சமூக வலைதளங்கள், இ-மெயில்கள் வாயிலாக மிரட்டல் விடுக்கத் தொடங்கியிருக்கின்றனர். மேலும், ட்ரம்ப் கைதுசெய்யப்பட்டால் எப்படியிருக்கும் எனச் செயற்கை நுண்ணறிவு மூலம் உருவாக்கப்பட்ட புகைப்படங்களும் இணையத்தில் வைரலாகிவருகின்றன. ``ட்ரம்ப் கைதுசெய்யப்படுவதற்கான அறிகுறிகள் அமெரிக்காவில் தென்படுகின்றன. நியூயார்க், வாஷிங்டன் உள்ளிட்ட முக்கிய நகரங்களில் போலீஸார் தயார்நிலையில் இருப்பதாகத் தெரிகிறது. 2024 அதிபர் தேர்தலில் போட்டியிடத் தயாராகிக்கொண்டிருக்கும் ட்ரம்ப்புக்கு, இந்த விவகாரம் தலைவலியாக அமைந்திருக்கிறது’’ என்கின்றனர் ட்ரம்ப் வழக்கை உற்று நோக்குபவர்கள்.

பாகிஸ்தானின் முன்னாள் பிரதமர் இம்ரான் கானுக்கு எதிராகப் பல்வேறு வழக்குகளைப் பதிந்திருக்கிறது ஷெபாஸ் ஷெரீப் தலைமையிலான அந்த நாட்டின் அரசு. குறிப்பாக, `பெண் நீதிபதியை மிரட்டியது’, `வெளிநாட்டுத் தலைவர்கள் வழங்கிய பரிசுப்பொருள்களை அரசுக் கருவூலத்தில் சேர்க்காமல் அதிக விலைக்கு விற்றது’ ஆகிய இரண்டு வழக்குகள் தீவிரமடைந்திருக்கின்றன. இவற்றில், பரிசுப்பொருள் மோசடி வழக்கில் ஆஜராக மறுத்த இம்ரானைக் கைதுசெய்ய உத்தரவிட்டது பாகிஸ்தான் நீதிமன்றம். இதைத் தொடர்ந்து, காவல்துறைக்கும் இம்ரான் ஆதரவாளர்களுக்குமிடையே வெடித்த மோதலால், பாகிஸ்தானே வன்முறைக் காடானது. இதையடுத்து, நீதிமன்றத்தில் ஆஜரான இம்ரானுக்கு ஜாமீன் வழங்கப்பட்டது.

இந்த நிலையில், காவல்துறையுடன் தொடர் மோதலில் ஈடுபட்ட இம்ரானின் ஆதரவாளர்கள் பலரும் கைதுசெய்யப்பட்டனர். இம்ரான் கான் உட்பட அவரது நெருங்கிய வட்டத்திலுள்ள 17 பேர்மீது பயங்கரவாத தடுப்புச் சட்டம் பாய்ந்திருக்கிறது. இதனால் மீண்டும் அவரைக் கைதுசெய்யும் முயற்சி முடுக்கிவிடப்படவிருக்கிறது. நாட்டின் பொருளாதாரம் அதல பாதாளத்தை நோக்கிச் சென்றுகொண்டிருக்கும் நிலையில், பாகிஸ்தானின் இரு பெரும் தலைவர்களும் வெளிப்படையாக மோதிக்கொண்டிருப்பதைப் பல தரப்பினரும் விமர்சித்துவருகிறார்கள்.

கடந்த ஆண்டு, பிப்ரவரி 24-ம் தேதியன்று தொடங்கிய உக்ரைன் - ரஷ்யா போரில், தங்கள் நாட்டைச் சேர்ந்த 16,000-க்கும் அதிகமான குழந்தைகளை, சட்டவிரோதமாகக் கடத்திச் சென்றதாக ரஷ்யாமீது குற்றம்சாட்டியது உக்ரைன். இது தொடர்பான வழக்கை நெதர்லாந்திலுள்ள சர்வதேசக் குற்றவியல் நீதிமன்றம் (ஐ.சி.சி) விசாரித்துவந்தது. விசாரணையின் முடிவில், ``ரஷ்ய அதிபர் புதின் போர்க்குற்றங்களில் ஈடுபட்டிருக்கிறார்’’ என்றதோடு, அவருக்கு எதிராகக் கைது வாரன்ட்டையும் பிறப்பித்திருக்கிறது ஐ.சி.சி. ரஷ்யாவின் குழந்தைகள் நல ஆணையத்தின் தலைவர் மரியா லவோவா-பெலோவாவுக்கு (Maria Lvova-Belova) எதிராகவும் கைது வாரன்ட் பிறப்பிக்கப்பட்டிருக்கிறது. உக்ரைன் அதிபர் ஜெலன்ஸ்கி, ``இது வரலாற்றுச் சிறப்புமிக்க முடிவு’’ என்று வரவேற்றிருந்தார். 123 உறுப்பு நாடுகளைக்கொண்ட ஐ.சி.சி-யில் அமெரிக்கா உறுப்பினர் இல்லை என்றாலும், ஜோ பைடன் இந்த முடிவை வரவேற்றிருக்கிறார்.

``ஐ.சி.சி-ன் முடிவு சட்டப்படி செல்லாது. இந்த முடிவை ஏற்றுக்கொள்ள முடியாது” என்று கொந்தளித்த ரஷ்யா, அந்த நீதிமன்றத்துக்கு எதிராகவே வழக்கு பதிந்திருக்கிறது. புதினுக்கு எதிராக வாதாடிய வழக்கறிஞர், கைது வாரன்ட் பிறப்பித்த நீதிபதிகள்மீது கிரிமினல் வழக்கு பதிந்து விசாரணையைத் தொடங்கியிருக்கிறது ரஷ்யாவின் உயர்மட்ட விசாரணைக்குழு. ``ஐ.சி.சி-க்கு எனத் தனியாகக் காவல்துறை கிடையாது. அதன் கீழுள்ள 123 உறுப்பு நாடுகளில் புதின் கால் வைத்தால் மட்டுமே அவரைக் கைதுசெய்ய முடியும். அதற்கு, சர்வதேச நாடுகளின் ஒத்துழைப்பும் அவசியம். அதேநேரம், உலக அளவில் செல்வாக்குமிக்க தலைவராக வலம்வரும் புதினுக்கு, இது ஒரு பின்னடைவுதான். அவர் போர்க்குற்றம் இழைத்ததாக ஐ.சி.சி தெரிவித்திருப்பதால், புதினின் மதிப்பு உலக நாடுகள் மத்தியில் குறையும். பல்வேறு நாடுகளுக்குப் பயணப்பட முடியாத சூழல் உருவாகும்” என்கிறார்கள் சர்வதேச அரசியல் பார்வையாளர்கள்.

இந்த மூவரில் ரஷ்ய அதிபர் புதின் கைதாவதற்கான வாய்ப்பு மிக மிகக் குறைவு என்றாலும், ட்ரம்ப், இம்ரான் கான் ஆகிய இருவரும் விரைவில் கைதுசெய்யப்பட வாய்ப்பிருக்கிறது. இந்தப் பக்கத்தை நீங்கள் புரட்டும்போது அவர்கள் இருவரும் கைதுசெய்யப்பட்டிருந்தாலும் ஆச்சர்யப்படுவதற்கில்லை!

பலநாட்டு தலைகளின் தலைகளுக்கு நல்ல காலமில்லையோ?