உறவை வளர்க்கும் கிரகம்

அங்காரகன் என்பது, செவ்வாய் கிரகத்தைக் குறிக்கும். அம்+காரகன் என, இச்சொல்லைப் பிரிப்பர். அம் என்றால் அழகான, நேர்த்தியான, சிறப்பான என்று பொருள் உண்டு. அங்காரகன் என்ற சொல்லுக்கு, நேர்மையான செயல்களை செய்பவன் என பொருள்.

குடும்ப உறவை வளர்க்க, கடுமையாக சோதித்து நேர்வழிப்படுத்துபவராக இவர் விளங்குகிறார். ஒரு கதையின் மூலம் இதை விளக்கலாம்.

ரத்தினபுரி என்ற பகுதியை ஆட்சி செய்தவன், செண்பகச் சோழன். இவனது மகள் நிலவுக்கரசி. அழகான இவளை, பல நாட்டு இளவரசர்களும், திருமணம் செய்ய விரும்பினர்.

ஆனால், ஜாதகம் பார்த்தால், இவளைத் திருமணம் செய்பவனின் உயிருக்கு ஆபத்து என்பதால், திருமணம் செய்யவே, அவர்கள் அஞ்சினர். மனம் வருந்திய நிலவுக்கரசி, அரண்மனையை விட்டு காட்டுக்குப் போனாள்.

'மிருகங்களே... நான் இந்த பூமியில் வாழ விரும்பவில்லை. என் உடல் வீணாகக் கூடாதே என்பதற்காக, உங்களுக்கு இரையாக வந்தேன். என்னை யார் வேண்டுமானாலும், அடித்துக் கொன்று பசி தீர்த்துக் கொள்ளுங்கள்...' என்று புலம்பினாள்.

அத்துடன், தன் திருமணத்தடைக்கு காரணமான செவ்வாய் எனும் அங்காரகனை நினைத்து, 'என் மீது உனக்கு என்ன கோபமோ... என்னை தோஷத்துடன் பிறக்க வைத்து சோதிக்கிறாய்?' என, அரற்றினாள்.

அந்நேரம், ஒரு சிங்கம் அவள் மீது பாயவும், அதன் மீது ஒரு அம்பு வந்து விழவும் சரியாக இருந்தது. சிங்கம் இறந்தது. அதன் உடலை எடுக்க, அழகான ஒரு வீரன் வந்தான்.

சிங்கத்துக்கு கூட இரையாக முடியாத, தன் நிலைக்காக, அழுது கொண்டிருந்தாள், நிலவுக்கரசி. அவளிடம், 'சிங்கத்திடமிருந்து உன்னைக் காப்பாற்றி விட்டேனே... பிறகு ஏன் அழுகிறாய்?' என்றான், அந்த வீரன்.

'வீரரே... நான் நாடாளும் மன்னர் மகளாக இருந்தாலும், என் திருமணம், செவ்வாய் தோஷத்தால் தடைபட்டு விட்டது. மனம் வெறுத்து சாகவே காட்டுக்கு வந்தேன். நீங்கள் காப்பாற்றி விட்டீர்கள். சாகக் கூட எனக்கு யோகமில்லை...' என்றாள்.

அப்போது அந்த வீரன், அங்காரகனாக உருமாறி நின்றான்.

'பெண்ணே, நான் தான் அங்காரகன். முற்பிறப்பில், நீ பறவைகளையும், மிருகங்களையும் அவற்றின் இணைகளிடமிருந்தும், குஞ்சு, குட்டிகளிடமிருந்தும் பிரித்தாய். அதை இப்பிறப்பிலும் நீ விடவில்லை.

'அரண்மனையில் கிளிகளையும், இதர பறவைகளையும் கூட்டில் அடைத்திருக்கிறாய். என்ன தான், நீ பாலும், பழமும் நல்ல உணவுகளுமாக கொடுத்தாலும், அது அவற்றுக்கு திருப்தி தராது.

'உலகத்தில் மனிதர்கள் உள்ளிட்ட எல்லா உயிர்களும், அவரவர் துணையுடன் இணைந்து வாழ வேண்டும். அவற்றை பிரிப்பவர்களுக்கு, நான் தோஷத்தை தருவேன். நீ, உடனே அரண்மனை சென்று, அவற்றை விடுவித்தாலே போதும். உன் தோஷம் நீங்கும்...' என்றார்.

நிலவுக்கரசியும் அவ்வாறே செய்து, தோஷம் நீங்கப் பெற்று, பேரழகனான மாவீரனை திருமணம் செய்தாள்.

உறவுகளைப் பிரிப்பது பெரும் பாவம். அவர்களை வழிவழியாக செவ்வாய் தோஷம் தொடரும். இனியேனும், உறவை வளர்க்கும், அங்காரகனின் அறிவுரையைப் பின்பற்றுவோம்.

ஜாதகத்தில் செவ்வாய் உச்சம் பெற்றவர்கள் சிறந்த சாதனைகள் புரிவார்களாம்.

அங்காரகன் சக்தி மிக்கவன்.