2000 ஆண்டுகளுக்கு முன்பே 40 பெண் எழுத்தாளர்களைக் கொண்ட ஒரே மொழி தமிழ்

``சமஸ்கிருதத்தில் ஒரு பெண் எழுத்தாளர் கூட கிடையாது. ஆனால் கிரேக்கத்தில் 7 பெண் எழுத்தாளர்கள் உள்ளனர். இரண்டாயிரம் வருடத்திற்கு முன் 40 பெண் எழுத்தாளர்களை கொண்ட ஒரே மொழி தமிழ் மொழி’’ - ராஜபாளையத்தில் நடந்த நிகழ்ச்சியில் சு.வெங்கடேசன் எம்.பி

தமிழ்நாடு முழுவதும் 100 கல்லூரிகளில் தமிழர் மரபும் நாகரிகமும், தமிழ்நாட்டில் சமூக நீதி, பெண்கள் மேம்பாடு, சமூகப் பொருளாதார முன்னேற்றம், திசைதோறும் திராவிடம், மொழி மற்றும் இலக்கியம், கலை மற்றும் பண்பாடு, தொல்லியல் ஆய்வுகள், அறிவியல் மற்றும் தொழில்நுட்பம், தமிழகத்தின் தொழில் வளர்ச்சி, தொழில் முனைவுக்கான முன்னெடுப்புகள், ஊடகங்களின் தோற்றமும் வளர்ச்சியும், கணினித் தமிழ் வளர்ச்சியும் சவால்களும், தமிழ்நாட்டில் சுற்றுலா வாய்ப்புகள், நூற்றாண்டு கண்ட கல்விப்புரட்சி மற்றும் அரசின் திட்டங்கள் மற்றும் செயல்படுத்தும் முறைகள் ஆகிய தலைப்புகளின் கீழ் சிறந்த சொற்பொழிவாளர்களைக் கொண்டு மாபெரும் தமிழ்க்கனவு சொற்பொழிவு நிகழ்ச்சி நடைபெற்று வருகிறது.

அந்த வகையில், விருதுநகர் மாவட்டத்தில் தமிழ்க்கனவு, தமிழ் மரபு மற்றும் பண்பாட்டுப் பரப்புரை நிகழ்ச்சி, ராஜபாளையத்தில் உள்ள பொறியியல் கல்லூரியில் நடைபெற்றது.

இதில், மதுரை நாடாளுமன்ற உறுப்பினர் சு.வெங்கடேசன் ‘அறிவோம் வரலாறு’ என்ற தலைப்பிலும், 'ஸ்டார்டப் டி.என்' (StartupTN) மேலாண்மை இயக்குநர் மற்றும் முதன்மை செயல் அலுவலர் சிவராஜா ராமநாதன் ‘தடை அதை உடை' என்ற தலைப்பிலும் பேசினர்.

இந்த நிகழ்ச்சியில் மாவட்ட ஆட்சித்தலைவர் ஜெயசீலன், ``தமிழர்களுக்கென்று நம் வரலாறு முழுமைக்கும் பெரும் கனவு இருக்கிறது. ‘யவனர் தந்த வினைமாண் நன்கலம் பொன்னொடு வந்து கறியொடு பெயரும்’ என்று நமது இலக்கியங்கள் சொல்கின்றன.

நமக்கு மிக அருகிலிருக்கும் கீழடி நகரமானது நாகரிகத்தின் தொட்டிலாக இருந்துள்ளது. இதன்மூலம் கீழடி நமக்குச் சொல்லும் செய்தி, எதையும் தொழில் நேர்த்தியோடு செய்யக்கூடிய வளமையும், ஆற்றலும் பொருந்தியவர்கள் தமிழர்கள் என்பதுதான்" எனப் பேசினார்.

இந்நிகழ்ச்சியில் மதுரை நாடாளுமன்ற உறுப்பினர் சு.வெங்கடேசன் பேசுகையில், ``வரலாறு என்பது தெரிந்தவற்றை மட்டுமல்லாமல் தெரியாதவற்றையும் சேர்த்து அறிவதே. நமது குடும்பப் பரம்பரை பற்றி அதிகமாக 150 ஆண்டுகளாக நான்கு அல்லது ஐந்து பரம்பரை வரை மட்டுமே அறிந்து கொண்டிருக்கும் நாம், 2500 ஆண்டுகள் முந்தைய திருவள்ளுவரை பற்றி அறிந்திருக்கிறோம். இதற்கான காரணத்தை சொல்லுவது தான் வரலாறு.

அசோகரின் காலத்திற்கும் 200 ஆண்டுகள் முன்பாக இந்தியாவில் முதன்முதலில் கல்லிலே எழுதப்பட்ட பெயர், அந்துவன் ஆகும். வரலாற்று நுண்ணறிவு, வரலாற்றின் அவசியம் தெரிந்த நிலமாக தமிழ்நிலம் இருந்தது. அந்துவன் நடுகல்லில் கால்கோள் என்ற ஒரு சொல் இருக்கிறது. அது இன்றளவும் உள்ளது. தமிழகத்தில் அனைத்து இல்ல விழாக்களின் போதும் கால்கோள் நட்டு தொடங்கி வைத்து ஆரம்பிப்பார்கள் என்பது வழக்கு.

உலகத்தில் உள்ள பழமையான எழுத்துகளில் பெண் எழுத்தாளர்கள் குறைவு. சம்ஸ்கிருதத்தில் ஒரு பெண் எழுத்தாளர் கூட கிடையாது. ஆனால் கிரேக்கத்தில் 7 பெண் எழுத்தாளர்கள் உள்ளனர். இரண்டாயிரம் வருடத்திற்கு முன் 40 பெண் எழுத்தாளர்களை கொண்ட ஒரே மொழி தமிழ் மொழி. உலகத்தில் ஆணுக்கும் பெண்ணுக்கும் சமமான கல்வியறிவு கொண்ட ஒரே மொழி தமிழ் தான். தமிழ் இலக்கியங்களில் அசாதாரணமான பெண் கதாபாத்திரங்கள் உள்ளன. அது பெண்ணின் அறிவு, பெண் கல்வி, பெண் சமத்துவம் ஆகியவற்றை உணர்த்துவதாக இருக்கிறது. வரலாற்றிலிருந்து நீங்கள் கற்று கொள்வதற்கு நிறைய விஷயங்கள் உள்ளன. நமது வரலாற்றிலிருந்து தான் நமது வாழ்க்கையை தொடங்குகிறது" என பேசினார்.