பின்னணி பாடகி வாணி ஜெயராம் மரணம்

**சிவா** · **சிவா** Sat Feb 04, 2023 4:40 pm

பிரபல பின்னணி பாடகி வாணி ஜெயராம் 78 சென்னையில் காலமானார்.

சென்னை, நுங்கம்பாக்கத்தில் வசித்து வந்த அவர் வீட்டில் வழுக்கி விழுந்ததில் அவர் உயிரிழந்ததாக முதற்கட்ட தகவல்கள் தெரிவிக்கின்றன. நுங்கம்பாக்கம் போலீசார் விசாரித்து வருகின்றனர்.

தமிழ், தெலுங்கு உள்ளிட்ட பல்வேறு மொழிகளில் 10 ஆயிரத்திற்கும் மேற்பட்ட பாடல்களை பாடியவர் வாணி ஜெயராம். "வீட்டுக்கு வந்த மருமகள்" என்ற படத்தில் பாடகர் டி எம் சௌந்தர்ராஜனோடு இவர் சேர்ந்து பாடிய ஜோடிப்பாடலான 'ஓரிடம் உன்னிடம் நான் கேட்பது' என்ற பாடலே இவர் பாடி தமிழில் வெளிவந்த முதல் திரைப்பட பாடல். 'மல்லிகை என் மன்னன் மயங்கும்', 'ஏழு ஸ்வரங்களுக்குள் எத்தனை பாடல்' உள்ளிட்ட ஏராளமான ஹிட் பாடல்களை இவர் பாடி உள்ளார்.

தமிழில் எம்எஸ் விஸ்வநாதன் துவங்கி ஏஆர் ரஹ்மான் வரை பல முன்னணி இசையமைப்பாளர்களின் இசையில் இவர் பாடி உள்ளார். தமிழ், தெலுங்கு, மலையாளம், கன்னடம், மராத்தி, ஒரியா, குஜராத்தி மற்றும் பெங்காளி என அனைத்து மொழிகளிலும் 10,000 க்கும் மேற்பட்ட பாடல்களை பாடியுள்ளார். ஏராளமான பக்திப் பாடல்களும் தனி ஆல்பங்களாக இவரது குரலில் வெளிவந்திருக்கின்றன.

கடந்தவாரம் தான் மத்திய அரசு இவரின் கலைச்சேவையை பாராட்டி பத்மபூஷண் விருது வழங்குவதாக அறிவித்தது. ஆனால் அந்த விருதை பெறும் முன்பே அவர் மறைந்தது திரையுலக ரசிகர்கள் இடையே சோகத்தை ஏற்படுத்தி உள்ளது.

இவரது மறைவுக்கு இசைகலைஞர்கள் பலரும் இரங்கல் தெரிவித்து வருகின்றனர்.

**T.N.Balasubramanian** · **T.N.Balasubramanian** Sat Feb 04, 2023 5:46 pm

"மல்லிகை என் மன்னன் மயங்கும் " போன்ற பாடல்கள்
பலரை மயக்கிய இசைவாணி கலைவாணி மரணம்
திரை உலகிற்கு ஈடில்லா இழப்பு.

பத்ம பூஷன் விருதை பெற்றுக்கொள்வதற்கு முன்
மறைந்து விட்டாரே.

**mohamed nizamudeen** · **mohamed nizamudeen** Sat Feb 04, 2023 6:15 pm

பல்லாயிரம் பாடல்களைப் பாடிய ஒரு வானம்பாடி, வானம் ஏறிச் சென்றுவிட்டது.

ஆழ்ந்த இரங்கல்கள்!

Guest · Guest Sat Feb 04, 2023 6:44 pm

ஆழ்ந்த அனுதாபங்கள்.

அவர் பாடகி மட்டுமல்லாது ஒரு கவிஞரும் கூட.அவரின் நேர்காணல் காணொலி...........

https://www.youtube.com/watch?v=tv8XCgmJky4

**சிவா** · **சிவா** Sat Feb 04, 2023 6:51 pm

‘அபூர்வ ராகங்கள்’ திரைப்படத்தில் இடம்பெற்ற ‘ஏழு ஸ்வரங்களுக்குள்’

‘சங்கராபரணம்’ திரைப்படத்தில் இடம்பெற்ற ‘மானஸ ஸஞ்சரரே’,

‘ஸ்ருதிலயாலு’ எனும் படத்தில் இடம்பெற்ற ‘ஆலோகயே ஸ்ரீ பாலகிருஷ்ணம்’

ஆகிய பாடல்களுக்காக அவர் சிறந்த பின்னணிப் பாடகிக்கான தேசிய விருதைப் பெற்றார்.

அண்மையில் அவருக்கு இந்தியாவின் உயரிய விருதான பத்ம பூஷண் விருது வழங்கப்பட்டது.

**சிவா** · **சிவா** Sun Feb 05, 2023 4:51 pm

மறைந்த வாணி ஜெயராம் உடலுக்கு தமிழ்நாடு காவல்துறை சார்பில் இறுதி மரியாதை... 30 குண்டுகள் முழங்க உடல் தகனம்...!

பின்னணி பாடகி வாணி ஜெயராம் மரணம் 1128736-untitled-11

மறைந்த பின்னணி பாடகி வாணி ஜெயராம் உடலுக்கு தமிழ்நாடு காவல்துறை சார்பில் இறுதி மரியாதை செலுத்தப்பட்டு உடல் தகனம் செய்யப்பட்டது.

தமிழ் சினிமாவின் பிரபல பின்னணி பாடகி வாணி ஜெயராம் (வயது 78). இவர் கடந்த 1974-ம் ஆண்டு வெளியான தீர்க்க சுமங்கலி என்ற படத்தின் மூலம் திரையுலகிற்கு பாடகியாக அறிமுகமானார்.

பின்னர், தமிழ், தெலுங்கு. கன்னடம், மலையாளம், மராத்தி, குஜராத்தி, வங்காளம், ஒரியா என பல்வேறு மொழிகளில் பாடியுள்ளார். அவர், இசையமைப்பாளர்கள் எம்.எஸ். விஸ்வநாதன், இளையராஜா தொடங்கி ஏ.ஆர். ரகுமான் வரையிலான பல முன்னணி இசையமைப்பாளர்களின் இசையில் பாடியிருக்கிறார். பக்தி பாடல்களையும், தனி ஆல்பங்களையும் அவர் பாடியுள்ளார். சமீபத்தில் மத்திய அரசு சார்பில் இவருக்கு பத்ம பூஷண் விருது அறிவிக்கப்பட்டது.

இந்த நிலையில் சென்னையில் உள்ள தனது வீட்டில் பாடகி வாணி ஜெயராம் தவறி விழுந்து உயிரிழந்து உள்ளார். நுங்கம்பாக்கத்தில் உள்ள அவரது இல்லத்தில் அஞ்சலிக்காக வைக்கப்பட்டுள்ள வாணி ஜெயராம் உடலுக்கும் தலைவர்கள், திரையுலகினர் மற்றும் ரசிகர்கள் அஞ்சலி செலுத்தினர்.

பின்னர், அவரது இறுதி ஊர்வலம் பிற்பகல் 1 மணிக்கு தொடங்க பெசன்ட் நகர் மின் மயானத்தில் நிறைவடைந்தது. அங்கு 3 சுற்றுகளாக 30 குண்டுகள் முழங்க பின்னணி பாடகி வாணி ஜெயராம் உடலுக்கு தமிழ்நாடு காவல்துறை சார்பில் இறுதி மரியாதை செலுத்தப்பட்டு அவரது உடல் தகனம் செய்யப்பட்டது.