முதல்வர் மு.க.ஸ்டாலின் அறிவிப்பு இன்று நடைமுறைக்கு வந்தது; அம்மா உணவகங்களில் 3 வேளையும் சாப்பாடு இலவசம்: நிரம்பி வழியும் மக்கள் கூட்டம்

**ayyasamy ram** · **ayyasamy ram** Wed Nov 10, 2021 8:08 pm

-
சென்னை:
முதல்வர் மு.க.ஸ்டாலின் உத்தரவு படி இன்று முதல் அம்மா
உணவகங்களில் 3 வேளையும் இலவச சாப்பாடு வழங்கும்
நடைமுறை அமலுக்கு வந்தது. இதையடுத்து அனைத்து
அம்மா உணவகங்களிலும் மக்கள் கூட்டம் நிரம்பி வழிந்தது.

ருசியாகவும், தரமாகவும் இருந்ததால் முதல்வரை பொதுமக்கள்
பாராட்டினர். தமிழகத்தில் வடகிழக்கு பருவமழை தொடங்கிய
நிலையில், புதிய காற்றழுத்த தாழ்வு மண்டலம் உருவாகுவதற்கு
முன்பே சென்னை உட்பட பல்வேறு மாவட்டங்களில் அதி தீவிர
கனமழை பெய்தது.

சென்னையில் கடந்த 6ம்தேதி இரவு முழுவதும் வெளுத்து வாங்கிய
கனமழையால் நகரில் பல பகுதிகள் மழைநீரில் மிதக்கும் அளவுக்கு
வெள்ளம் சூழ்ந்தது. குறிப்பாக வேளச்சேரி, மேற்கு மாம்பலம்
உள்ளிட்ட பல்வேறு பகுதிகளிலும் இடுப்பு அளவுக்கு வெள்ள நீர்
தேங்கியுள்ளது.

மேலும், சில பகுதிகளில் வீடுகளுக்குள்ளும் வெள்ள நீர் புகுந்துள்ளது.
மோட்டர் மூலம் மழை நீரை அகற்றும் பணிகள் தீவிரமாக நடைபெற்று
வருகிறது. மேலும் இரண்டு நாட்களாக கனமழை குறைந்து தூறலுடன்
கூடிய மழையே பெய்து வருவதால் ஓரளவு வெள்ளம் வடியத்
தொடங்கியுள்ளது. இருப்பினும், தாழ்வான பகுதிகளில் இன்னும்
மழைநீர் தேங்கி கிடக்கிறது.

தொடர்ந்து பெய்து வரும் கனமழையால் சென்னைவாசிகளின்
இயல்பு வாழ்க்கை கடுமையாகப் பாதிக்கப்பட்டுள்ளது. இதனால்
மக்கள் அத்யாவசிய தேவைகளை தவிர்த்து வீட்டை விட்டு
வெளியில் வர முடியாமல் தவித்தனர். மேலும் வெள்ளம் சூழ்ந்த
பகுதிகளில் குடிசைகளில் வாழும் மக்கள் வெளியில் செல்ல
முடியாததால் உணவு கிடைக்காமல் தவித்து வந்தனர்.

அவர்களுக்கு சென்னை மாநகராட்சி மூலம் 3 வேளையும் உணவு
வழங்கப்பட்டு வருகிறது. இதுதவிர வெள்ளம் சூழ்ந்த பகுதிகளில்
வீடுகளை விட்டு வெளியில் செல்லாமல் பலர் முடங்கி கிடக்கின்றனர்.
அவர்கள் தங்கள் குடும்பத்தினருக்கு உணவு சமைக்க முடியாமல்
தவித்து வருகின்றனர்.

மேலும் வெள்ள பாதிப்பால் உணவகங்கள் பல மூடப்பட்டுள்ளன.
இதனால் தொழிலாளர்கள் பலர் உணவு கிடைக்காமல் அவதிப்படும்
நிலை இருந்தது. இந்நிலையில் மழை பாதிப்புகளை முதல்வர்
மு.க.ஸ்டாலின் ஒவ்வொரு நாளும் நேரில் சென்று பார்வையிட்டு
ஆய்வு செய்தார்.

அப்போது அங்கிருந்த அம்மா உணவகம் ஒன்றுக்கு சென்றார்.
அங்குள்ள உணவை சாப்பிட்டார். உணவு தரமாக இருப்பதாக அவர்
ஊழியர்களிடம் தெரிவித்தார். அதைத் தொடர்ந்து, அனைத்து அம்மா
உணவகங்களிலும் மழை முற்றிலும் நிற்கும் வரை இலவசமாக
உணவு வழங்கப்படும் என்று மு.க.ஸ்டாலின் அறிவித்தார்.

அவரது அறிவிப்பை தொடர்ந்து இன்று முதல் சென்னையில்
உள்ள 403 அம்மா உணவகங்களில் 3 வேளையும் உணவு
இலவசமாக வழங்கப்படுகிறது. காலையில் இட்லி, மதியம்
சாம்பார் சாதம், இரவு சப்பாத்தி போன்றவை அம்மா உணவகங்களில்
வழங்கப்பட்டு வருகிறது. அதன் தொடர்ச்சியாக அந்தந்த பகுதியில்
உள்ள ஏழைகள், மழையால் பாதிக்கப்பட்டவர்களுக்கு விலையின்றி
இலவசமாக வினியோகிக்கப்பட்டது.

சென்னையில் 200 வார்டுகளில் 396 அம்மா உணவகங்களிலும்,
அரசு மருத்துவமனைகளில் 7 இடங்களிலும் இன்று காலையில்
இருந்து உணவு இலவசமாக வழங்கப்படுகிறது.

தினகரன்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக