சீரடி சாய்பாபா கோயில்களும் கேள்விகளும்

சிலவார முன்னர் திருச்சி சமயபுரம் அருகில் தென்சீரடி என்ற பெயரில் உள்ள சாய்பாபா கோயிலுக்குப் போய்ப் பார்த்தேன்.

பெரிய கல்யாண மண்டபம் மாதிரி இருக்கிறது. பளபளப்பு இருக்கும் அளவிற்கு தெய்வீகம் இல்லை.

தரைத்தளத்தில் சாய்பாபா இருக்கிறார். அவருக்கு நேர் கீழே சாய்பாபாவின் காலடியில் நிலவறையில் (basement) சிவலிங்கம் இருக்கிறது. பார்க்கவே பொறுக்காத நிலை அதுவென்றால், சிவனின் நந்தியம்பெருமாள், சிவனுக்கு எந்தத் தொடர்பும் இல்லாதவாறு முதல் மாடியில் எங்கோ பிறக்கு பார்த்துக் கொண்டிருக்கிறார்.

கண்கள் சிவப்பதா கசிவதா என்று புரியாமல் தவித்தன.

இன்னொரு மூலையில் கிருஷ்ணர் இதையெல்லாம் பார்த்தோ என்னவோ நக்கலாக சிரித்துக் கொண்டிருந்தார். யாரோ தத்தாத்திரியாம்! அவரை ஏன் நான் வணங்கணும்னு புரியவில்லை.

அப்புறம் அங்கே ஓர் அம்மன். அங்கே போகக்கூடாது. அங்கே கணபதி ஓமம் தொடங்கி சண்டி ஓமம் வரையாக 10-15 ஓமங்களுக்கு விலைப்பட்டி போட்டிருந்தது. சண்டி ஓமம் ₹25000.

சீரடிபாபா ஒரு ஞானி. மதிக்கத் தக்கவர். அவ்வளவுதான்.

இந்த மண்ணிலே ஞானசம்பந்தரோ அப்பரோ, அல்லது ஆண்டாளோ பிற ஆழ்வார்களோ அல்லது இராமானுசரோ செய்யாத அருளிச் செயல்கள் எதனைச் செய்தார் பாபா? அகத்திய முனியைவிட பாபா பெரிய தெய்வமாக எப்படி ஆகிறார்? இரமண மகிரிசியைவிப பாபா ஞானியா?

"சிவலிங்கத்தின் மேல் உட்கார வைக்குமளவிற்கு நான் பெரியவனாடா?" என்று பாபா இருந்திருந்தால் அவரே கேட்டிருப்பார்.

சிவலிங்கத்தை பாபாவின் காலடியில் கிடத்துதல் இந்துமத வளர்ச்சியா?

இன்னும் பைத்தியம் முற்றிப்போய் ஒன்பது கோள்களும் பாபாவாக சித்திரித்து நவகிரகசாய் என ஊதுகிறார்கள்

சாய்சூரியன், சாய்சுக்கிரன், சாய்சனி, சாய்கேது, சாய்ராகு......என இவர்கள் அடிக்கும் சந்தைக்கூத்து அவலமானது.

நேற்று பிறந்து இன்னைக்கு மறைந்த சாய்பாபா, ஒன்பது கோள்களுக்கும் அதிபதியாகிவிடுவாரா?

முன்பெல்லாம் வியாழக்கிழமை குருபகவானுக்கு விளக்குப் போடுங்கள் என்பார் சோதிடர். இப்ப பாபாவுக்கு போடச் சொல்லிவிட்டார் போல. வியாழனில் பாபா கோயிலண்டை நெரிசல் அளவு கடந்து இருக்கிறது.

கண்களுக்குக் காட்டப்படுவதற்கு எல்லாம் கன்னத்தில் போடவேண்டும் என்பதா இந்துமதம்?

என்ன நடக்கிறது என்று உசாவினால், பாபாவை வைத்துப் பெரிய நில வாணிகம் நடப்பது தெரிகிறது.

100, 200 ஏக்கர் நிலம் வாங்கிப் போட்டு, தோதான இடத்தில் பாபா கோயிலைக் கட்டினால் நில வாணிகம் பெரிய வரும்படி கொடுக்கிறது.  கோயிலில் நிதம் கிட்டும் வரும்படி நீண்டகாலத்திற்கு அழியாத செல்வம். கருப்புப் பணம் பாபாவின் வெள்ளைப் பளிங்குச் சிலைகளாக மாறுகின்றன.

சமயபுரம் அருகே உள்ள பாபா கோயிலுக்கு முதலீடு 5 கோடி. 2 ஏக்கர் நிலம் உட்பட. அவ்வளவுதான். சுற்றியுள்ள நிலமதிப்பு ஏறிவிட்டது, கோயில் வருமானத்திற்கும் குறைவில்லை.

கூர்ந்து கவனித்தால் பாபா கோயில் கட்டும் இடங்களை எப்படித் தேர்ந்தெடுக்கிறார் என்ற சூழ்ச்சி புரியும்.

புகழ்பெற்ற கோயில்களின் அருகே பாபா கோயிலைக் கட்டுகிறார். சமயபுரத்துக்கு அருகில் ஒன்று. வயலூர் முருகன் கோயிலுக்கு அருகே ஒன்று. திருப்பட்டூர் பிரம்மா கோயில் எனப்படும் பழைய ஐயனார் கோயில் போகும் வழியில் ஒன்று.  அங்க வர கூட்டத்தில் 10% வந்தாலும் போட்ட காசை பல மடங்கா எடுத்திடலாம் என்ற வணிக உத்திதான் இதற்குக் காரணம்.

இதேபோல, நெடுஞ்சாலையைக் கருத்தில் கொண்டு எம்.ஆர்.பாளையம் போகும் வழியில் ஒரு பாபா கோயில் உருவாகி வருகிறது. இதற்கும் சமயபுரம் பாபா கோயிலுக்கும் இடைவெளி 15-18 கி.மீதான்.

சிவனை விட பெரிய கடவுளாக பாபாவைக் கட்டமைப்பது ஏன்? ஆன்மீகம் என்ற பெயரில் கொள்ளை அடிக்கும் முயற்சி என்பதைத் தவிர இதில் வேறென்ன இருக்கிறது?

இந்த வாணிகரோடு பேராசை கொண்ட சொத்து வளர்ப்பு ஆதினங்களும் சேர்ந்து கூட்டணி போட்டிருக்கிறார் தற்போது. சிவனை மிதிக்கும் பாபாவை வளர்க்கிறார் சிவனடியார் என்ற பெயரில்.

நன்றி நாக இளங்கோவன்.

“ பாபாவை வைத்துப் பெரிய நில வாணிகம் நடப்பது தெரிகிறது.”
“100, 200 ஏக்கர் நிலம் வாங்கிப் போட்டு, தோதான இடத்தில் பாபா கோயிலைக் கட்டினால் நில வாணிகம் பெரிய வரும்படி கொடுக்கிறது.”
“சிவனை விட பெரிய கடவுளாக பாபாவைக் கட்டமைப்பது ஏன்? ஆன்மீகம் என்ற பெயரில் கொள்ளை அடிக்கும் முயற்சி என்பதைத் தவிர இதில் வேறென்ன இருக்கிறது?”
“இந்த வாணிகரோடு பேராசை கொண்ட சொத்து வளர்ப்பு ஆதினங்களும் சேர்ந்து கூட்டணி போட்டிருக்கிறார் தற்போது. சிவனை மிதிக்கும் பாபாவை வளர்க்கிறார் சிவனடியார் என்ற பெயரில்.”-
நாக இளங்கோவன் , சிவா ஆகியோர்க்கு நன்றி!