வங்கியில் கணக்கு வைத்துள்ள வாடிக்கையாளர்கள் ‘லாக்கரை’ புதுப்பித்துக்கொள்ள வேண்டும்!

-
புதுடெல்லி:
வங்கியில் கணக்கு வைத்துள்ள வாடிக்கையாளர்கள் தங்களது
‘லாக்கரை’ புதுப்பிக்க ஜன. 1ம் தேதி கெடு விதித்து இந்திய
ரிசர்வ் வங்கி அறிவிப்பு வெளியிட்டுள்ளது.

நாடு முழுவதும் வங்கிகளில் ஏற்கனவே உள்ள அதன் லாக்கர்
வசதியை பயன்படுத்தும் வாடிக்கையாளர்களுக்கு,
புதிய அறிவுறுத்தல்களை இந்திய ரிசர்வ் வங்கி அறிவித்துள்ளது.

இதுதொடர்பாக இந்திய ரிசர்வ் வங்கி வெளியிட்ட அறிவிப்பில்,
‘வங்கியில் லாக்கர் வசதியை பெற்றுள்ள வாடிக்கையாளர்கள்,
தங்களது லாக்கர் ஒப்பந்தங்களை 2023 ஜனவரி 1ம் தேதிக்குள்
புதுப்பித்துக் கொள்ள வேண்டும்.

தற்போதுள்ள அனைத்து லாக்கர் வாடிக்கையாளர்களும்,
புதிய லாக்கர் வைத்துக் கொள்வதற்கான தகுதியை பெறும்
வகையில், அதற்கான புதுப்பித்தல் ஒப்பந்தத்தில் கையெழுத்திட
வேண்டும்.

இதுகுறித்த திருத்தப்பட்ட வழிகாட்டுதல்கள் ஏற்கனவே கடந்த
2021ம் ஆண்டு ஆகஸ்ட் 8ம் தேதி வெளியிடப்பட்டது. இந்த
நடைமுறையானது 2022 ஜனவரி 1ம் தேதி முதல் அமல்படுத்தப்
பட்டது.

வங்கிகள் தங்கள் லாக்கர் ஒப்பந்தங்களில் நியாயமற்ற
விதிமுறைகள் அல்லது நிபந்தனைகள் சேர்க்கப்படவில்லை
என்பதை உறுதிப்படுத்த வேண்டும். 2023 ஜனவரி 1ம் தேதிக்குள்
அனைத்து வங்கிகள் ஏற்கனவே இருக்கும் வங்கி லாக்கர்
வாடிக்கையாளர்கள் உடனான லாக்கர் ஒப்பந்தங்களை புதுப்பித்து
தகுதி சான்று வழங்கவேண்டும்.

புதிய லாக்கர் விதிகள் அந்த தேதியில் இருந்து செயல்படுத்தப்பட
வேண்டும். வங்கிகள் வாடிக்கையாளருக்கு லாக்கரை ஒதுக்கும்
போது அந்த வாடிக்கையாளரிடம் வங்கி முத்திரையிடப்பட்ட
காகிதத்தில் ஒப்பந்தம் செய்து கொண்டும்,

ஒப்பந்த பாத்திரத்தின் ஒரு நகலை வாடிக்கையாளரிடமும்,
அசல் வங்கியின் கிளையிலும் இருக்க வேண்டும். குறைந்தபட்சம்
180 நாட்கள் லாக்கர் அறையின் நுழைவு மற்றும் வெளியேறும்
பகுதியில் மற்றும் வங்கியின் பொதுவான பகுதிகளில் உள்ள
சிசிடிவி கேமராவின் பதிவை கட்டாயம் பாதுகாத்து வைத்திருக்க
வேண்டும்.

வங்கியின் கவனக்குறைவால் பாதுகாப்பு பெட்டகத்தில் உள்ள
பொருள்களுக்கு ஏற்படும் இழப்பு அல்லது சேதத்திற்கு வங்கிகள்
பொறுப்பேற்க வேண்டும். இருந்தாலும் நில நடுக்கம், வெள்ளம்,
மின்னல், புயல் போன்ற இயற்கை பேரழிவு அல்லது
வாடிக்கையாளர்களின் அலட்சியத்தினாலோ லாக்கரில் உள்ள
பொருள்களுக்கு ஏதேனும் சேதமோ அல்லது இழப்போ ஏற்பட்டால்
வங்கி பொறுப்பாகாது’ என்று ரிசர்வ் வங்கி தெரிவித்துள்ளது.

-தினகரன்