உருவக்கேலி தன்னம்பிக்கையைசிதைத்து விடும்!

உருவக்கேலி தன்னம்பிக்கையைசிதைத்து விடும்!

ரஜினி நடித்த காலா பட கதாநாயகி ஹுமா குரேஷி:

நான் ரொம்ப சாதாரணமானவள். இந்த மாதிரியான
படங்களில் மட்டுமே நடிக்க வேண்டும் என்று,
தேர்ந்தெடுக்கும் நிலைமையில் இருந்ததில்லை.

என்னை வைத்து தான் படம் எடுக்க வேண்டும் என்று,
இயக்குனர்கள் யாரும் வரிசையில் நிற்கவும் இல்லை;
பெரிய பேனர்கள் என்னை முன்னிலைப்படுத்தவும்
இல்லை.

இருந்தாலும், திரை உலகில், 10 ஆண்டுகளாக நிலைத்து
நின்று நடித்திருக்கிறேன்.அழகான பொம்மையாக,
மரங்களை சுற்றி காதல் செய்யவும், ஹீரோக்கள் உரசிக்
கொள்ள சுவர் மாதிரி நிற்கவும், இங்கு வரவில்லை.

எனக்கு தரப்பட்ட கதாபாத்திரங்களில், முடிந்த வரை
திறமையாக நடித்து இருக்கிறேன். கொரோனா ஊரடங்கின்
போது, எங்கும் ஷூட்டிங் நடக்கவில்லை; ஆனால், ஓ.டி.டி.,
யில் வேலை நடந்தது. அங்கு போகலாம் என்று முடிவு செய்த
போது, 'சினிமாவில் வாய்ப்பில்லை என்பதால், ஓ.டி.டி.,க்கு
வந்ததாக கேலி செய்வர்; ஒப்புக் கொள்ளாதே' என்று
நண்பர்கள் பயமுறுத்தினர்.

அதை பொருட்படுத்தாமல், தைரியமாக, 'வெப்'
தொடர்களில் நடிக்க ஆரம்பித்தேன். இப்போது, ஓ.டி.டி.,
படங்களுக்கும், வெப் தொடர்களுக்கும் தனி ரசிகர் பட்டாளமே
உருவாகி விட்டது.

நேரடி திரைப்படங்கள், வெப் தொடர்கள், ஓ.டி.டி., படங்கள்
என்று பிசியாக இருக்கிறேன். வெப் தொடர்களில் வேலை
அதிகம் என்றாலும், நம் திறமைக்கு மதிப்பும், அதற்கு மேல்
காசும் கிடைக்கிறது.

உருவக் கேலிக்கு இலக்காகாதவர்கள் இருக்கின்றனரா என்ன?
எவ்வளவு தான் திறமை மிக்கவர்களாக இருந்தாலும், நிறம்,
உடல், பருமன், நெட்டை, குட்டை என, ஏதாவது உருவக்கேலி
செய்வதற்கு என்றே, இங்கே ஒரு கும்பல் அலைகிறது.

ஆண்களோடு ஒப்பிடும் போது, பெண்கள் அதிகளவு உருவக்
கேலிக்கு ஆளாகின்றனர். சிலர் வரம்பு மீறி, பெண்களின்
அங்க அடையாளங்களை மோசமான வார்த்தைகளால்
விமர்சிக்கின்றனர்.

உருவக்கேலிகள் ஒருவரின் தன்னம்பிக்கையை சிதைத்து விடும்.
இதை மையமாக வைத்து தயாரிக்கப்பட்டது தான்,
டபிள் எக்ஸ் எல் திரைப்படம்.

இந்தப் படத்தில் உருவக்கேலி செய்வது, எவ்வளவு மோசமான
செயல் என்று அழுத்தமாக சொல்லி இருக்கிறோம். இந்தப் படம்,
உருவக்கேலி செய்பவர்கள் மனநிலையில் ஓரளவாவது
மாற்றத்தை ஏற்படுத்தும் என்று நம்புகிறேன்!

-தினமலர்