போஸ்டர் ஒட்டியவர்கள் மீது நடவடிக்கை.

கோவை: கோவை நகரில், கடந்த சில ஆண்டுகளாக போஸ்டர்களின் ஆதிக்கம் அதிகரித்துக் கொண்டே இருக்கிறது. இவை வாகன ஓட்டிகளின் கவனத்தைச் சிதறடிப்பதுடன், பாலங்கள், சுவர்களை அலங்கோலமாக்கி வருகின்றன.







இவ்வாறு பெரிய சைஸ் போஸ்டர் ஒட்டுவதில், உள்ளூர் பத்திரிகைகளுக்கும், அரசியல்வாதிகளுக்கும் இடையில், பெரும் போட்டியே நடக்கிறது. குறிப்பாக, ஏதாவது ஒரு நிறுவனம் அல்லது தனி நபர்களை பிரமாண்டப்படுத்தும் வகையில், நகருக்குள் ஆயிரக்கணக்கான போஸ்டர்கள் ஒட்டப்படுகின்றன. ஆளும்கட்சியினர் இதற்கான அனுமதி, லஞ்சம் எதுவுமே இல்லாமல், இஷ்டத்துக்கு போஸ்டர் ஒட்டி வருகின்றனர்.

பேனர்களைத் தவிர்க்குமாறு அறிவுறுத்தும் தி.மு.க., தலைமை, இத்தகைய போஸ்டர்களை ஒட்ட வேண்டாம் என்று, கட்சி நிர்வாகிகளுக்கு கடிவாளம் போடுவதே இல்லை.இதனால், புதிதாகக் கட்டப்படும் அவிநாசி ரோடு மேம்பாலத்தில், மிகப் பிரமாண்டமான போஸ்டர்கள், ஆளும்கட்சியினரால் ஒட்டப்பட்டுள்ளன.







கோவை நகரை மேம்படுத்தவும், அழகுபடுத்தவும், பல ஆயிரம் கோடி ரூபாய் மதிப்பில்வளர்ச்சிப் பணிகள் நடந்து வருகின்றன. அதற்கு நேர்மாறாக, கோவை நகரை அசிங்கப்படுத்தும் போஸ்டர்களுக்கு, இதே நகரிலுள்ள வி.ஐ.பி.,க்களே அமோக ஆதரவு அளித்து வருகின்றனர். இந்த போஸ்டர்களில் அவர்களின் புகைப்படங்களை, பெரிய அளவில் விளம்பரப்படுத்துவதற்கு அடிமைகளாகி, லட்சம் லட்சமாக பணத்தை வாரியிறைக்கின்றனர்.


மாநகராட்சி கமிஷனருக்கு சபாஷ்!

இந்நிலையில், கோவை மாநகராட்சி நிர்வாகம் அதிரடி நடவடிக்கை எடுத்து, போஸ்டர்களுக்கு முற்றுப்புள்ளி வைக்க முயற்சி செய்துள்ளது. கோவை அவிநாசி ரோட்டில், புதிதாகக் கட்டப்பட்டு வரும் பாலத்தில் போஸ்டர் ஒட்டியது தொடர்பாக, கோவை கிழக்கு மண்டல உதவி செயற்பொறியாளர் ஹேமலதா கொடுத்துள்ள புகாரின்பேரில், ஐந்து நிறுவனங்கள் மீது வழக்குப்பதிவு செய்யப்பட்டுள்ளது.

கோவை கிழக்கு மண்டல உதவி நகரமைப்பு அலுவலர் ஜெயலட்சுமியிடம் கேட்டபோது, ''முதற்கட்டமாக, வணிக நிறுவனங்கள் மீது நடவடிக்கை எடுக்கப்பட்டுள்ளது; அடுத்த கட்டமாக, அரசியல்கட்சியினருக்கு உரிய அறிவுறுத்தல் வழங்கியபின், அவர்கள் மீதும் கண்டிப்பாக நடவடிக்கை எடுக்கப்படும்,'' என்றார்.மாநகராட்சி தற்போது எடுத்துள்ள நடவடிக்கை தொடர வேண்டும்; அதில் பாரபட்சம் இருக்கக்கூடாது என்பதே, கோவை மக்களின் எதிர்பார்ப்பு.


அரசியல்கட்சிகளுக்கு 10 நாட்கள் அவகாசம்!

கோவை நகரில் போஸ்டர்களை அகற்றுவது தொடர்பாக, கலெக்டர் தலைமையில் அனைத்துக்கட்சிக் கூட்டம் நடத்தப்பட்டது. அதில் பேசிய கலெக்டர் சமீரன், ஐகோர்ட் உத்தரவை அமல்படுத்த வேண்டிய கட்டாயம் இருப்பதால், போஸ்டர்களை ஒட்டாமல் அரசியல்கட்சியினர் ஒத்துழைக்க வேண்டும் என்று கேட்டுக் கொண்டுள்ளார்.

மாநகராட்சி கமிஷனர் பிரதாப், 'தற்போது ஒட்டப்பட்டுள்ள போஸ்டர்களை 10 நாட்களுக்குள் அந்தந்த கட்சியினரே அகற்றிக் கொள்ள வேண்டும்; இல்லாவிடில் மாநகராட்சி சார்பில் நடவடிக்கை எடுக்கப்படும்'' என்று கூறியுள்ளார்.

கோவை மாநகர போலீஸ் கமிஷனர் பாலகிருஷ்ணன், எஸ்.பி., பத்ரி, தேசிய, மாநில நெடுஞ்சாலைத்துறை அதிகாரிகள் அனைவரும் இக்கூட்டத்தில் பங்கேற்றிருப்பதால், இனி போஸ்டர் ஒட்டுவோர் மீது, கடும் நடவடிக்கை பாயுமென்ற நம்பிக்கை பிறந்துள்ளது.


நன்றி தினமலர்.

மாநகராட்சி கமிஷனர் பிரதாப், 'தற்போது ஒட்டப்பட்டுள்ள போஸ்டர்களை 10 நாட்களுக்குள் அந்தந்த கட்சியினரே அகற்றிக் கொள்ள வேண்டும்; இல்லாவிடில் மாநகராட்சி சார்பில் நடவடிக்கை எடுக்கப்படும்'' என்று கூறியுள்ளார்.

மதிப்புக்குரிய நீதி மன்றங்கள் பல ஆண்டுகளாக இந்த போஸ்டர் /பேனர்கள் வைப்பதை கண்டித்து வருகின்றன.

செவிடன் காதில் ஊதிய சங்கென அரசியல் கட்சிகள், வாய் மூடி இருக்கின்றன.அரசியல் சட்டம் கொண்டுவந்து 
இதுமாதிரி ஓட்டும் கட்சிகளை தண்டிக்கவேண்டும்.

இதை தவிர மக்களும் கண்ணீர் அஞ்சலி படங்களை ஓட்டுகின்றனர் இதுவும் அறவே நீக்கப்படவேண்டும்.

சட்டங்கள் பல இருந்தும் வாய்மூடியாக இருக்கும் பல அரசு துறைகள் இதற்கு பொறுப்பேற்கவேண்டும்.

எல்லாம் சரிதான் அய்யா, இனி போஸ்டர் ஓட்டமாட்டோம் என கூறி,
அந்த சுவர்களை வண்ண வண்ண எழுத்துக்களால் வாழ்த்துக்கள் கூறி 
படங்கள் வரையாமல் இருக்கவேண்டும். இதற்கும் தகுந்த நடவடிக்கை எடுக்கவேண்டும்.