மோசடியில் இது புதுசு! தெரு பெயரை மாற்றி அங்கீகாரமில்லா மனைகளை பதியும் சார் - பதிவாளர்கள்

அரசு விதித்துள்ள தடையை மீறி, தெருவின் பெயர், முகவரியை மாற்றி, அங்கீகாரமில்லாத மனைகளை சார் - பதிவாளர்கள் பதிவு செய்து, புதிய மோசடியில் ஈடுபட்டுள்ளது தெரியவந்துள்ளது. தமிழகத்தில், விவசாய நிலங்கள் வீட்டு மனையாவதை தடுக்கக் கோரிய வழக்கால், அங்கீகாரமில்லாத மனைகள் விற்பனைக்கு, 2017ல் தடை விதிக்கப்பட்டது.





புகார்

நகரமைப்பு துறை அங்கீகாரம், ரியல் எஸ்டேட் ஆணைய பதிவு இல்லாத மனைகளின் பத்திரங்களை பதிவு செய்ய தடை விதிக்கப்பட்டுள்ளது. இருப்பினும், சில சார் - பதிவாளர்கள், இந்த விதியை மீறுவதாக கூறப்படுகிறது.இதுகுறித்து, பதிவுத்துறை அதிகாரிகள் கூறியதாவது:பொதுவாக ஒரு சொத்தை பதிவு செய்யும் போது, அதன் சர்வே எண் மற்றும் அமைவிட முகவரியை சரியாக குறிப்பிட வேண்டும்.

இவ்வாறு செய்தால், அங்கீகாரமில்லாத மனைகள் பதிவு செய்வது தெரிந்து விடும்.இதனால், சில சார் - பதிவாளர்கள், சொத்து அமைந்துள்ள தெரு பெயரை தவறாக குறிப்பிட்டு, அங்கீகாரமில்லாத மனைகளை பதிவு செய்கின்றனர். இதில், சர்வே எண், கிராமத்தின் பெயர்கள் சரியாக இருக்கும்.தெரு பெயரை மட்டும் மாற்றி குறிப்பிட்டிருப்பர். இதனால், அதை அங்கீகாரமில்லாத மனை என்று கண்டுபிடிக்க முடியாது. திருச்சி, தஞ்சாவூர், கோவை, சேலம் மண்டலங்களில், இது போன்ற புதிய மோசடிகள் நடப்பதாக புகார்கள் வந்துள்ளன.




நடவடிக்கை

வேலுார் மண்டலத்துக்கு உட்பட்ட திருவண்ணாமலை பதிவு மாவட்டத்தில் மட்டும், 20 ஆயிரத்துக்கு மேற்பட்ட பத்திரங்கள், இப்படி மோசடியாக பதிவாகி உள்ளன.இந்த விஷயத்தை, ஐ.ஜி., உள்ளிட்ட உயரதிகாரிகள் கவனத்துக்கு எடுத்துச் செல்ல நடவடிக்கை எடுக்கப்பட்டு வருகிறது. விரைவில், இதில் சம்பந்தப்பட்டவர்கள் மீது நடவடிக்கை பாயும்.இவ்வாறு அவர்கள் கூறினர்.

- நமது நிருபர் -தினமலர்.

புது விதமாக மோசடிகள் செய்வதற்கென்றே கல்லூரிகள் உள்ளன போல் இருக்கிறது!

கை தேர்ந்தவர்கள் நடத்துகின்றனரோ??

இதெல்லாம் ஜுஜுபி அந்த "ஹாக்கர்ஸ்" களுக்கு