4வது அலை உருவாக வாய்ப்புள்ளதா? :5 மாநிலங்களில் அதிகரிக்கும் தொற்று!

புதுடில்லி :
தமிழகம், மஹாராஷ்டிரா, கேரளா, தெலுங்கானா மற்றும்
கர்நாடகாவில் கொரோனா தொற்று பரவல் அதிகரிக்க
துவங்கியிருப்பதாக மத்திய சுகாதாரத்துறை எச்சரிக்கை
விடுத்திருப்பதை அடுத்து, நான்காவது அலை உருவாகுமா
என்ற அச்சம் எழுந்துள்ளது.

கொரோனா தொற்று பரவல் வெகுவாக குறைந்து மக்கள்
இயல்பு வாழ்க்கைக்கு திரும்பும் நேரத்தில், நாட்டின் சில
பகுதிகளில் மீண்டும் தொற்று பரவல் அதிகரிக்க துவங்கி
உள்ளது.

அச்சம்

குறிப்பாக, தமிழகம், மஹாராஷ்டிரா, கேரளா, தெலுங்கானா
மற்றும் கர்நாடகாவில் வாராந்திர தொற்று பாதிப்பு எண்ணிக்கை
கணிசமாக உயர்ந்துள்ளது.

தமிழகத்தை பொறுத்தவரை, மே 27ம் தேதி 335 ஆக இருந்த வாராந்திர
தொற்று பாதிப்பு எண்ணிக்கை, ஜூன் 3ம் தேதி 659 ஆக உயர்ந்துள்ளது.
அதே போல 0.4 ஆக இருந்த தொற்று உறுதி செய்யப்படும் விகிதம் 0.8 ஆக
உயர்ந்துள்ளது.

கேரளா, தெலுங்கானா, கர்நாடகாவிலும் இதே நிலை தொடர்கிறது.
மஹாராஷ்டிராவில் மட்டும் வைரஸ் பரவல் சற்று கடுமையாக இருப்பதாக
எச்சரிக்கப்பட்டுள்ளது.

இந்த ஐந்து மாநிலங்களிலும் தொற்று பரிசோதனையை அதிகரிக்கவும்,
தொற்று தடுப்பு நடவடிக்கையை சமரசமின்றி பின்பற்றவும், மருத்துவ
மனைகளை தயார் நிலையில் வைத்துக் கொள்ளவும் அறிவுறுத்தப்பட்டுள்ளது.

உருமாறிய ஒமைக்ரான் வகை தொற்றின் துணை வகைகளான,
பிஏ.4 மற்றும் பிஏ.5 ஆகியவற்றினால் தான், உலகம் முழுதும் மீண்டும்
கொரோனா பரவல் அதிகரித்தது.

இந்த தொற்று நம் நாட்டிலும் கண்டறியப்பட்டுள்ளது. ஜூலையில் நான்காம்
அலை உருவாகும் என, உத்தர பிரதேசத்தின் கான்பூரில் உள்ள ஐ.ஐ.டி.,
எனப்படும் இந்திய தொழில்நுட்ப கல்வி நிறுவனம் ஏற்கனவே எச்சரித்து
இருந்தது.

இந்நிலையில், தற்போதைய தொற்று அதிகரிப்பு நான்காம் அலைக்கான
அறிகுறியா என்ற அச்சமும் மக்கள் மத்தியில் உருவாகி உள்ளது.இதற்கு பதில்
அளித்து தொற்று நோயியல் நிபுணர் டாக்டர் ஷாஹித் ஜமீல் கூறியதாவது:

கடுமையான பாதிப்பு

நாம் விழிப்புடன் இருக்க வேண்டியது அவசியம். ஆனால், அச்சப்பட தேவையில்லை.
இப்போது பரவும் தொற்றால் கடுமையான பாதிப்புகள் ஏற்படாது.
பெரும்பாலானவர்கள் தடுப்பூசி போட்டுள்ளதோடு, தொற்று பாதிப்புக்கும்
ஏற்கனவே ஆளாகி உள்ளனர். எத்தனை பேர் மருத்துவமனையில் அனுமதிக்க
வேண்டிய நிலை ஏற்படுகிறது என்பதை தான் நாம் கூர்ந்து கவனிக்க வேண்டும்.
இவ்வாறு அவர் கூறினார்.

தினமலர்