மஹா., மசூதிகளில் ஒலிபெருக்கி அகற்றும் போராட்டம்...முற்றுகிறது!:

-

மும்பை:மஹாராஷ்டிராவின் மசூதிகளில் ஒலிபெருக்கிகளை அகற்ற, மஹாராஷ்டிரா நவநிர்மாண் சேனா தலைவர் ராஜ் தாக்கரே அளித்திருந்த கெடு நேற்று முன்தினம் முடிவுக்கு வந்ததை அடுத்து, மாநிலம் முழுதும் நேற்று பதற்றம் நிலவியது. ஒரு சில இடங்களில் மசூதி அருகே அனுமன் பாடல்கள் ஒலிபரப்பப்பட்டன.

ராஜ் தாக்கரே வீட்டு வாசலில் குவிந்த கட்சித் தொண்டர்களை, போலீசார் கைது செய்தனர். புனேவிலும்,அக்கட்சியின் மாநில தலைவர் உட்பட ஒன்பது பேரை, போலீசார் கைது செய்தனர். ''இந்த போராட்டம் இன்றுடன் முடிவுக்கு வராது,'' என ராஜ் தாக்கரே எச்சரிக்கை விடுத்தார்.
மஹாராஷ்டிராவில், முதல்வர் உத்தவ் தாக்கரே தலைமையில் சிவசேனா, தேசியவாத காங்கிரஸ் மற்றும் காங்கிரஸ் கூட்டணி ஆட்சி நடக்கிறது. இங்கு, உத்தவ் தாக்கரேயின் சித்தப்பா மகன் ராஜ் தாக்கரே, எம்.என்.எஸ்., எனப்படும், மஹாராஷ்டிரா நவ நிர்மாண் சேனா கட்சியின் தலைவராக உள்ளார். இவர், 'மாநிலத்தில் உள்ள மசூதிகளில் வைக்கப்பட்டுள்ள ஒலிபெருக்கிகள் அதிக சத்தத்தை எழுப்புவதால், மே 3ம் தேதிக்குள் அனைத்தையும் அகற்ற வேண்டும். 'இல்லாவிட்டால், 4ம் தேதியில் இருந்து, மசூதிகளுக்கு முன் அதிக சத்தத்துடன், அனுமன் பாடல்களை நாங்கள் ஒலிபரப்புவோம். அதன்பின் நடக்கும் சம்பவங்களுக்கு நாங்கள் பொறுப்பில்லை' என எச்சரிக்கை விடுத்திருந்தார்.

அவர் விதித்திருந்த கெடு நேற்று முன்தினத்துடன் முடிவுக்கு வந்தது. அசம்பாவித சம்பவங்களை தடுக்க, மஹாராஷ்டிரா முழுதும் பலத்த போலீஸ் பாதுகாப்பு போடப்பட்டது. மும்பை சார்கோப் பகுதியில் உள்ள மசூதியின் ஒலிபெருக்கியில், 'அஸான்' எனப்படும் தொழுகைக்கான அழைப்பு நேற்று காலை ஒலித்துக் கொண்டிருந்தது.

மசூதி அருகே உள்ள உயரமான கட்டடத்தில், எம்.என்.எஸ்., தொண்டர், ஒலிபெருக்கி வைத்து அனுமன் பாடல்களை அதிக சத்தத்துடன் ஒலிபரப்பினார். இந்தக் காட்சிகள், சமூக வலை தளங்களில் வெளியாகின.மும்பையின் தானே மாவட்டத்தில் உள்ள இந்திரா நகர் பகுதியில், எம்.என்.எஸ்., தொண்டர்கள் அனுமன் பாடல்களை ஒலிபெருக்கியில் அதிக சத்தத்துடன் ஒலிபரப்பினர்.

ஆனால், அப்பகுதியில் மசூதிகள் எதுவும் இல்லை.இந்நிலையில், மும்பை நகர் முழுதும் நேற்று பதற்றம் நிலவியதால், பலத்த போலீஸ் பாதுகாப்பு போடப்பட்டு இருந்தது. எம்.என்.எஸ்., தலைவர் ராஜ் தாக்கரே வீடு அமைந்துள்ள சிவாஜி பூங்கா பகுதியில் ஏராளமான தடுப்புகள் அமைத்து, போக்குவரத்து தடைபடாமல் போலீசார் பாதுகாப்பு அளித்தனர்.

முன்னெச்சரிக்கை நடவடிக்கையாக ராஜ் தாக்கரே வீட்டு முன் குவிந்திருந்த தொண்டர்களை, போலீசார் கைது செய்தனர். புனேவிலும் பலத்த பாதுகாப்பு ஏற்பாடுகள் செய்யப்பட்டு இருந்தன. புனேவின் கல்கார் அனுமன் கோவிலில் வழிபாடு முடித்து வெளியே வந்த எம்.என்.எஸ்., மாநில செயலர் அஜய் ஷிண்டே உட்பட ஒன்பது பேரை, போலீசார் கைது செய்தனர்.

'புனே நகர மசூதிகளில் உள்ள ஒலிபெருக்கிகளில் நேற்று காலை தொழுகை ஒலிபரப்பப்பட வில்லை. அதேபோல மசூதிகள் அருகே, அனுமன் பாடல்களை ஒலிபரப்பும் சம்பவங்களும் நிகழவில்லை' என போலீஸ் தரப்பில் கூறப்பட்டது.
இதற்கிடையே, செய்தியாளர்களை சந்தித்த எம்.என்.எஸ்., தலைவர் ராஜ் தாக்கரே கூறியதாவது: மும்பையில் மொத்தம் 1,104 மசூதிகள் உள்ளன. இதில், 135 மசூதிகள் நேற்றைய காலை தொழுகையின் போது அதிக சத்தத்துடன் ஒலிபெருக்கிகளை பயன்படுத்தின. சட்டத்தை மீறிய இவர்கள் மீது போலீசார் நடவடிக்கை எடுக்காமல், எங்கள் தொண்டர்களை கைது செய்கின்றனர்.

எங்கள் போராட்டம் காலை தொழுகையுடன் சுருங்கிவிடாது. ஐந்து வேளை தொழுகையின் போதும் ஒலிபெருக்கிகளை சட்டவிரோதமாக பயன்படுத்தக் கூடாது. மீறினால், மிக அதிக சத்தத்துடன் அனுமன் பாடல்களை ஒலிபரப்புவோம். இன்று ஒரு நாளுடன் இந்த போராட்டம் முடிவுக்கு வராது.மசூதி மட்டுமல்லாமல், எந்த வழிபாட்டு தலங்களிலும் ஒலிபெருக்கி பயன்படுத்த வேண்டுமெனில், உச்ச நீதிமன்றம் வகுத்துள்ள ஒலி அளவை மீறக்கூடாது. இவ்வாறு அவர் கூறினார்.
ராஜ் தாக்கரே வெளியிட்ட 'வீடியோ!'சிவசேனா நிறுவனரான, மறைந்த பால் தாக்கரே பேசும் பழைய 'வீடியோ' ஒன்றை, ராஜ் தாக்கரே தன் சமூக வலைதளத்தில் நேற்று வெளியிட்டார்.
36 வினாடிகள் ஓடும் அந்த வீடியோவில், 'சிவசேனா ஆட்சிக்கு வந்தால், சாலையில் தொழுகை செய்யவும், மசூதிகளில் ஒலிபெருக்கி பயன்படுத்தவும் தடை விதிக்கப்படும்' என, பால் தாக்கரே பேசிய காட்சி இடம்பெற்றுள்ளது.
'ஹிந்துத்வா பற்றி கற்றுத் தர வேண்டாம்'சிவசேனா எம்.பி., சஞ்சய் ராவத் கூறியதாவது: வழிபாட்டு தலங்களில் ஒலிபெருக்கி பயன்படுத்த உச்ச நீதிமன்றம் வகுத்துள்ள விதிமுறைகள் மஹாராஷ்டிராவில் மீறப்படவில்லை. மீறுபவர்கள் மீது அரசு நடவடிக்கை எடுக்கும். போராட்டம் நடத்த வேண்டிய அளவுக்கு நிலைமை மோசமாகவில்லை.

போலி ஹிந்துத்வாவாதிகளின் ஆதரவுடன், சிவசேனாவுக்கு எதிராக சதி செய்பவர்களின் பேச்சை மக்கள் பொருட்படுத்துவது இல்லை. பால் தாக்கரேவின் கொள்கையை தான் நாங்கள் பின்பற்றி வருகிறோம். எங்களுக்கு யாரும்ஹிந்துத்வா பற்றி பாடம் கற்றுத்தர வேண்டாம். இவ்வாறு அவர் கூறினார்.

எம்.பி., - எம்.எல்.ஏ., தம்பதிக்கு 'ஜாமின்!''மும்பையில் உள்ள முதல்வர் உத்தவ் தாக்கரே வீட்டின் முன் அனுமன் பாடல்களை பாடுவோம்' என கூறியதற்காக, சுயேச்சை எம்.பி., நவ்நீத் ராணா, அவரது கணவரும், எம்.எல்.ஏ.,வுமான ரவி ராணா ஆகியோர் கடந்த மாதம் கைது செய்யப்பட்டனர். இவர்கள் இருவருக்கும் மும்பை சிறப்பு நீதிமன்றம் நேற்று 'ஜாமின்' வழங்கியது.

தினமலர்